Une storie … fûr Comun

Dopo in ca che o lei di premis leteraris chenti ator, finalmentri mi soi decidût:
– O vuei provâ ancje jo; mal ch’e vadi, o rimet i cuatri francs de iscrizion – mi soi dit.
Fat al sta che o ài spedît une poesie a un concors a Udin. No lu vessio mai fat; pierdude la pâs in famee: dal gjenar “e lo sventurato rispose”;  nancje ch’o fos la muinie di Monze.
Difat mi soi cjatât in gare cun Rosute, la mê femine; jê la poesie le veve za mandâde e ancjemò scrite par furlan, a mi à ricuardât cun borie.
Ocjo che ta le peti – a no sparagnave di ripetimi ogni dì, che cancare.
Un lambic: le varès copâde dal gnervôs.
Sù par jù un mês dopo, mi sbelee:
– A mi, chei di Udin, mi àn mandât il certificât di partecipazion.
– Bon par te, a mi invezit, no; se al rive, bon se no compagn, no piert il sium par chel – i ai ribatût fasint fente di nuje, ma mi montave un brusighin.
Passe un altri mês e o lei sul gjornâl: “Domani sera presentazione delle poesie vincitrici, raccolte con tutte le altre in un pregiato volume”
– Lino a sintî? – o buti là a Rosute.
– Jo sigûr – mi rispuint jê – a mi mi àn mandât il biliet di invît.
– A mi no, ma no mi impuarte, o voi distes.
– Prove se tu sês bon – mi à menaçât.

Sâstu ce pôre. E difat, ognun par so cont, o sin lâts a la premiazion; jê cu la sô amie e cun tant di invît e jo cence e di bessôl.
Biel rivât – a dî il vêr un pôc sberlufît parcé che a Udin, par vie da la zone a trafic limitât, si scuegn fâ un biel pocje di strade a pîts par lâ in centri – mi soi sentât in prime file, come une autoritât.
Ogni tant, riduçânt, o cjalâvi daûr viers la femine, che si voltave di chê altre bande par no viodimi: mi pareve di jessi inta lis comichis di Ollio e Stanlio.
I vincidôrs dal concors – che no jeri jo, e lu vevi capît, ma nancje la mê femine (di bon, se no Diu nus vuardi) – a àn let lis lôr poesìis, po cui che al voleve, al podeve lâ a lei la sô, ma jo no soi lât: Rosute mi varès sfulminât denant di ducj.

Passade une ore, o ài pensât che o vevi sintût avonde e o ài saludât.
– Brâf furbo – mi à ridût la femine a cjase – tu ti sês pierdût il rinfresc.
Folc ti trai, cjapât ta chel puest il miôr. Ancje chel, dopo che za prime di lâ vie, o vevi cjapâde une freade.
La robe e je lade cussì: o ài domandât di vê une copie dal libri (“affrettarsi, tiratura limitata” o vevi let in scuindon sul invît di Rosute); in ogni concors, ch’o sepi jo,
a dan une copie ai autôrs.
E difat, une copie ma le àn dade, ma … a paiament. Dîs euros, anzit vinç, parcè che o ài paiât ancje chê di un siorut di novante agns, tant simpatic, che mi veve tacât un boton di numâr un, par no dî doi.
Nol veve un carantan in sachete, pûar on, o almancul cussì mi à dit… e pensâsi che si clamave Euro.
Se no mi fos tocjâde a mi, o stentares a crodile.

– Passade ancje cheste – i dîs a Rosute la sere tal jet.
– Sì, al è stât biel; cjarut chel libri, però – mi rispuint jê.
– Cemût, tu lu âs paiât ancje tu? Cun tant di certificât e invît? – mi scjampâve propit di ridî, ma o ài scugnût tratignîmi par salvâ il pêl.
Ah, ce sodisfazion! Che gnot o ài durmît cussì di gust che mi visarai par un pieç.

P.S. – Par dî la veretât, ta chê publicazion, la mê poesie e je scrite pardabon: mancul mâl, seno mi sarès vignût il suspiet di jessimi insumiât dute la facende.

di Maghe Olstrele

#742