La fantasience ch’a devente veretât. Ai 14 di Març di chest an e je partide de rampe di Bajkonur in Russie, une navisele spaziâl robotiche, ven a stâi cence cristians parsore, cul fin di viodi se a son olmis di vite, ancje passade, e se l’om al podarès vivi al dì di vuê sul planet Mart. E je lade vie di sburide a une velocitât di 95 mil chilometris a l’ore, e e metarà siet mês par jentrâ in orbite dal planet daspò vê fats 496 milions di chilometris. Une volte rivade là vie e scomençarà a fâ fotografiis une vore precisis par cirî gas e formis di vite biologjiche, daspò e mandarà jù sul planet un modul, clamât Schiapparelli in onôr dal nestri grant astronom dal 1800 cognossût in dut il mont pai siei studis sul planet Mart, al fin di misurâ l’atmosfere e il clime propit su la scusse. A ‘nde un grum di tecnologjie taliane doprade in cheste mission, e par zonte ancje la vuide e je sot la responsabilitât di talians de Agjenzie Spaziâl Taliane. Une seconde mission, programade pal 2018, a puartarà parsore un tratorut, il Rover, ch’al podarà cori sù e jù e sbusâ la scusse fin a dôi metris a font cuntun foradorut fât in Italie, par cjapâ sù materiâl di analizâ in Tiere.
In zonte al foradôr a ‘nde altris argagns di marcje taliane ven a stai:
DREAMS, a son sensôrs pes misuris dal clime, come pression, temperadure, umiditât, velocitât dal aiar, e vie discorint, fat dal INAF dal osservatori di Napoli
AMELIA, modei par misurâ l’atmosfere biel dilunc de calade sul planet, par cure dal CISAS de Universitât di Padue.
MA_MISS, spettrometri metût dentri tal foradôr par capî il davuelzi de gjeologjie sot la scusse, fat dal INAF/IAP e Finmeccanica.
INRRI, micro rifletôr laser di doprâ pe rivade dal Rover sul planet, par cure di INAF/LNF di Frascati.
Insiemi cui talians àn lavorât e a lavorin ancje, spagnûi, todescs, danês e sienziâts di altris nazions de Agjenzie Spaziâl Europeane.
Par siet mês nissun al fevelarà plui di EXOMARS fintremai ch’a no sarà rivade a destinazion, e biel ch’a si slontane je a sintarà simpri di mancul il vosarili dai pulinârs TV sul referendum, lis votazions aministrativis, i scandui dai foradôrs di petroli, e no vignarà a savê nuie nancje s’a vierzaran une indagjin ancje su di jê. No us vegnie voie di jessi là parsore ancje a voaltris, come ch’a mi ven a
mi?
mi?
di Bepi Zefon
16 comments On Exomars – a cirî marzians
Bepi prepare une navisele ancje tu. Fale, ma no tant grande. Baste il puest par une damigjane e cualchi salam. Daspò che non coredi cun tante sburide che mi zire il cjâf. Vulintîr o ven cun te, lontan dai gjornâi soredut bausârs, e di chei politicants che us mangjin ancje la anime. Tu sês brâf e no dome tal scrivi, ma ancje pes tôs cognossincis. Si viôt che tu vegnis de scuele di Adriano Olivetti. Dismenteavi, in zonte e puartin ancje Lussian come sienziât di seconde. Il prin tu sêstu. Jo o lavarai lis tacis e o jemplarai li butiliis e magari une conte spaziâl pai contecurtars.
Nello Malisano
Bepi, e se la sonde Exomars a rivàs a cjatâ i Marzians e lôr a fossin seneôs di cognossi chê int sporcacjone che e va a butâ refudons di lamiere in cjase lôr? E se ur zirassin lis balis e nus tornassin indaûr il bussulot cuntune bombe atomiche di cualchi milion di megatons? Jo no larès a cirî fastidis in cjase di forescj.
Miôr stâ cu lis disgraciis che o vin, cence cirint di altris.
Mandi
Bepi ,Nelo, ce vulintir vignaress in chel viaç cun voaltris,pur di vuari che sovoltasion di stomi che ogni dì su cheste croste terestre e sint a cresi dentri di me.Pauli no crot che nus butin indaur il busolot che vin butat su,ansit cuant e viodin le nastre tecnologjie "made in Itali" ancjemò restade, par furtune,e vignaran a cjolnus cun tapets slungjats.Biele la conte ancje par fa cresi il bagai des cognosincis. Lussian
Lussian, Nelo in zonte a le damigjane e cualchi salam jo a puartarês ancje cualchi rasiç di merlot e di friulano (no si pues dî plui tocai) e un sacut di grignei di blave di Mortean, ch'a no si sa mai che a cressi ancje la vie. E po Nelo no sta butâti ju cussì, jo a no ti lassarès mai lavâ la masarie di bessôl. Là sù a covente int pratiche e no dome sienziâts..ce disêso, vino di scomençâ a preparâ la mission? Bepi
Pauli, di che mont al è mont, l'om al è stât simpri curiôs di cognossi alc di gnûf cence nancje savê parcè. Pense dome a Ulis che prin di tornâ a cjase al à zirât in lunc e in larc, e Marco Polo ch'al è partît par lâ in Cine cence savè a ce fâ, e po dopo a Cristoful Colomp lât a rompi i marons ai Piels rosse crodint di lâ in Indie e a ju à clamâts indians. Magari cussì no, lis disgraciis a vegnin di bessolis ancje s'a no tu vâs a cirîlis, o pensi a la "bombe anagrafiche" ch'a je piês de atomiche; cuant che o levi a scuele la mestre a diseve ch'a jerin 1 miliart e 3 tal mont e vuê a sin bielzà a 7 miliarts e mieç in mancul di setante agns. E alore a no mi maravei se al è cualchidun ch'al pense di lâ a cirî fortune di altris bandis. Mandi Pauli, Bepi
Bepi, prin di dut mi congratuli cun te pe tô cognossince, jo cuant che o cjali cul nâs par aiar il cîl o rivi a viodi la lune e lis stelis dome se la gnot a je serene, pal rest e je dute scuretât.
Mi plâs la idee de navisele, o vignarès vulintîr, o viôt che pal vin e pai salams bielzà o sin a puest, alore jo mi ufrîs di puartâ la armoniche, cussì o podaressin jemplâ chel mont scognossût cu lis nestris bielis e cjaris vilotis. "Su le plui alte cime… al jeve il soreli a buinore".
O spieti inzornaments.
Maman
Bepi, fasìn fente che a nus lassin ancje tocjâ tiere, pardon Marte, e che a sedin ancje contents di viodinus. Forsit a nus lassaressin ancje plantâ blave e vierzi pizariis, ma no tardaressin a inacuarzisi che dopo un pôc i ciraressin di metial tal flombar ancje a lôr. Prin o dopo cualchi astronaute a si butarès in politiche e al cirarès di fa lavorâ i Marzians par lui.
No pues pensâ a ce mût che a podaressin svindicâsi.
O resti da la mê idee.
P.S.- I timps di Marc Polo e di Cristoful Colomp e son cambiats; cumò la int e je une vore plui carogne, tacant dai politics.
Mandi
Galliano, viôt ch'a no ai inventât nuie, a mi ten dome inzornât su di un cantin ch'a mi plâs un grum, ma mi fâs une vore plasè il to preseament. Cun Nelo e Lussian a ti din il benvignût te clape de navisele cu la to armoniche, sperant ch'a sedi di chês a bocje ch'a pese di mancul; a mi a mi plâs un grum cjantâ vilotis.
p.s. bisugne stâ une vore atents al pês par no gjavai puest al salam e la damigjane.
Bepi
Pauli, soi di acuardi cun te ch'a no bisugne lassâ partî nissun politic o piês ancjemò cualchi financîr o banchîr, e al è ben par chel che cu la clape di Nelo, Lussian e Galliano ch'al è pene zontât, o pensìn di rivâ prin di ducj e meti su une frascje ch'a fasi scuele, simpri sperant che i marzians, s'a 'nde, a no sedin piês di noaltris. Tornant a Cristoful Colomp, saran ancje stâts altris timps ma 'ndan cumbinadis piês di chei di cumò, prove a domandai a Galliano. Pauli a tu sês ancjemò in timp par zontâti cun noaltris su la navisele. Mandi di cûr, Bepi
Bepi, se us reste un puest, vignarài a faus compagnie. Jo no ai vins di cualitât e no soi un intindidôr in materie. Però o sai ricognossi cence sbaliâ se al è blanc o neri, specie se e je avonde lûs. Dut câs o pues puartâ i miei biscots, lis rosis dal desert, che a mi vegnin ni vore ben. Domande a Lussian, a Nelo e a Rafaêl (l'ostîr), che àn vût mût di cercjâju e che ju àn preseâts. Po dopo i podarès meti la antene su la navisele, par podè viodi Telefriuli dulinvie dal viaç, che al è lunc.
Ancjemò une robe, ce costie il parcament a Baikonur? Viodût che i varessin di stâ vie par un biel pôc, no volarès vendi la cjase nome par chel.
Mandi
Pauli, soi sigûr che Nelo, Galliano e Lussian a ti dan il ben acet insiemi cun me te navisele. Puarte ce ch'a ti pâr, baste ch'a no pesi masse, ancje parcè che par sparagnâ il parcament a Bajkonur, Nelo al pense di fâle a pîts, aromai lui al è alenât a fâ il Camino di Santiago e al cirarà di convincinus ducj. Mi racomandi nome di no dismenteâ le antene di Telefriuli. Mi ven dome un dubi: ch'a sedi une navisele o ben l'arcje di Noè? Mandi ancjemò, Bepi
Dal cjamp di Cjampfuarmit
e partì la navisele,
di zâl e blu vernisade
si le viodeve propri biele.
Su la spice une bandiere
cu l’acuile patriarchine,
nus varès menâts sigûr
su adalt in cime in cime.
A l’astronâf le fassave
in biele mostre un strisson,
al diseve “Vive vive,
Contecurte in altris monts”.
L’ecuipaç ben petenât
si formà par partî.
Bepi espert nus puartarà
pe “Vie dal lat” e altris viis.
Nello, sorestant dal camarin,
cjo, al puartà salam e vin!
Pauli nus fevelà di biscots,
Ju imbombarin intun bon Merlot.
Lussian al pense co sarìn ricevûts
cun tapets slungjâts,
al vûl scjampâ di chest mont
par dî la veretât.
E l’armoniche di Galliano
Do, re, mi, do, re sol, fa
e sunarà cualchi vilote
cirint di fâju intonâ.
A pensarin di no puartâ
cun lôr la pueme,
a àn dit!, co sarìn là
di sigûr si cumbinarà.
Rivâts al zero inte conte
si partì cun dute pompe.
L’Ostîr e la sô compagnie
nus saludavin cun ligrie.
Galliano, ancje poete cun tant di rime! A tu âs scrit un coment ch'al meretave di jessi une conte di bessole, cuissà se cualchidun al rive a metile in musiche. A sarès ume vilote moderne: "I furlans ch'a deventin marzians". A si pues capî ch'a 'nde un grum di noaltris ch'an voie di scjampâ vie di chest mont… un compliment une vore sincîr, Mandi Galliano, Bepi
Ah ah ah ah, biele idee Galian! O podarès provâ a metile in musiche ma il metragjo iregolâr mi pués obleâ a gambiâ alc… Ce ditu?
Yaio,
Al sarès un plasè e un onôr se tu rivassis a fâ alc cun lis mês rimis. O sai che la musiche e à lis sôs regulis, di fat: jê e je ordin tal spazi. Regole lis rimis cemût che ti ven ben.
Un salût.
Galiano, jo intant la impari a memorie