Che dire? Letta tre volte, e non basta mai. Bellissima conte, profonda drammatica risolutiva.Grazie per la canzone di Tom
Un scherç ai cjaçadôrs
Intun paisut di mont, ala vierte da cjace dal jeur e dai fasans a rivin i cjaçadôrs e cjans a plen, dut un vuacâ e trai cu lis sclopis par chi e par là!
A son cence rispiet, a somein i parons dal mont cun chês sclopis e cun chei scarpons cu la suele a cjararmât.
Chei puars cjans ta la chebe che no viodin la ore di jessi molâts par podê cori e molâsi lis gjambis dutis indurmididis.
I cjaçadôrs a partissin in scuadre, cun chês sclopis neris, dut ce che a viodin movisi, i train.
I balins des cartucjis a colin intes corts cence nissune pôre dai abitants dal lûc.
Bepo, un tip dal lûc avonde mataran e plen di ideis, stuf di chê solfe al pense une da lis sôs: al va in cusine, tal tinel e in ta la stale… finalmentri, li che al è il Biso, un gjat grîs plen di cicatrîs fatis tai combatiments di amôr cun chei altris gjats dal paîs.
Bepo al cjape il Biso e i tache une viele piel di jeur, lu puarte in tai cjamps e lu mole sot dal nâs dai cjaçadôrs, i cjans a viodin cheste bestie e a van fûr cul cjâf, a tachin a cori daûr al gjat/jeur.
Il Biso dut scaturît al cor vie di sburide, daûr i cjans che a vuachin cu la bave tes bocis.
Il Biso cuant che al viôt un faiâr al tache a rimpinâsi finin ponte, i cjans in cercli sot la plante no capissin ce fâ.
Intant a rivin ancje i cjaçadôrs cu la lenghe fûr e cence flât, e cuant che a viodin il jeur/gjat in ponte al faiâr a volaressin rompi lis sclopis dal gnervôs.
Podopo a tachin a ridi come mats pal scherç une vore biel, fat di une ment sutile.
di Verdiana Franzo
#816
2 comments
Lasse une rispueste
Dutis lis contis
Un mesut fa, l’ostîr e Gianluca Franco a son lâts a fâ une comparsade intal cors di furlan de nestre coghe Serene. La serade, a Prissinins, nus pâr lade ben, e l’ostîr si è ancje inventât une cjatade che no us disvelin ma che si fonde sul principi dai dadui. Ai corsiscj al è stât domandât di scrivi une conte cun 4elements sielts par lôr. Ben po… doi di lôr (par cumò) a son rivâts a butâ jù la conte e noaltris de ostarie o sin une vore contents, parcè che fâ scrivi par furlan un che nol varès mai pensât di fâlu al è une vore biel. Cheste e je une conte lizere, e simpatiche e curte come che nus plâs a nô, di lei intun flât e cun ligrie… cence tant stâ a pensâi parsore. Graciis a Verdiana par jessisi metude in zûc e par un doman, la puarte de osterie, e je spalancade!
Biele e simpatiche le conte di Verdiana, ancje par il plasê di lei personis gnovis che cun biele fantasie e metin ju contis di plasevule leture.Ancje jo o jeri cjaçadôr, e di cuetis e di crudis mi àn petadis tantis ancje a mi su chel gjenar li. Lussian. AUGURIS di buine Pasche a dute la trupe di contecurte, scritors e organizatôrs de nestre cjare ostarie. Simpri Lussian,mandi ,mandi