Il re dai simiots

Une dì Hanuman, il re dai simiots, al torne tal so ream dopo di vê viazât pal mont e vê cognossût tieris e creaturis: al à decidût che al sarès biel puartâi al so popul la civiltât. Si vise che i simiots, cuant che a mangjin, si impastrocjin simpri dut il music, puartant lis bocjadis ai lavris cuasi cun patafs; e alore al fâs une scudiele e une sedon doprant un cocul e len di bambù, e dopo al jude ducj a fâsi un assortiment compagn.
Par celebrâ la gnove a decidin di fâ fieste, e a tirin dongje bananis e mangos e dut ce che la jungle ur regale; e ve che il macaco, par mateâ, al tache a fâ un massedot cun ce che al à tal plat, e al tire balutis doprant la sedon come se e fos une catapulte. Tal zîr di un minût al è il disio: i simiots a son strafonts di porcarie, cui pêi tacadiçs, e ce che a ridin!
Hanuman ur vose ma si dîs che nol è di pratindi, e che si pues, ogni tant, vê il moment dal mat, ma che al è il so compit chel di insegnâur, un pôc a la volte, il mût che si à di vivi. Si è fat puartâ, di cierts marcjadants, vistîts di sede; che nol par bon lâ ator mostrant il cûl a ducj. E a son vistîts ros e vistîts celescj, cussì ognidun al pues sielzi il colôr. E rive subit ore di cene. I simiots, chei birbants, no durin tant e ve che a tornin a lançâsi il mangjâ come la dì prime, chei vistûts di ros cuintri di chei vistûts di celest. Ce balfuerie! A ridin, a ridin, ma la bertuce, a fuarce di ridi, e cole dal arbul e i scjampe ancje cualchi lagrimute. Hanuman al decît che lis buinis usancis no son pai siei sudits: «Miôr se o tornìn al stât di nature, cuant che ducj si viveve in armonie» al proclame a plene vôs. La dì dopo, a son crots l’orangutan, il langur, il gorile. Ma cualchidun, invezite, nol à capît, parcè che aromai no si vise plui di ce che al vûl dî stât di nature, e si è sbaliât e si è vistût di fueis; e a cene chei crots e chei vistûts di fueis a si barufin e a si fasin bataie. E chest viaç a son plui chei che a vain di chei che a ridin. Insome Hanuman, cumò, al è propit pintût, e al pense: “ancje se il simiot si vistìs di fieste, simiot al jere e simiot al reste”.

di Pablo Gortan

3 coments On Il re dai simiots

  • Trope veretat che al à chel ditt, che la vite ae un cas,se pensin al pasat dai nestris vielis prin di deventa gjenitors.Biele storie,le ai lete ancjemo,su contis di famee?.Lussian

  • Chel pantan ch'al conte Aldo a mi fâs vignî iniment ce ch'a mi contave me barbe Nelo, ch'al veve fate la vuere di Grecie e pasant te stazion di Cettigne in Montenegro cu la tradote ch'a lu puartave al front si domandave: " Cemût fasevial a vignî a morosâ fin ca vie cu la regjine Eline il nestri re Vitorio Emanuel III, piçul come ch'al ere, cence restâ soterât tal pantan". Ancje Nelo al è tornât vîf par contâle. Bepi

  • Pingback: Contecurte Day – Un struc | Contecurte ()

Leave a Reply to Anonimo Cancel reply

This site uses Akismet to reduce spam. Learn how your comment data is processed.

Pît di pagjine dal sît