Mandi Paolo…

Si vîf, si fasin robis, si va indevant, e si sa, al capite che cualchidun al vegni a mancjâ, e cualchi volte tu âs cuasi il timp di preparâti.
Cualchi volte no, come in chest câs, parcè che al è masse adore e no tu te spietis.
Contecurte, se e je inmò chi, a contâus storiis, se e je vignude sù come che e je vignude, al è ancje par merit di Paolo Roiat, che nus à saludâts ducj l’altri îr, di bot, par chês disgraciis che a sucedin di bot, cul destin, e o sin restâts ducj cence peraulis.
O vin cjatade cheste fotografie, viere, fate ai timps dal prin vagon, chês seradis bielissimis, tal sô curtîl a Remanzâs, e dopo cjase sô, a bevi e mangjâ alc.
Nus plâs visasal cussì, parcè che al jere pardabon cussì che al jere, un di chei che pronts a dâ, a regalâ, a tirâ fûr il miôr di chei che i stan ator. Al jere une vore dificil, cun lui, jessi malcontents o sustâts. Ostîr e Famei si son cjatâts propit in gracie dal vagon, o vin scritis contis ambientadis in chel vagon, si lâts in viaç cun lui, cu la piçule stue metude par scjaldâ, i cuadris picjâts ator ator, cualchidun a sunâ, il tai simpri pront… Al è pôc ce dî, ogni tant, ma al è just dî grassie.
In chel vagon, chê volte, si visin di une robe soredut: cuant che si faseve la polse, a mieç spetacul, par bevi alc e cjacarâ, al levi simpri a finîle che dopo nissun al veve voie di tornâ a tacâ, di tornâ a lei… si steve ben cussì, li, a cjacarâ, a discuti – che cun lui dongje al jere simpri alc di ce discuti – e a cognossisi, gjoldisi il timp, fûr da lis secjaduris dal mont…
E insome, nus va di saludâlu e disi grassie, di cûr, par chel che al à fat e che nus à lassât.

2 coments On Mandi Paolo…

  • A son passats seis agns de magjichis seradis di Contecurte tal vagon… no ai mai cjatade une location plui biele e un anfitrion plui bulo, gjeniàl e gjentìl…
    Mandi Paolo

    ADN

  • Eh miarde! Mi displâs propite. Mi ricuardi propit de sô barete rosse che i faseve di cuâdri ae sô bocje da ridi e il so caratar gjenerôs par tirâ fûr salam e vin a dutis lis ocasións e condividi un moment di bon umôr ancje dopo dal vagon.
    Jaio

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît