[…] lezion di ART, dulà che il prof. N. S. nus spieghe e mostre une opare dal mestri Alfredo Pecile…
Nart e Juine
Nart e Juine no vevin fîs, a vivevin bessôi in chês cjasononis di une volte, cu la stale tacade e une braide grandonone ator, il lavôr, al jere tant che si voleve , e cussì a pensarin ben di cjatâ un aiût.
In paîs e viveve une puare femenute vedue di non Nine, cuntun frutin di cressi di non Gjovanin e cence nissun jutori socjâl, Juine i domandà se e jere contente di lâ a vivi cun lôr par dâ une man, e che lôr a varessin proviodût al manteniment, prometint ancje di fâ studiâ il piçul fintremai al conseguiment di une lauree a sô sielte. Nine e fasè bon acet de propueste e dut al leve ben in chê famee. Une dì Nine dopo tancj agns di bon servizi si inmalà e dopo un mês di ospedâl il bon Diu le cjolè cun se. Gjovanin si jere penis laureât, inzegnîr aereonautic cun plens vôts, e la scuele, cjalant li sôs capacitâts lu proponè par un lavôr intes Americhis. Il displasê di lassâ Juine e Nart, che aromai ju clamave mame e papà, al jere grant, ma lôr lu lassarin fâ le sô sielte se pûr cul cûr a tocs. Dopo di chê volte Nart e Juine a venderin dute le colonîe, tirant indenant i ultims agns, di rendite. Gjovanin, dopo tant timp ch’al jere in meriche, no ju veve dismenteâts e ur scriveve di spes, ma dopo jentrât in servizis segrets di fate militâr nol podè plui fâi savê nie di se; inmagjinâsi il displasê di Juine e Nart. L’Europe e jere za di cuatri agns in vuere e lis robis no levin trop ben. Disore le braide si viodevin spes a passâ avions, e tal ultim cun stemis americanis. Une dì a vioderin a passâ un bas bas, scuasit di sdrumâ le nape, e cuant al jere su la braide al butà ju une cassele. Nart al corè subit a viodi: cul colà si jere rote e ator ator e jere une sdrume di scjatulis di cjâr, spagnolets, cjocolate e milante bens di Diu. Podês dome imagjinâ le contentece dai doi vielis, e cheste robe si ripeteve ogni altri dì. Aromai chel avion lu cognossevin: al veve un numar e une letare sui flancs. Une brute dì si scuintrà cuntun avion todesc, e li a scomençarin a combatisi, fat al sta che il merecan al ve le piês, e colpît il motôr al cirì di aterâ te braide, ma al sbatè cuintri un rôl sfracassantsi. Nart e Juine a rivarin di corse vaint par salvâlu, lis flamis a vevin za cjapade le gabine, a vioderin di dongje il pilote, sul gjubin a veve scrit Jhon, e plui sot Gjovanin. Lis flamis no ju fermarin e vaint a ciririn di tirâlu fûr, ma il fâc le ve vinte su ducj trê. Chel rôl lu vevin plantât Nart e Gjovanin in chel dì che a vevin soterât le so mame. Sot di chel rôl trê crôs di len a son stadis fin pôcs agns indaûr, e il rôl inte so sdramassade al veve tornât a svilupâ i ramaçs fasintlu sameâ a une grande crôs.
Lis redinis dal destin a àn volût che le vite eterne le polsassin ducj cuatri insiemit.
di Luciano Marinig
#903
3 comments
Lasse une rispueste
Dutis lis contis
Lussian di Varian al è un dai plui grancj prudeladôrs di Contecurte e di sigure il comentadôr plui bulo e simpri presint. Lui, in ogni conte che e rive, i siei doi francs ju poie simpri. E nol podeve mancjâ di fâi il regâl ae osterie. Anzit… al pâr che al vedi voie di fâ ancje plui di un cetant che i son plasûts i dadui.
Achi nus tire fûr un toc di chei che a ingropin i buduiei, parcè che no dutis lis storiis par sei bielis a àn di lâ a finîle ben. E la matetât dal om e rive a meti dongje storiis bielissimis ancje tai periodis plui bruts. Clamade dai dadui, e je vere, ma vere o mancul che e sedi, Lussian nus regale une bielissime conte storiche e dramatiche. Regâl pe ostarie numar 15!
Lussian o pues dîti che la storie mi à comovût. Fatalitât, sfortune, clamìnle cemût co volìn. Il fat al è che la inesorabilitât dal destin ju riunì di gnûf cun cheste tragjedie.
Al à reson Gelo, “no dutis lis storiis par sei bielis a àn di lâ a finîle ben.”
Gracis Galliano , le storie e jê vere, i nons no. se cualchidun le lêi che no stedi comentâ, ma che al disi une preiere par ducj chei che son lâts sot tiere, colpe une stupide vuere. Lussian