Lets in Ostarie: Adam. “Un emigrant dal Camerun”

cuviertineADAM – UN EMIGRANT DAL CAMERUN

CE LIBRI ISAL?
“Adam – Un emigrant dal Camerun” al è un libri bilengâl, talian e furlan, scrit di Gianfranco Gallo.
Si trate di une storie che o podaressin definî une novele, ni tant lungje, ni tant curte, che prime par furlan, e dopo par talian, e conte la storie di Adam, che dal Camerun al rive in Friûl a cirî furtune. Al è stât publicât cul jutori de Pro Loco di Gjalarian zaromai un pâr di agns fa e al si compon di 142 pagjinis.

MA CUI ISAL L’AUTÔR?
Gianfranco Gallo al è dal ’48, al è di Gjalarian e al è un nestri contecurtâr Plume di Ingjustri, che cuant che al pues nus regale simpri cualchi biele conte. Al è di sigure plui cognossût pes poesiis, stant che no dome o vin let achì il so libri Amôr une peraule tal me cor, ma al è stât di spes premiât in concors. L’Ostîr al à ancje vût il plasê di tignî a batesim chest libri propite a Gjalarian.

MA CE ISAL DENTRI, DI PRECÎS?
Une storie semplice e biele, che in chescj timps dulà che no si rive adore a parâsi dal razism e dulà che il spirt cristian al pâr jessi lât a platâsi, nus conte di un emigrant (e no di un imigrât, come che sin usâts). Adam, par câs, al finìs par discuvierzi che il Friûl nol è dome il puest dulà che al stâ cirint fortune – lant a vendi strafaniçs pes cjasis – ma al è ancje la tiere di dulà che a son i soi vons. E anzit… al rivarà propit a Gaeran, paisut de basse furlane, dulà che al cjatarà Zuan. Di chi, il rapuart tra Zuan e Adam, al met lidrîs, e si capissarà che intes diferencis si plate la sioretât di spirt e di cûr.

MA A CUI PUEDIÂL PLASÊ?
A ducj chei che a àn voie di sintisi contâ une storie semplice, che e cjacare di bogns sintiments, e dulà che l’unic vêr antagonist al è il timp e il vivi, che a passin e a cambin par ducj. No si à di spietâsi maraveis narativis, ma scletece, tenerece e semplicitât di chê gjenuine. Al è une vore util ancje par chei che ur plasarès lei par furlan ma a son inmò insigûrs, stant che al è il talian subit daûr.
.
E SE O AI VOIE DI CJOLILU?
Al è un libri che lu si cjate lant a cjatâ l’autôr o magari chei de Pro Loco di Gjalarian. Si pues in ogni câs cjapâ une cerce achì su Contecurte.

3 coments On Lets in Ostarie: Adam. “Un emigrant dal Camerun”

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît