Falling skies

No soi restât fer ai timps di Marco Caco. O ai bielzà scrit di U.F.O. e di Spazi 1999. Cumò us feveli di une serie di fantasience resinte: FALLING SKIES.
I dispietâts, alts umanoits Esphens a àn invadût la Tiere e fiscât su dut. A doprin come fantarie di assalt i Skitter, mostris a vot gjambis, a ûs dai folps o dai ragns; al puest dai cjars armâts a son i Mech e i Mega-Mech (a ûs i robots dai “Anime” niponics); par svolâ i Esphens a doprin i Beamer (pensait un pôc ai “Sparvâi” dai Klingon di Star Trek ma cun parts internis biologjichis).
I umans no si rassegnin a la sconfite e a resistin. Tom Mason, ex professôr universitari di storie a Boston, al cjape in man lis armis par difindi la sô famee di trê mascjos. La sô femine Rebecca e je muarte. Al cjate un altri amôr in Ann, une femine che e fâs pratiche di midisine e e cure i ferîts. Dopo a son il ruspiôs colonel Weaver che al comande la 2e Compagnie “Massachusetts”, i “berserker” vuidâts dal galiot Pope e altris personaçs ator di lôr. Ducj chescj erois a vignaran judâts ancje di une raze di aliens nemîs dai Esphens, i Volm, sorte di umanoits cun cjâf a ûs lis copassis.
I triscj Esphens a fasin in mût di rapî cierts umans par implantâju cun dai parassîts e fâju deventâ o lôr sclâfs o adiriture dai “Skitter umans”.
Insome, un telefilm in cinc seriis: une biele storie che ti lasse cence flât. Come riferiments o podarès segnalâ doi libris di Robert Heinlein deventâts ancje films: “Fantarie dal spazi” e “Il terôr de seste lune/I purcinelârs”. E nol po mancjâ il telefilm inglês dai agns ’70 “I sorevivûts”.
Il messaç al è chest: par difindi la famee e i amîs bisugne fâsi in cuatri. No si à di rindisi mai. Bisugne amâ però ancje i diviers: Tom Mason e Ann a fasaran nassi une fie di aspiet uman ma cul DNA cambiât e cui podês dai Esphens che, stant intun prin moment sintade su dôs cjadreis, dopo si sacrificarà par salvâ la umanitât.
Us consei in maniere vivarose cheste serie dome se ûs plâs la aventure. Ma us visi: e je robe americane, cun tancj combatiments. Si sa che il public di là da la Grande Aghe al è fanatic des sclopis e cui sa nie che tra i sponsor di F.S. no sedin ancje fabrichis di armis…
LA SERIE NO JE ADATE AI FRUTINS DI MANCUL DI 14 AGNS. Masse muarts e violence: se a ‘nt fossin di mancul il telefilm al sarès perfet. E la TV no à fat une robe juste a trasmeti il dut vie pal dì.

di Checo Tam

#804

 

2 comments On Falling skies

  • Ogni tant il nestri Famei al pâr smontâ la monture di contadôr di contis e metisi intor la barete di mentore della fantasience. E no dome chê di une volte, dai bielissims telefilms dai 80, ma ancje chê di timps plui resints. E cui miôr di lui par lassâsi inmagâ di une serie televisive. A voaltris, une conte di chês dulâ che il fami nus stice .

  • Sacranon di Checo tu nus fasis cjapâ pore sôl cui nons di chestis bandes armades, par furtune che mi à fat tirâ un tic di flât la definision purcjnerars dongje le seste lune, che jo le ài pareade al purcitâr dal gno paîs cuant ch’ al diseve che un purcit raramentri al viôt dôs lunes. Compliments al Checo simpri ben documentât su le fantasiose sience, che mi pâr si puarte simpri plui dongje le veretât. Lussian

Leave a Reply to Gelo Stellato Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît