E son dutis veduis e a van a messe ogni matine. No tant par fede cuant che la scuse e je buine par cjatâsi e fâ une peçotade.
Di fat, fûr de glesie, e fasin tape intal bar dal Gobo e li po e tache la liende.
“Savêso che Luigjina e je plene!”, e fâs Vigje dai Faris, sotvôs.
“Cuale Luigjina?”, domande Tonie la Ruvignate.
“Luigjina dai Bintars”, interven Mariane di Bertin, “Che Luigjina dai Moros e je sterpe!”
“Ma sêstu sigure?”, vûl savê Catine la Vidule.
“Mi pâr che e à une panzute…!” e dîs Vigje dai Faris.
“E cui ise il pari?” domandin insiemi Tonie, Mariane e Catine.
“No si sa di sigûr, ma forsit al è che biel zovin riçot che al è vignût a vore li di Checo dal For”, e fâs Vigje, dute contente di jessi la prime a pandi la novitât.
“Ma cemût lu sâstu?” domande Mariane di Bertin.
«Lu ai viodût plui di une volte vignî fûr dal curtîl dai Bintars, di gnot”. Rispuint Vigje dai Faris.
Par un moment lis babis e tasin, mastiant par dentri la novitât.
Chestis babis e son cussì a cognossince dai fats dal paîs, che dispès e san lis robis prin ancjemò che a sucedin.
Cussì doman lu savarà dut il paîs. E lu savarà ancje Luigjina dai Bintars, che e je plene cence savê di jessilu.
Se daspò i domandais a la int di Luvignà di Sot ce che e fâs di mistîr Vigje dai Faris, us rispuindaran ducj:
«E fâs la Digei a Radio Peçot Internescional! ».
di Pauli Jacus (IV3IAN)
#537
9 comments On Radio Peçot Internescional
Cualchidun al à scrit "Se i va ben al và a messe e se no al và tal bar" Cualchidun altri al dîs che tant che le none a và a preâ il nono al và a bevi il so tai? s'al é mâl jo no sai ma une conte come cheste nus fâs pensâ che forsit il Friûl di îr si pués inmó gustâ al dí di vuê. Ma sino dacuardi di crodi che ce ch'al é vecjo al é miôr che ce ch'al é gnûf? Su chest, o crôt che a puedaressin vignî fûr un frac di altris contis su lis babis e cuintri lis babis.
Jaio
A è propite vere Pauli, une volte e ancje vue se tu as voie di savè i tiei fats personai tu as di la a scolta le place.Lussian
Pauli, soi curiôs di savê se Luigjina dai Bintars e je plene pardabon, "a sua insaputa". Tenmi informât
Bepi
Bepi, cuant che o cjati Vigje dai Faris, i domandi se a viôt cressi ancjemò la panze di Luigjina dai Bintars o se e je simpri compagne. Tecnichementri a si clamarès: "Gravidanza sospesa"
Mandi
P.S.- Par lis ultimis sul câs sintonizaitsi su Radio Peçot Internescional sui 98,72 MHz
Scusait, ma si no rivais a sintonizâ la radio su cheste stazion, fasêt un scjampon a Luvignà di Sot, tal Bar dal Gobo, aes 8 e mieze di matine (ogni dì), e o podarês sintî Vigje dai Faris in direte.
Mandi
(Bepi o ripet la rispueste che o ti vevi dât prin dal me coment di chi sore, che al jere publicât è cumò al è sparît).
——————————
Bepi, cuant che o viôt Vigje dai Faris, i domandi se la panze di Luigjina dai Bintars a cres ancjemò o pûr e je simpri compagne. In chest câs si tratarès di "Gravidanza sospesa", che a sucêt da râr ma e je tecnichementri pussibil.
Dut câs, al è pussibil savê lis ultimis sul fat, sintonizantsi su Radio Peçot Internescional a 89,72 MHz.
Mandi
Pieri pierçul cal fas il nissete al à clarit dut,Intant il zovenot cui cjavei riçots cal lave e tornave tal curtil di Vigjiute al fas il purcitar,e si cjatave là par da ordins che doman si purcite,e le panse di Vigjiute nol jere nialtri che une bafe di ardiel platade par umilia i crostui a carnaval. dut cas Vigjie dai faris par no vele pierdude e cambie version, zontant"us vevi dite jo che jere une lare".Ancje il plevan al trai bon rispir, le veve confessade cuatri mes prime. Lussian
Leint la conte e i coments o ai fatis dôs ridadis di gust, ch'a mi àn tirât sù il morâl ch'al jere une vore bas par vie de ploie ch'a ven ju che diu la mande.. Bepi
A coresion dal gno insert.No nissete, ma bensì MISSETE.Mandi Bepi al pluf ancje ca, e ven ju che Diu le mande a seles. stami ben, Lussian