“O varai di meti a puest chel maledet implant eletric parcè che, viodistu, cjâr Oglala, cuant che o sistemi i fîi a son simpri che si brusin.”
“Dute cause di chei maledets goliarts che ti àn fat il fisco in cjase…”
Al à reson il gno barbe/amion. O cjali par aiar e mi sgrisuli! Il mûr al è dut sclapât. Sclesis di mufe e pierutis e claponons a vegnin jù e lis grandis fressuris a fasin jentrâ il frêt aiar de gnot e la ploie.
“Tu varâs di clamâ Fred a sistemâ il tet!” mi dîs Oglala.
“Gno fidel amì, se o bechi chei bastardons di goliarts i fâs mangjâ la feluche! Vignî a rompi i coiars achì-cuant che jo no soi-cun chês slandronis e lâ a movi pardut e… aaaaaaaaaarrrrrrrrrggggghhhhhhhh!!!”
So o ai fat che sberlade al è un parcè: i universitaris di mierde si son divertîts a scoltâ il gno ‘Spleen And Ideal’ dai grancj Dead Can Dance e a àn rot il disc in trê tocs-dico trê…se ju bechi i mangji la coradele!
“Propit ‘Spleen And Ideal’ vevino di lâ a sintî?” mi domande Oglala.
“Lôr?” i replichi. “Chei a varan pensât che e sedi musiche rep o musiche par fumâts…”
Nol è nie di fâ. La mê cjamare e fâs schifo. Il party al è stât come un atac stîl ‘Salvate il soldato Ryan’: butiliis rotis e discs preziôs ducj crevâts e cjichis pardut, parfin sul gno costosissim Hamadan che mi jeri fat rivâ dal gno amì e parint persian, sô magnificentiae ayatollah Kha-Tami.
“Cjale ca, Orgnan” mi vise barbe Oglala. “Dentri dal fîl dal implant eletric e je come une… no rivi a spiegâ…”
“Fâs viodi… uhm, nooo… nol è pussibil!”
Al è cussì che al scomence dut. Dentri dal tubo di plastiche dal implant eletric che barbe Yanosh al veve cussì ben inmaniât o viodìn un micro-taulin dut sporc di sanc e cuatri figuris che a mangjin cjar e sanc e un di chescj al à la massele cuadrade e al è il capo; e chel altri dongje di lui al à i cuars e il tierç al somee une gruesse raze cu la bocje plene di sarpints e il cuart al è cence un vêr aspiet e…
“O sint il mal” mi fâs Oglala. “Nol è pussibil che ta chest tubo al sedi un mont, dut un mont che no vevi mai imagjinât che al esistès e… FFFFFFFFFFFFFFRRRRRRRRRRRRRR!!!!!!!!!
“No, Oglala, dulà sêstu lât? Oglala! Oglalaaaaaaaa!!!!!!!!!”
Orôr dai orôrs! Il gno amion supat dal tubo dal implant eletric! Barbe Yanosh, ce scherç mi âstu fat?
“No je cause di Yanosh.”
“Cui aial fevelât?”
“O soi jo dentri di chel che tu mi clamis tubo, jo Caacrinolaas, il mangjadôr di sanc!!!!!!”
FFFFFFFFFFFFFFFFFRRRRRRRRRRRRRRRRRRRR!!!!!!!!!
Un grant vortex mi à cjapât e o soi… dulà soio? Dulà soio? Dulà soio? Oglala!!!
“Ah ah ah ah ah!!!!!” e fâs une vôs che no je chê di Oglala.
No! O soi stât tirât dentri tal mont dal tubo e ancje jo o ai cumò la stesse taie dai sbilfons che a stan mangjant cjar dongje di un taulin sanganât.
“Ah ah ah ah ah ah ah!!!!!!!!”
“Oh hoho oaoah ah aha!!!!”
“Uhe uhe uhe uhe uhe!!!”
“Kkkkkhssssss kkkkkkkkshhhhh!!”
“Permet che mi presenti: jo o soi Caacrinolaas di Zepon e o comandi 60 legjons. O soi il capo!”
Chest mi dîs Mr. Massele Cuadrade. Al à un gjilet di piel e dute une schirie di pistolis di vuere intor.
“Jo invezit o soi Cornua di Zepon e o comandi 30 legjons” mi dîs il tipo cui cuars. Al à propit i cuars di bec!
“Jouuu soiuuuh Tooobehmeee uuhhhh ouuuhhh uhe uhe uhe” mi barbote il grues razat e mi sgrisuli cuant che de sô bocjate a vegnin fûr tancj sarpints zâi che a samein, plui che a sarpints, a taiadei di paste fats in cjase.
“Jo o soi il vint salvadi che cun mil refui al jentre te tô dimore…” mi dîs il cuart element che al cambie forme di continui e o podìn incuadrâlu come un nûl. “Clamimi Uxmal!”
“Ce vêso fat dal gno amion di infantiÆ e braç diestri Oglala?”
“Cjale li dulà che al è! Viodistu chel sarcofac in plexiglass? Lu vin hibernât alì pal moment!”
A à fevelât Caacrinolaas. E je vere, il bon amì al è biel indurmidît tun cilindri si simil-veri e…
“E lu mangjarìn tal nestri proxim fiestin, peraule di Cornua di Zepon! Aah ah ah ah ah ah!”
(mi lei tal pinsîrs)
“……Aoooh auuuu ah ah ah ah…” ducj i mostris orents a ridin come mats, pregustant il fiestin a base di cjar e sanc dal gno bon amì! Jo, Orgnan di Silviculis, o ai di salvâ il gno amì presonîr e no dome lui ma la Tiere e dute la umanitât. Vuai se i cuatri diaui a vessin di vignî fûr dal tubo: la Tiere e sarès pierdude!!!!!
di Checo Tam
#660
6 coments On Random
Amîs, achì nol è nome Libano Oro, al è ancje un butilion di Clinton, magari dongje un biel plat di muset e broade e cuatri bielis sclesis di Latarie di dôi agns cu la polente rustide (e une taçe di Fernet).
Checo, se fos inmò la incuisizion, ti varessin rustît par eresie cerebrâl.
Mandi
Maraveose che ment rivà materializa in conte par vies travierses
problemis di tal gjenar,cu le abilitat di
modelale e dai figure juste come fier in bore sul incuin,cence zonta le variazion grafiche a puarta novitat.Compliments al Checo
jacus,tu sès vecjo!!bràf CHECO!!!!
jacus,tu sès vecjo!!bràf CHECO!!!!
BIEL AL DISEGNO!
Pingback: Nekronomikon! | Contecurte ()