Il Gjugjul

Brut, grant e pandolo, sdenteât e cuntun voli di veri, a viodilu di gnot al jere di vê pôre di lui. Il Gjugjul, par tirâ indenant al faseve un pôc di dut e mâl; mecanic di bicicletis, bandâr, eletricist, sblancjadôr e i plaseve une vore bevi un tai; un a la volte e un daûr chel altri, se a ‘nd jere.
In te ostarie, dopo cualchi tai dispès al rugnave cuintri il guvier e cuintri i parons, e par solit nol plantave rognis, ma cuant che al rivave a cjase po al sbrocave la sô maluserie su la femine; e ju pachis di vueli sant. Catine, puare, e jere simpri un pôc macolade e vuaride di une bande de muse e jere subit segnade di chê altre.
Catine e jere di caratar mugnestri e no olsave a dâi cuintri al om; cjapâlis e tasê. Di lâ dai Carabinîrs po neancje tabaiâ, lui la varès copade. Se ben che e fos stade piel e vues jê di salût no stave mâl, ma in cjase sô il mangjâ al jere simpri pôc, par vie che buine part dai magris vuadagns di lui a lavin in vin. Cuant che o ai sintût che lôr a mangjavin ancje i riçs e o ai domandât cemût che si faseve cun lis spinis, mi à pandût che a lavin spelâts ben e po cuets te padiele; e zontave ancje che a jerin une vore bogns cu la polente.
Ogni tant Catine e vignive a vaî e a sbrocâsi cun mê mari, e jo frut o capivi che e faseve une vite une vore grame. Plui voltis e pandeve la voie di scjampâ di cjase e molâ chel disgraciât, ma no à mai vût il coragjo par fâlu.
Lôr, cence fruts, par vie che cuant che Catine e spietave lui i al veve fat pierdi a sun di pachis e e jere restade sterpe, a vivevin intune cjasute di dôs stanziis a pene fûr dal paîs, su la Pontebane. Denant di cjase il trafic al jere fis, dì e gnot.
Une sere, lôr doi a stan cenant cuant che si sint un gran bot fûr di cjase, a van fûr di corse e un brut spetacul si presente denant dai voi, une Fiat Milecent e je fruçade intor di un platin e cul ton si è metude di traviers su la strade. Chei doi dentri de machine no si movin plui e il Gjugjul nol sa ce fâ. Di lontan e rive une machine e par visâ dal incident lui si met intal mieç de Pontebane, a fâ segn di fermâsi. Chei de machine, par vie dal scûr, lu viodin masse tart, no rivin a frenâ in timp e lu tirin sot, copantlu sul colp.
Catine cumò e à finît di tribulâ e e fâs la badante a une vecjute; no à plui bisugne di lâ a riçs par jemplâ la panze e e à metût sù cualchi chilo. Je no ven plui a vaî chi di nô e cuant che e ven a cjatânus po lu fâs nome par bevi un cafè cun noaltris e par fa une ridade.
Prin di vuê no vevi mai viodût Catine a ridi.

di Pauli Jacuz

2 coments On Il Gjugjul

  • E je domenie, ma chi in ostarie no si polse dal dut. Us lassìn une conte ancje vuê. Cjalde, o ancje masse cjalde, e nere. Che lis storiis, no son simpri bielis di contâ. Nus al à lasse il nestri Pauli Jacuss, cuntune scriture sclete e cence tancj riguarts, une vore adate a la storie.

  • No al è dit che dutis lis muarts e puartedin lagrimis, in cheste je stade une liberazion meretade par Catine.Une biele denuncie di Pauli, che purtrop vuê come vuê e sucêt masse spes a tantis puaris feminis indula no an il coraç di reagî, vivint inte sfurtune di no vê la furtune che à vût Catine. Lussian

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît