Scrivi une Conte Curte

O ai voie di scrivi une conte curte ancje jo!

Cemût aio di fâ?

Alore… Biele domande! E nô, in viste dal Contecurte Day e juste vuê, che al è il trê di Avrîl, o vin decidût di fâi rispuindi al Ostîr. Ve chi ce che nus à rispuindût.

Duncje… tu âs voie di scrivi une conte curte?
Âstu une storie di contâ? Sì? Benon! Parcè che no esist une buine conte curte cence une idee che e stedi sot. Clâr che se tu âs za une biele storie di contâ, che tu cognossis o che adiriture ti è sucedude, sin za a metât dal lavôr. Bon… bisugnarès viodi se chê storie e je ancje origjinâl, parcè che si sa, plui si jentre intun argoment cognossût e doprât di tancj, plui al è dificil cjatâ une idee gnove. Ma stant che in dì di vuê al è scuasit impussibil proponi alc di verementri gnûf, tant vâl fâsi problemes: cualsisei argoment, ancje se “fruât”, al pues jessi modificât in maniere di rindilu gjoldibil. Ah, cemût ditu? No tu âs tal cjâf nissune biele storie di contâ? E ce problema isal! Se je une robe che ducj a vin e anzit, o sin siôrs, e je la fantasie! Il biel dal scrivi al è propit chest: se no tu âs une storie di contâ, tu puedis inventâle! Baste cjalâsi ator e alc al ven tal cjâf. Il mont al è fat di storiis, la vite di ognidun di nô e je une piece sfodrade di storiis che si messedin e tornìn a messedâ. Baste sielzi une e tirâle fûr!
L’impuartant al è vê cjatade une idee di fonde. Bisugne domandâsi, plui o mancul: Parcè aio voie di contâ cheste storie, e parcè la int e varès di stâ a sintîmi. E il biel di une conte curte savêso cual che al è? Che jessint curte, la idee ti stâ tal cjâf dute interie! Dal imprin a la fin. Tu puedis pensâle intant che tu lavoris, che tu sês ator a bevi, che tu polsis, prin di durmî, prin di jevâ, sot la doce… no covente cjarte e pene par contâsale dute cul pensîr e tignîle a ments.

Ma pensâ e je une robe, contâ e je une altre. Eh sì, just, tu âs reson. Nol baste. Dopo vê pensade la storie a son milante manieris di contâle. Prin di pontâ i dêts su le tastiere, al è ben pensâ a cuale che e je la maniere miôr di meti lis robis. A son tantis sieltis che a podin decretâ il suces de conte: prime o tierce persone? Regjistri informâl o liric? Colocuiâl o poetic? Meti un dialic o no metilu? Contâ dut come che al sucêt o platâ alc e dîlu a la fin? O no dîlu dal dut? A son ducj aspiets che si puedin pensâ prin di tacâ a scrivi e che magari a puedin judâ ancje a scrivi.

E ma il problema al è ancje scrivile, no sin mica scuelâts?
In ce sens? Che no sês bogns di scrivi par furlan? Ma chel nol è un probleme! Al è clâr, al è simpri biel lei une conte corete e che no vedi falopis di batidure, di grafie e dut il rest. Ma nol è un fastidi che bisugne fâsi plui di masse. Intant si scrîf! Dopo scrite a son i struments di pueste che a puedin judâ, come il coretôr o il gdbtf, si pues lei e tornâ a lei par mendâ falopis e faloputis… O a la fin, se la mandâis chi a Contecurte, al è simpri l’ostîr a corezi alc o la coghe a dâi une man, li che lui nol cumbine. Insome… intant scriveit come che cjacarais, e dopo si viodarà!

Po dopo, sarès alc altri di tignî di voli: il dî e il tasê
Metinle cussì, tant al vâl vê une bielissime idee, se dopo il letôr, puaret, nol capìs la conte e al reste come un cocâl. I elements par fâ capî la storie, ae fin, a àn di jessi. Ce che la conte e vûl comunicâ, o ce che al sucêt inte storie, o cemût che a la fin a son ladis lis robis, al è ben che un che al lei cun atenzion al rivi adore a capîlu. Al è biel tornâ a lei une conte cuant che si vûl cerçâle miôr, pluitost che cuant che no si à capît ce savôr che ‘nd à.
Ma bisugne cjalâ ancje chê altre bande dal bêç: no covente migo disi dut! Show, don’t tell, a disin i anglofons, e no si pues dâi tuart. Cui che al lei al à gust ancje di lavorâ di fantasie, di fâsi su la sô storie, lis sôs imagjins, e chest al è implen adat a lis contis curtis, dulà che lis peraulis a son contadis, e di spès bisugne limitâsi a descrizions piçulis o parziâi dai fats, par lassâ a la imagjinazion di chel che al lei il gust di jemplâ i vueits. Miôr di cussì!

E ma al è dificil!
Vere! Sì che al è dificil, ma al è ancje biel! Contâ storiis e je une robe che  e reste, e se magari no reste la storie, e reste la emozion che e à puartât, il ricuart, la sie di pensîr che e lasse. E propit par chest la sierade di une conte curte e varès di jessi alc che al lasse il pensîr libar di cori. Un finâl che nol è une didascalie, ma une puarte vierte, che però al lasse il letôr sodisfat, cence che i resti la gole. Insome… lis primis e lis ultimis riis, intune conte curte, a son une vore impuartantis e al è biel gjoldisi a scrivilis e cambialis fintremai a jessi sodisfats.
E no bisugne dismenteâ ancje une ultime robe: ancje il titul al fâs part de conte! Al è une part impuartante, ni plui ni mancul dal rest. A son titui, ogni tant, che a rivin a cambiâ dal dut il sens de conte o a zontâ un altri significât. No che al vedi di di jessi simpri cussì, ma ogni tant no je une brute robe spindi cualchi minût di plui a pensâ il “just” titul.

Speri di vêus dite vonde. Ma se nol è avonte, tai prossims dîs stait in vuaite, parcè che a rivaran une schirie di articui metûts adun de nestre Sartorie stralunade che nus contaràn propit cemût… Scrivi contis!

E cumò vie! Ducj a provâ a scrivi une biele conte curte par furlan. La Ostarie di Contecurte e je chi a spietâlis!

di Rafaêl Serafin

3 comments On Scrivi une Conte Curte

  • E vuê nus pâr propite la zornade juste par proponi – tornât a meti adun – chest articul dal ostîr, che al sarà il prin di une schirie di articui che a coventaràn par… SCRIVI CONTIS CURTIS!
    Leieit e sparniçait cence dûl!

  • Biele e interessante cheste Classe di cemût “Scrivi une Conte Curte”.
    E à dutis lis cuincis par insavorî e insiorâ une biele conte.

  • Magnifiche spiegazion par fâ capî il funzionament di contecurte, cjantonut indulâ si po sfrancjasi ben su le nestre biele lenghe. Speri si puedi lei cheste informazion ancje su facebook, jo purtrop no soi pratic di ministra l’ ordenadôr se no le varès za condividude. Lussian

Leave a Reply to Galliano Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît