Il câs de gjachete blancje e rosse

Nol veve mai viodût un temporâl dal gjenar, il caporâl Spilot, tant che nol rivave nancje a cori. La aghe e rivave di dutis lis bandis e al jere une vore dificil stâ impins.
Rivât sul puint dal flum, al veve cjatât il Comissari Rocheton bagnât strafont. La muse rabiose.
Dulintor la ploie e il svint si sbrocavin cence remission.
— Spilot, bisugne calâsi jù intal flum e judâ chel puar om, prin che la curint lu puartedi fintremai tal mâr! Lu viodistu? Al è dut insanganât! Sperin che al respiri ancjemò!
Disint cussì al veve pontât il dêt viers il bas. Dongje de rive si viodeve une gjachete blancje e rosse.
— Cemût fasino, Comissari? No ai mico une cuarde inte sachete!
— Ve chi! Le ai puartade jo! Peiti ator dai ombui. Jo ti cali intal flum!
Nancje dite, Rocheton al veve disgredeât la cuarde e leât a strent Spilot.
— Sino sigûrs che a tegni dûr? Je dute consumade e no volarès colâ di un plomp!
— L’ostîr la dopre par tirâ su i caratei intal solâr. Va trancuîl!
Intant i arbui a parevin mostris che a remenavin lis ramacis, e un sgurlament di fueis al sivilave fuart. Al someave la fin dal mont.
In curt, Spilot al jere picjât sot il puint, a pendolon intal vueit, metût a cessecûl. Rocheton al tignive dûr la cuarde cuntune fuarce mai viodude.
— Che al cali planc, siôr Comissari! Un pôc a la volte!
Rocheton al molave la cuarde a centesims, procurant ae miôr di no lassâ la prese.
— Dimi cuant che tu sês a fîl di aghe, Spilot!
Juste in chel, dongje a Rocheton al jere rivât Bastian Pitôr, sot di une ombrenute che i parave juste lis orelis. Svelt al veve sbregât un toc di len e doprantlu come un forcjàs al veve tirât sù la gjachete blancje e rosse. Rocheton lu cjalave cui voi scocolâts.
— Comissari che mi scolti. Al è miôr che al tiri sù chel puar zovin. Se si romp la cuarde e al cole inte aghe, la curint lu puartarà fintremai tal mâr!
Disint cussì al veve saludât e si jere indreçât su la strade che a puarte te ostarie.
— Spiete che ti tiri sù, Spilot! — Al veve vosât Rocheton — Si è sberdeât il câs de gjachete blancje e rosse.

di Massim Furlan

#871

6 comments On Il câs de gjachete blancje e rosse

  • A nus mancjave une vore, il Comissari! E velu chi che al è tornât, e ancjemò al è in plene forme. Cussì svelt di no pierdi timp a butâ jù Spilot di un puint pûr di risolvi un câs! Cuâl câs? Ma chel de gjachete blancje e rosse! E par scuvierzilu, il nestri Massim Furlan, cu la so ironie che e rive a lenzi il non-sense nus spie dut. Dute di gjoldi, la storie gnove dal nestri Rocheton! Un personaç cussì aromai, al è pront pal grant palcosenic!

  • Ma chel Rocheton ulì no al è ch’al vedi vût il pari purcitâr o senoancje macelâr, al viôt sanc di ogni bande, a lu à tant ben incjastrât dentri i voi che po dome jessi cussi. Simpri fuart Massim a danus il bon timp cuntune ridade. Lussian

  • Une domande a STRALUNADE; indulà vano a finile i coments fats intal cjantonut plui parsore, cun che pote di scrite–ADD A COMMENT– ??? Lussian

  • Massim, par me i comissari Rochetòn, oltre a no jessi masse sveât, al devi jessi ancje curt di viste. Viôt di proviodi par un bon pâr di ocjâi.
    Dut câs biele.
    Mandi

Leave a Reply to Stralunade Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît