éic… pic… pic… uff e ce fature! O stoi strent come intun budiel chi dentri… pic… pic …o scugni pardabon crevâ cheste muraie!
Par fortune che su la ponte dal gno bec mi cjati cheste spice (par i sienziâts e je la ponte di diamant)! Mi impensi dispès che dome pôc timp indaûr chi dentri o stavi cussì comut, a larc e invezit cumò no cjati nancje un cjantonut par movi o displeâ lis mês alutis, incjastrât, comprimût e circondât di alc di dûr!
“vir vir vir”
ohh, ma inalore no soi bessôl… mi pâr di sintî vosutis come la mê! Oh cetant content che o soi, cetante gjonde, o sint i miei fradis chi ator, ju sint che mi clamin e ancje lôr a lavorin cul bec a fuarce di “pic… pic”!!! pic… pic… pic…
Cuasi cuasi il zîr al è di bot finût e uff… uff… T O C
Vive! Cuntun colp di cjavut il mûr si ‘nd à distacât e infin o soi libar di respirâ, ma… o sint che lis alutis e lis çatutis a son ancjemò inscjaipuladis… Su po sta bon, o ai di stâ cuiet e pensâ… Po ben, fuarce le ai, e cumò oh isse, sburtarai, o scugni sburtâ cu lis çatutis e, biadelore, al finirà dut!
vir… vir… vir… vir… vir… vir… vir.. vir… vir… vir… vir…
Ou fradis, ancje par voaltris e je stade une faturone, no mo vere?
Oh po ben, ancje cheste e je fate! Il mûr taront che al strenzeve ator dal gno cuarp cumò nol è plui e … oh ma ce plumis fofis e blancjis… Mamute biele o stoi une vore cjalt sot des tôs plumis! Fradis ce disêso di un vir vir vir pe nestre mame?
vir vir vir vir vir vir vir vir vir vir vir vir vir vi vir vir vir vir
Mame cesen:
Viro Viro Viro veus achi maraveosis creaturis mês. O ses prontis par jentrâ intal nestri mont di aghe tiere e cîl. Vigneitmi daûr in aghe e se us ven un tic di pôre, montâit su la mê schene, jenfri lis mes alis. O scomenzin cumò un viaç intal mont dal gno amôr par voaltris, piçui cesens miei.
di Barbara Battel
#721
4 comments On Un mont di amôr
Une biele conte che met il flok al periodi pre Pascuâl, cu lis primis covadis che viodin la lûs inte magjie di un ûf, cjaminant cussi dongjie de vite, muart, e resurezion. Lussian
Biel furlan Barbara, come simpri!
O ai un problema però:no rivi mai a capî dula che a si vote . .
Barbara, mi somee di vioditi a pichetâ l'ûf par scjampâ fûr e gabie, Bepi
de gabie … Bepi