Il marcjadant di animis

O vevi dome cutuardis agns cuant ch’o cjapài cussience ch’a si pues pierdisi par simpri. Al jere cuant che, pe prime volte, o fevelaj cul Vecjo.
‘…Chiste a è propi biele! – i disevi – La plui biele di dutis chês che tu mi âs contadis. Ma parcè no mi contitu di chê robe che a disin che tu sâs? La storie da lis animis.’ Nol sameave masse content di chiste richieste, a judicâ de sô muse. Ma mi rispuindè: ‘Lis animis a son come fûcs. A viodilis, a son bielissimis: ognidune a colôrs diferens; e ognune a bruse viers une certe direzion, che al è el scopo da la lôr vite. A costin tant parcè che in bande di sedi bielis a van benissim par scjaldâ d’Unvier’.
‘Ma alore si podin comprâ?’
‘Sigûr! Cualchi malandrin lis robe e lis vent. Lu clamin el’
‘Marcjadant di animis!’
‘Infati. E se cualchidun al liberàs lis animis da lis gabis specialis dulà che a son siaradis, lôr a tornaressin dai lôr parons umans, tornantji la gjonde e la vitalitât che a vevin pierdût.’

La storie dal Vecjo mi lassà di stuc, ma ma la dismentai fintremai che, agns dopo, une dì la mê cjare nonute si inmalà di un mâl strani che le lassave cidine, smuarte. No jere plui jê… al jere come se a ves pierdût la anime. A decidei di partî pa la ricercje da la sô anime, e di dutis chês che a jerin stadis robadis.
Tai mei viaçs a viodei tantis citâts e paîs, in lunc e in larc, e o cognossei tante int. Une sere o rivai ta une fieste di paîs, dulà che a jerin tancju gaugârs. O stavi cjalant amirât lis lôr brauris, cuant che un di lôr al ferme dut cuntune berlade, si met sul palc devant di ducj e al scomence a contâ la sô vite. Al jere propit un tipo strani; intant che al si svantave di ce che al veve fat, al faseve chistu ridi cjanin. O fasevi fature a cjalâlu, di tant che mi sameave che al ves cualchi rodele fur di puest.
A un ciert pont, al va daûr dal palc e al sposte cierts telons neris, e – sorprese! – daûr dai telos a son gabiots cun fûcs dentri… fûcs a slavìn, bielissims, e di cussì tancj colôrs, e colôrs mai viodûts prime, che no si rivaressin nancje a descrivi.
Profitant dal fat che al jere zirât di chê altre bande, mi svicinài a un dai gabiots. A cjalài i fûcs che a jerin dentri e a disèi sot vôs, dolcementri, che o jeri lôr amì e che a ju varès liberâts. Ô vierzej el gabiot ma lis flamis si slungjarin e a mi scotarin la ponte dai dêts. Sberlufît, o cjalài i fûcs, cussì biei ta lis lôr gabis. Ma mi samearin miei nemîs, pronts a scotâmi ancjemò se mi fos svicinat di plui.
E alore chê vôs soradine e berlà viers di me: ‘Stupit fantat! No esistin gabis pa lis animis! A è dome la pôre ca lis ten presonîris! Cumò ti si voltin cuintri, parcè ca no an voie di sedi liberadis!’

di Basilio Palombâr

#872

4 comments On Il marcjadant di animis

  • E vuê o din il benvignût nuiemancul che a un gnûf contecurtâr! Cuntune conte visionarie e simboliche nus mene ator pe fantasie… Velu chi, il so Marcjadant di animis, dut di lei e scuvierzi. Dait il benvignût al nestri Basilio Palombâr!

  • E benvignût in te ostarie Basili, che tu âs il stes non di puar gno pari. La conte e je une vore origjinâl e metude ju ben. Viôt di fâti lei ancjemò che in te ostarie o vin cetantis cjadreis inmò vueidis.
    Mandi

  • O vuei dâ il benvignût a Basili inte nestre cjare ostarie, zontant il plasê di vê let le sio conte tant plasude, par il fat che mi à ripuartât di frut intes stalis di inviêr, indulà il nono al contave lis sôs venturis di vuere e di muarts, e di chês flamadis di cetancj colôrs che vignivin fûr das tumbares dai muarts, e che lui disè che jerin lis lor animis a cirî preieris dai vîfs. Une conte che un grum si adate al dongje novembar.Graciis a Basili par vemi rinfrescjât il ricuârt. Lussian

  • Beh grasie a ducju!

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît