Biel il mût di procedi ma masse tiarmins 'a scugnin vignî riviodûts. (Ostêr, 'o vin di ce cridâ!)
Starlup di croniche
Da pe dal gno paîs, dulà che la glerie dal flum si slargje su dute la valade, dal prin rai di soreli fin al ultin, si cjate a oris pontadis ducj i cjans de vile cui lôrs parons lant e vignint pai trois segnâts da odôrs che pai cjans a san di cuissà ce notiziis di croniche locâl e che pai parons, simpri di presse par lâ a vore o di lâ a durmî no an timp da preseâ.
Ma le glerie, da simpri e servìs da cjamp sportîf, da teren sociâl, par dâsi le pueste o leâ cognossince e no dome da comut comunâl come che cierte int a use dî.
Dal gno barcon mi plâs cjalâ i parons che fenzìn di nuie tant che i cjans si nulin il cûl. Al risulte spes che se i cjans s’intindin, i parons a fasin compagn, no tal nulî ma se nol nas un idili par lâ di viole a laràn almancul a spas insiemi ancje se a voltis a no va simpri cussì.
Un grum di storiis di cjans a àn fat il zîr dal paîs ma chê de Line De Ombrene forsit e fasarà il zîr dal Friûl.
Ven a stâi che e leve ator tignint di une bande le cjice e di chê altre le ombrene. A pene che un cjan si svicinave e tacave a zirevoltâ le ombrene par spaurî l’ardît sbregotâ dal bulo e se nol bastave magari ancje a dai cualchi pache par po biacemai scusâsi o cavilâsi cul so paron.
Se no veve chê di fâ cjapâ le cjice, parcè le puartavie fûr se e jere in calôr? I disevin.
Jê e taiave curt disint che veve il dirit di sielzi il cjan pe so cjane e vonde.
Ma une dì, il colp di ombrene si jere fermât pal aiar parcè che…
– Parcè cê? Vevial forsit domandât chel om cjalantle cuntune bocje da ridi.
No, Il so cjan nol veve podût ma lui, le sere stesse al jere lât fûr cun jê e si ju veve viodûts fâ e disfâ ducj i trois e lis cisis prime di cjatâsi a cjase di jê di là de glerie.
Le storie e varès podût finî come intun cine, lui al jentrave e pôc dopo le lûs de cjamare si studave e buine gnot, ducj a durmî.
Ma tal indoman si e savût che la cjice de Line no veve volût lassâ jentrâ chel om e forsit par no suiâ cualchi colp a veve fat le ombrene a tocs.
Vevie capît che jê e veve il dirit di sielzi l’om cussì come che le sô parone e veve il dirit di sielzi il cjan?
Mah!
Il cjan mi puarte il sguinçâl cun tune bocje da mone e ne code da ridi. Aial di vê nulît alc tal miei pinsîrs?
di Jaio Furlanâr
#571
6 comments
Lasse une rispueste
Dutis lis contis
Come simpri Yaio tu âs il maneç dai sintiments umans e no dome.
Biele, si le lei cun bocje di ridi.
Lis necessitats umanis o cjaninis che sedin, a an di cori il stess pass. Brave la cjice a distrugi le arme dal veto, ombrene o baston che fossi stade.Une conte ben imbastide e tiessude, tant leade ai timps corint.Lussian
Jaio, par me cont la siore cu la ombrene a cjapât in peraule il Pape, e si è metude a assisti il puar om vicin, trascurant la cjice… Bepi
Jaio nol mancje mai di scandaiâ l'anim di nô umans e cheste volte ancje che di un Cice. Brâf.
Nello Malisano
Çice
cjice 😉