Secs ma bogns

A jerin secs e a riscjavin di tajâi la lenghe, ma a vevin un savôr bon. Bon come la frescjece dal cudumar d’Istât o come il mignestron di fasûi la sere, d’Invier, cuant che fûr al è frêt e scûr e la cjase e samee une tane. E jerin secs e lui ju mastiave planc, cuntune certe costance e cun chel voli trancuil e cence espression. Al moveve il barbuç cemût che al veve viodût fâ a une biele zovenute blancje che lui al osservave ormai di timp, che cuant che no saltuçave contente no faseve altri che mangjâ di gust.
Al veve taiât a tocuts la cjarte cun pazience, cuasit cun amôr, sedi chê des pagjinis dai gjornâi di îr e di chel altri îr, sedi (cuntun ciert sens di colpe, parcè che lui i tignive une vore a riciclâ par ben dut, ma la gole e jere stade masse) la cjarte cjandide de risme gnove di A4. Biele, blancje, vergjine, aiarose come un svual di cocâi, delicade: buinissime. Al veve metût ducj i tocuts di cjarte insiemi intune piçule tirinute, di chês dal servizi de puare agne Tine (ancje se chê tirinute li e jere la uniche sorevivude ae teribil muart par sfruçonament che i jere tocjade aes sôs sûrs, piçulis kamikaze di ceramiche che a vevin sielzût di butâsi jù des mans fuartis di lui e di lâ a murî par tiere intun colp fatâl). Al veve metût duncje i tocuts di cjarte inte tirinute plui coragjose e tacade ae vite che al veve, che cumò e jere plene di cjartutis blancjissimis e di cjartutis grisis, dutis misturadis come intun melting pot  vignût ben. Al cjalave chê piçule societât di miscliçots culturâi e di diferencis cromatichis contignude intune tirine e al pensave che al sameave che a rivavin a convivi cence masse fature, cence storiis. A ognidun il so piçul spazi, a ognidun il compit di stâi dongje a chel altri, cence comedonadis par rivâ prins e cence sperancis di deventâ cuissà ce. Intant che al jere li a cjalâ il so melting pot di cjartis, al sunâ il campanel. Lui al vè un strabalç, al pierdè la calme e al capì che a jerin vignûts di gnûf a cjolilu. Al jere stuf di disi bausiis, di fâ fente di jessi alc altri, ma ce podevial fâ? Al veve di fâsi cjatâ cence chei tocuts, che a jerin la prove de sô cundizion. O butâju vie o mangjâju. Al ste un moment fêr. Po al decidè di cjapâsi il so timp, di sentâsi, di lassâ sunâ il campanel e di tacâ a mastiâ. A saressin jentrâts distès, ma i voleve un poc di timp par butâ jù la puarte. Al veve preparât i tocuts di cjarte par un moment dal dut difarent, di gjonde, di calme, di riflession, ancje. Si cjatave cumò a mangjâju cuntun pocje di premure e un fregul di pôre ma… une vore di gust. A jerin secs e riscjavin di tajâi la lenghe, ma a vevin un savôr bon. I miedis no varessin capît. Lu clamavin mat, ma lui nol jere altri che une cjavre.

di Margarite Cogôi
#788