Animis vivis

A Rem, di cuant che al jere partît, i plaseve tornâ ogni an des sôs bandis, cuant che la fumate, il frêt, la nêf o la ploie a fasevin di parons. Al rivave tal so paîs d’Invier e si lu viodeve ogni dì, torzeonâ par chês monts e par chei plans che di frut al cognosseve come lis sôs sachetis.
Nol saveve nancje lui parcè che al tornave in chês campagnis cence colôrs, in chê tiere cussì dure e frede. La stesse che fin di frut i pleave la schene. Di sigûr, al tornave te sô panze, lûc di sanc, di fadie e di pan, parcè che lì a jerin soteradis lis sôs lidrîs, smenteadis cul passâ dai agns, dai carnevâi che van e che vegnin come lis stagjons.
In chê dì la fumate e jere tant penze che dulintor nol jere sterp, arbul che nol fos stât glotût in chel grisôr. Parfin i ucieluçs di chê stagjon, che ogni tant si viodevin saltuçâ fra lis cjarandis, cui sa, indulà che si jerin platâts.
E in chel mont cussì spetrâl, Rem, al lave indenant cence savê indulâ che al jere diret. Al cjiaminave, cjaminave e dut intun moment al viodè che cualchidun al jere diret de sô bande. Dal so vistît al pareve un sorestan. Elegant: golarine e cun tant di cjapiel.
Man man che si vicinave i pareve dut puar so pari, vistût cu la stesse mude che lu vevin vistût la zornade dal so funerâl. Si al jere propit lui, ma par tant che al jere spedît i passà denant cence dî une peraule.
O miôr fevelant di bessôl, ma intune lenghe che Rem nol podeve capî. Intant, no tant lontan, si faseve indenant cu la cuarde inte man, Guerino. I siei voi di frut, come in vite, a jerin ridints ancje se ancjemò fûr dal cjâf come in che dì che si jere picjât.
E vele là ancje Anute, sô agne, muarte di un pieç ancjemò fantate, cun tal braç il fradi di Rem, muart a pene nassût.
Che sfilze di cristians lâts par simpri a durmî sù là culine no veve fin. E velu là, “Simpri in Plene”, cussì lu clamavin intal paîs pes sôs epichis cjochis. Infin, no podeve mancjâ, la ombre di Mirco, chel partigjan fusilât su la mont dai todescs il dì di San Marc, un an prime che e finissi la vuere.
Chê schirie di animis claris, in tante bonace, une daûr che altre, al pareve che a vessin riscjaldât ogni robe, tant che la fumate si jere sraride.
Il frêt in tai pîts e tes mans a Rem i jere passât. Ancje chê lorgne che al veve a buinore si jere disfate cul soreli aromai alt a misdì. Chês animis buinis, i vevin lassade tal cûr tante sperance. La stesse che Mirco al veve sot di chê rosse cjamese denant dal ploton in chê dì che lu àn fusilât.
di Nello Malisano
#655

6 comments On Animis vivis

  • Biele le trame a davuelzi le storie,cu le pene di Nelo a cjamasi di glorie. Lussian

  • Mandi Nello,
    La che si nas ogni jerbe e pas, par chel Rem al tornave ogni an. Al tornave tai antîcs cidinôrs, tindint ogni volte la uldide par sinti i vecjos pas di chei che a jerin partîts cence mai lâ vie. Cui sa che forsit chel vencjâr sec e solitari nol tornedi a butulâ gnovis flôrs al so passaç.
    E je une conte juste par nô emigrants che ogni tant o tornin a cirì lis nestris vecjis lidrîs.

  • Nelo, va ben ch'o sin te epoche de realtât virtuâl, ma o pues dîti ch'a mi capite ancje ca vie, tal forest, di pensâ e viodi chês animis ch'a balìghin pal gno pais come ch'al fos cumò. Il Biti, Bepo il çuèt, Vigje vuarbe, Toni damigjane, Vani dispierdût te ultime vuere. Ducj cu la lôr storie e a mi somee di viodiju te ostarie a porconâ cu lis cjartis in man al prin sbalio dal compagn, a fâ 'sisin pe strade blancje cu lis cotulis lungjis che tant no si viodeve al moment, ancje se restave la magle tal polvar, o ben a partî e no tornâ mai plui… pinsîrs di vecjos.. Bepi

  • Biele conte Nelo; mi pâr che Lussian, Galliano e Bepi e àn dit dut che jo no savarès zontâ di altri. Dut câs o pensi che o tu âs une buine memorie o ni vore di fantasie. Ben dopradis dutis dôs.
    Mandi

  • Lussian, Galliano,Bepi, Pauli, i amîs che simpri e cun tant plasè o cjati ta ostarie. I amîs che o soi sigûr che simpri e àn la gjenerositât e la pazience di lei les mês contis e di dimi brâf ancje cuant che no mal mereti. Ûs dîS gracie di cûr pai vuestri preseaments. Ordenait un butilion, e se il l'ostîr al pan fresc e un bob salam ordenait ancje chei. O pai jo. Cussì a mangjin e bevin insiemi inte ostarie di Contecurte in onôr de nestre amicizie. E se ven Barbara, magari fasin une biele cjantade ancje cun jê.

  • biele la vision de fumate che si sfante in grassie dal sintiment che lis animis de int cjare a Rem i àn regalât cun l'incuintri. Leiti, Nello, nus puarte emozions e cussì Rem, Anute, Mirco, Guerino e "Simpri in Plene" a son deventâts ancje "nestris"

Leave a Reply to Galliano Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît