Plantât denant da la puarte dal cjasâl, al slungje i braçs secs viers il cîl a saludâ il gnûf dì.
Al è un vecjo cu la scusse dure, temperade a ogni stagjon: cuet dal soreli di Istât e brusât dal glaç di Invier, a ’nd à viodudis tantis te sô vite; al à simpri dât dut, cence mai pleâ la schene.
Nol à nuie di ce pintîsi e nuie plui di ufrî se no la sô vecjaie.
Al è vieli, ma salvadi; da la criniere di un timp i je restât in cime dome un grum ingrispignît.
Un sghirat inceât dal lusôr, tal vignî fûr da la tane a dismatîsi lis çatis, al varès podût rimpinâsi sù convint di dâi dentri cu la ultime cocule.
Il sgrisul di une bave lu discjol dai pinsîrs.
– Cjale là jù – i cisiche, ingrampantlu tes sôs spiris – ju viodistu i nûi che a puartin nêf? A stan rivant.
Ch’a vegnin, o soi pront; no viôt la ore di gjoldi il fof tai pîts e di cucâ i lamps dal fûc a sclopetâ tal fogolâr. Se dome… se dome o rivàs a liberâmi di chest lambic che mi ponte a mieze vie, mi sintarès gaiarin tant che un fantat.
Puar vecjo cocolâr; nol pues savê che il paroncin i à impirât un toc di cjarte, sbregade di presse plui che taiade, cun sore scrit “Cjasâl in vendite” e cun dôs pineladis rossis in crôs i à segnât la sentence:“Arbul di butâ jù”.
Po, al è partît cu la Jeep.
di Maghe Olstrele
#810
6 comments On Il vecjo su la coline
E i dadui des contis no fermin di regalânus storiis, cussì come che in tancj dai nestris contecurtârs a stan fasint i regâi ae osterie. A chi un altri! E je la nestre Maghe Olstrele, che nus conte une storiute di pocjis riis, ma che in pocjis riis a rivi a lassânus une maluserie che forsit nus fâs dome ben, cuant che si trate di fâ pensâ. Curte la conte, ma tancj i significâts!
o
Orpo ce biele conte, curte ma vivarose, compliments a e Maghe Olstrele…
E po, Gelo Stellato, e son lis ideis che nus puartin il progrès, di fat al e bastat butâ cuatri dadui che son saltadis fûr une schirie di bielis contis…
L’anonim chi sore al e Maurizio Di Fant
Pingback: La Disfide dai Dadui – la cronache! | Contecurte ()