Stelis

In chê dì, il Signôr al jere strac parcè che al veve creât il mont e alore al polsave, propit inte setime zornade.
Ator dut al jere biel, il cîl, la tiere, lis bestiis, il soreli, lis aghis… e ancje la creature tirade fûr dal pantan, daspò che i veve soflât dentri la anime, no someave plui un pipinot cence vite.
Po ben, al jere sore pinsîr par vie des stelis: al veve vût un cefâ mostro a picjâlis pulît, che chês i sbrissavin di dutis lis bandis… lis veve batiadis, ma a vanzavin ancjemò tantis cence non e cussì lis à strucjadis intun grum, disint: “Lis metarai a puest doman.”
Pensant e pensant, al veve tirât dongje cualchidune in cjasis clamadis costelazions, par che une a viodès di chê altre, ur veve dât non e direzion: inte cjase dal Scorpion al à metût Antàres, in chê di Cassiopea Schedir, in chê dai Zimui Castore e Polluce, in chê dal Roc Arietis, in chê di Perseo Mirfak e vie indenant.
Nol saveve cemût fâ cul grum, alore al à decidût di lassâlu cussì, al pareve bon, al someave une strade di grave tal scûr dal cîl, lu à clamât Via Lattea. Ma ancjemò al restave alc di no finît: par chest, al Signôr, i cjapave un tic di maluserie.
Stelis grandis, stelis piçulis, stelis fatis sù, stelis cu lis busis, stelis che a scuindevin musichis e poesiis, stelis fatis di claps neris e slusints, stelis che si impiavin e distudavin, stelis a passon pal cîl, stelis in viaç, stelis di dutis lis razis e lenghis, stelis in procession tant che a lessin in pelegrinaç a San Jacum di Galizie…
Intant il timp al passave su la tiere e biel planc oms feminis fruts a cressevin di numar e a cjolevin possès des planuris, des monts, dai mârs, a ju lavoravin, a vivevin parsore.
Ven a stâi che a man a man che la int a murive, la lôr anime si presentave su la puarte dal cîl.
Il Signôr al diseve: “Sì, ven!”, la faseve comodâ intal prât dentri il palaç e al lave a dreçâ il mont.
Al veve un grum di cefâ par bonâ vueris, fermâ i taramots, cuietâ il mâr, gjavâ il burlaç dal cîl – che, cuant dal diluvi universâl al veve rot dutis lis scovis par netâlu -, pensâ aes predicjis di inviâ ai predis di là jù, tignî di voli la puare int, cussì tant straneade e sturnide.
A si capis alore cemût mai che al lassave lis animis in spiete, par dî la veretât ogni tant i vignive un fregul di rimuars di cussience, par vie dal berdei di scugnî discrosâ.
Biel che lis cjalave, une gnot plene di lûs, si je fate strade dentri di Lui une idee miracolose e si è dit:
“Ve, o ingrumarai lis animis tornadis indaûr intal grum grant di Andromeda e chês che no rivin a jentrâ a laran in afit in altris costelazions.”
A planc a planc, une par une, tignintlis pe man a lis à compagnadis e plaçadis al lôr puest.
Daspò, al à spesseât a creâ animis e animis e lis à tacadis intes stelis
Alore cumò lis stelis no son plui dome un côl di claps e di lusôr, a torzeon cence un parcè, ma a son il nît di ogni anime.
O vin une stele par om, che e dismonte cuant che o nassin e nus puarte, secont il nestri sintî, ce che a nus covente par jessi contents.
Al è par chel che di gnot, cualchidun cjalant il cîl, tant che par cirî rispuestis a si domande: “Par câs, aio dismenteât alc là sù? Il lusôr sbusant il neri aial pierdût pe strade la gjonde? La cinise dal mont aie taponât il clâr?”
Parcè che dispès si sintin bessôi, tant che che nus mancjàs il flât e che no fossin fîs de lûs.
E lis stelis a son alì, lustris e simpri plui bielis: a nus cirin, nus clamin, nus cjalin, nus spietin…

di Giuliana Pellegrini

#854

5 comments On Stelis

  • A son personis che si lis cognòs par pôc, si lis incrose pocjis voltis, ma chel pôc, chês pocjis voltis, ti lassin un ricuart vîf che al dure par simpri, ancje cuant che chestis personis no son plui, parcè che ti àn insegnât une vore di robis bielis, che a son ce che al ten dongje un ricuart par simpri te memorie. Al capite, ancje, che il destin ti fâsi sgarfâ tes sachetis e ti meni dongje une conte smenteade, framieç di tantis altris che tu vevis publicadis. La ultime, vanzade, di un trop di flabis che podês lei chi su la osterie. La ultime e forsit la plui biele. Cheste persone e je Giuliana Pellegrini, e cun di plui, par un altri câs diferent, al è capitât che te stesse dì che al è saltât fûr chest piçul tesaur di conte, ancje la fie di Giuliana e vedi vût a cefâ cu lis contis, in chest câs propit dal Ostîr. E nie… lis stelis a àn voli bon e bon voli. E no de ostarie us regalin a ducj cheste bielissime flabe che nus à lassât Giuliana.

  • Certis contis no si finis mai di leilis,e ogni volte ti scrivin alc di gnûf su le anime, in cheste storie samee che Giuliana fossi za lì a svolâ su le imense bielece dal univiers. Lussian

  • Giuliana Pellegrini: une anime zentîl simpri in cercje di chê umanitât che saveve trasmeti tant ben tes sôs contis. Jê e vîf in nô a traviers di lôr.

Leave a Reply to Gelo Stellato Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît