Gjovanin

La zornade si jere presentade la matine adore cul cîl plen di nûi e dopo ricreazion al scomenzâ un grant temporâl che si viodeve dal barcon i arbui pleâsi; tons e lamps un daûr chel altri che ancje la mestre e veve fermât di fevelâ. Passade la burascje si sintive in aule dome la premure di tornâ cjase .
Ogni dí Gjovanin al tornave di scuele corint, cu la cartele picjade su la schene, une maniere di sfogâsi dopo sedi stât sentât e atent a ce che la mestre e diseve. Si tignive sul ôr de strade e cu la ombrene sierade al pestave lis urtîs in ca e in la par vie ch’a lu vevin becât i zenoi la Vierte passade. Ogni dí la mame lu spietave su la puarte di cjase e lui nol viodeve la ore di lassâsi strenzi e sintî il so profum – un profum ch’al reste par simpri, al diseve dopo vecjo. Dopo gustât, Gjovanin al veve un pâr di oris libaris e cui soi amîs a zuiavin sielzint ce che ur vignive sù in chel moment. Insomp dal ort, un grant arbul, plantât dal nono Tin cuant ch’al jere piçul, si slungjave in adalt e duçj i amîs a volevin provâ a lâ sù fin in cime par cjalâ lis cjasis e lis personis ch’a passavin dilunc la strade. Il nono Tin alore al cjoleve la scjale musse e un a la volte ju judave a cjapâsi tal prin ramaç, content come se al fos par se e confidant ch’a nol sucedi alc di penç. Tin al veve ancje fate une bancjute cu lis breis e pojade sot l’arbul, plui di dut pa la none, che i plaseve sentâsi a lei I Miserabili il dopomisdì. Gjovanin lu veve disegnât ancje a scuele zontant la bancjute e la none, ancje se la bancjute la veve disegnade dome cun doi picoi par vie che chei altris doi a jerin daûr e no si viodevin, cussí al diseve.
Ancje tal ort di Gjovanin la burascje a veve fat malans e un fulmin, smicjât la ponte dal arbul plui grant, lu veve sbregât. A viodilu cussi distirât, a Gjovanin ai vigní di vaî. “Doman ti parti a cjoli un arbulut, lu plantín chi dongie, e tu vedarâs ch’al vignarà grant e biel come chel chi” al disè il nono par consolâlu. Par une setemane di file Tin e Gjovanin si cjatarin tal dopo di misdí par liberâ l’ort dal arbul; lu tajarin a tocs par brusâ chest unviâr e sintìrin el profum dal len, la ruvidece de scusse sot lis mans, la tenerece da lis fueis sot i pîts. Si ricuardave, Tin, la zornade che so pari al veve puartât cjase l’arbul, vuluçâdis lis ladrîs tal sac dal forment e leât il tronc cul spali in rie dal cambron. Rivât, si jere fermât sot l’arie a poiâ la biciclete, al veve clamât Tin cu la scuse di judâlu a plantâ l’arbul e intant i veve insegnât a ricognossi un arbul de scusse e dal portament, cemût ch’al va plantât e a cjalâ la lune, i veve mostrât lis venis da lis fueis e l’odôr a stricjalis cu lis mans. Par sô cont, Tin al veve judât so pari a fa la buse e cu lis mans al veve zontât la tiere par paregjâ il parsore: “c’al vegni un biel lavôr, c’al pari bon” al diseve simpri so pari. E Tin alore, tignût a ment, al veve imparât l’ordin e il rispiet par dut ce che al pescjave e cussí, ogni volte che al veve l’occasion di stâ cul nevôt i pareve di insegnai dut ce ch’al veve imparât di biel.
Il gnûf arbulut i plasê subit a Gjovanin: “Chel arbul chi al è un rôl, cjale la forme des fueis devant e daûr, cjale la scusse” e Tin dopo pajât lu consegnà al piçul che lu tignive strent e dongje di se. “Viôt di no strissinâlu par tiare par no ruvinâ lis ladrîs… a van metudis sot tiare viartis e distiradis… a van bessolis viers il bas par sostignî il tronc, a san passâ jenfri i claps e ogni lidrisute e va a cirî la aghe… lis plantis a àn popolât la tiare prin dal omp… tal bosc ogni arbul al cognòs la bisugne di chel dongje, cence fevelâ…par un pocjs di zornadis bisugne bagnâlu ogni di, miôr a matine, al zontà il nono Tin.
Gjovanin al veve premure di rivâ e plantâ l’arbul e nol veve mût di comprendi dut ce che il nono al diseve, ma ancje a lui ai plaseve cjapâ in man la tiere e paregjâ, come c’ai veve insegnât el nono Tin: “c’al vegni un biel lavôr, c’al pari bon”. Ancje di grant, Gjovanin al veve cjapât a cûr la tiere e i nemâi, ai plaseve viodi il zardin in ordin e cuant ch’a si fermave a cjalâ il telegjornâl ai plaseve ancje cjareçâ il so gjat Barbarossa cun dut l’afiet che a ducj i doi i pareve di vê bisugne.
Ormai il rôl al dominave il zardin, al veve une biele ponte drete, il tronc al mostrave almancul cuarante agns e ancje i zimui di Gjovanin, cressûts, a vevin imparât a la sù fin in cime, cence pericul.
Une sere di clâr di lune Gjovanin, dongje i setante, si fermà a cjalâ il zardin, alore sielzût l’arbul plui biel e cence disi nuje a nissun, al cjapâ la scjale musse e une volte rivât in ponte, cui ricuarts a montâ l’emozion, ai vignî di strenzi il tronc come strenzi un cristian.
“Dulâ eritu” e disè la femine “ch’e tu âs i voi ros come se tu vessis vajût?” – “…devi sedi stât il polvar” al rispuindè Gjovanin, cjalantsi i pîts.
di Gaetan Cogoi
#707

3 comments On Gjovanin

  • Brâf Gaetan. Benvignût sul blog di contecurtegnove. O speri di lei a di lunc altris tôs contis.
    Nello Malisano

  • Biele conte Gaetan,cun chel biel mût che i nonos di une volte a vevin par restâ ricuardats dai nevots, metint a dimore une plante di lungje vite, e insegnant lis regulis utilis a garantî le so sopravivence doprant il necessari rispiet,valôr doprât dopo ancje su le umane convivence a garanzie di un cuiet vivi inte socide. Lussian.

  • I voi ros (e lis lacrimis in ponte des ceis)
    ju ài ancje jo cun cheste maravee di conte. Mi à someât di vivi moments dal gno om frut cun so nono. Une vore brâf e comovent Gaetan!

Leave a Reply to Anonimo Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît