Une operazion in place a Gjalarian

Jerin lis primis zornadis di Fevrâr e si sintive il frêt a jentrâ sot des ongulis des mans.
Jo o jeri un dai plui fortunâts, pal fat che jessint tant magri mê none par pôre che o cjapàs un malan, e veve disfate une maie di lane e cu la gucje mi veve fat dôs bielis manecis. Jo o jeri come un pape, lant daûr a ce che al diseve Bepo, cognossût cul sorenon di Bisteca; chest parcè cuant che tu lu cjatavis pe strade ti domandave
“Mandi Franco sâstu dîmi ce che al mangjia il éapa?” ae to rispueste lui ti diseve       …”Al mangjâ la bisteca.”
Al jere un piavot e daspò sposât al jere vignût cuc te cjase de femine.
Il cîl al jere griis e dut vualît cence un nûl e a jerin come sot une cape di plomp.
L’Inviêr, chel dì di “Joibe grasse”, al volè dâ segn di se.
Jo o stevi zuiant intal curtîl dai “Gai” cul gno amì Checo. Cuant che un sunôr di armoniche al cjapâ la nestre atenzion e e jere dut une confusion, un batiment di tambûr che al varès dismovût ancje i muarts.
Ogni tant chê legre companie si fermave e a jerin in trê parsore di une carete, un cu la armoniche insiemit a un ben passut cuntune biele bultriche e la muse rosse come il fûc. Chel che al sunave la armoniche al cjapà sù un pleron par fasi sintî miôr.
Dute le int di Gjalarian e jere invidade a viodi il spetacul teatrâl di une operazion di pendicite, e par jentrâ e bastave une ufierte libare.
Jo jeri seneôs di lâ a viodi ma o vevi dome seis agns e o varès podût lâ dome se o vevi une persone plui grande par tignîmi di voli. ’nd ai tacât a tormentâ mê sûr che plui grande, che e jere dîs agns plui di me.
Va e torne e torne ancjemò a domandâi, o jeri rivât a convincile a puartâmi cun se.
A le ore stabilide, dute la int dal paîs e jere in place.
Il palc di sene al jere un cjar poiât intor dal mûr di Vicens Ator; par dut al jere sierât cun bleons blancs. Un al tirà vie il bleon par denant, in chêl si sintî a vosâ dute la int come une vôs sole: un biel “Ooo!…” di maravee
Su chel palc al jere un jet e pognet tal jet al jere un che a faseve funzion di malât
Un altri cul camesot blanc al faseve la funzion di miedi. Il miedi si zirà viers il public e mostrant un curtissat lunc cuntune biele ponte al disè :”Cumò podin tacâ la operazion, il malât cemût isal?” i domandà al infermîr. Chel i rispuindè che bisugne dâi la induarmie.
Alore tachin, i veve ditil primari. Un al cjapè sù un grant martiel e jù une biele pache intal cjâf al malât che al cole par daûr come un muart. Culì di gnûf come prime si sint dute une confusion, e daspò dut un cidinôr di tombe, ancje jo o jeri dut cjapât e tiravi i voi a risi di svuarbâmi. L’infermîr al disè “Cumò si pues lâ indenant”
“Benon” al disè il primari “Scomencin cul fâ un tai  te panze!”
Poiât il curtis al fasè la fente di taiâ e in chel al tacà a vignî fûr sanc che al sporcjà dut il jet propit in chel ducj chei piçui o plui sensibii a jerin colâts par tiere svignûts. Culì al bisugne spesseà a sierâ lis venis se no al mûr dissanguât, al disè il primari. Cemût viodi indulà che je la pendice infete? E cussì al tacà a tirâ fûr i budiei de panze. Intant ducj chei che e jerin a viodi propit denant par jessi plui dongje a jerin ducj incantesemâts.
“La pendicite e je propite brute, bisugne taiâ un toc di intestin plui lunc par sei sigûrs di vê tirât vie dut l’intestin vuast…. Ve chi, cumò al varès di sei dut a puest. Si pues cusî e sierâ le feride.”
L’infermîr al tirà fûr une gusiele par cusì i materas e al fasè le cusidure.
Daspò il primari al disè: “Je ore di disveâ il malât”. Un infermîr al va a cioli un podin di aghe glaçade te pompe e montât sul palc al tire le aghe in muse al malât, che si alce di scat porconant e al dîs al miedi: “Veiso propite voie di fâmi murî!” Dute la int contente a bati lis mans pe operazion finide benon… Ma chei che a jerin a viodi no savevin che dôs oris prime dal spetacul il professâr al jere stât intal macel e al veve puartât vie il sanc e un biel pôcs di budiei di purcit!

di Plume di Ingjustri

#741