Frico mareôs

– Pronto.
– Soio da Frico-Friûl?
– Si, bundì sior Nini, cemût po?
– Eh o, cemût savêso cui chi soi?
– Preseât sior Agostinis det il Nini,cumò nus baste viodi il numar di chel che al clame e o savin il non. Ninín no?
– Folc us trai, ma savêso ancje il parcè chi clami?
– Sigûr sì, lui al comande simpri cuatri fricos e un di lôr cun 3 spis di ai. Just?
– Joii! Da no crodi! Di cuant in ca vêso metût sù chest tire e mole?
– Eh da cuant che o sin passâts cun Google po, a chest proposit o viôt achi chi vês il colesterôl masse alt e al sarès miôr di meti mancul formadi. Us metio un frico light?
– …? Lait in mone cul vuestri frico merecan, o vuei il gno frico furlan cun 3 spis di ai taçâts sore e vonde!
– Va ben sior Nini, Frico-Friûl al pon e lui al dispon. Vuelial l’ai ancje te saladute di stagjon? I fasarà simpri ben pal cûr.
– Va ben pe salate ma lassait stâ le mê vite privade. Sacrabolts, prime chê dal colesterûl , como chê dal cûr. Ma staiso ai a spiâmi o mi cjapaiso pal cûl?
-Sior Nini, cun dut chel timp ch’al à passât a lei articui sul colesterôl e i mâi di cûr al à dât tal voli dal nestri robot che al nus consee di proponi le diete mediteranie cule salate e un tai di neri. Ninín no? Us zontio il tai di Tocai-Friûl o un Merlot?
– Eh ma a vôul dute eh? Si lin indenant inmò un tic o vegnarês a proponimi ancje il vueli sant! E va ben ancje pal tai, baste che al sedi neri e furlan. Vin cence ai eh?
– Benon, ma ài ài ài, cemût paial ?
– Ma come simpri po, o varessis di savêlu chi pai cule cjarte di credit, no?
– Justementri, sior Nini. Le sô cjarte di credit a e scjadude îr.
– Un moment chi cjali…
– …Ch’al mi vegni un colp, a e scjadude sì, ma o podês simpri mandâmi il gno ordin no? O paiarai ae consegne.
– Benon sior Nini, un tai di neri, une salate, e cuatri fricos al fâs… 58€ cul frico light. Ma isal sigûr di vê i bêçs se nol puès doprâ le cjarte di credit?
– Eh lait sul ostie cul vuestri frico light e dut il vuestri sisteme di laip!
E il sior Nini al sierà il telefonin cun rabie.
Cjalant di là de strade, intun tabelon animât, al viodeve vignî fûr une publicitât che diseve:
“Domandile vuê e tu le varâs doman. Le sole cjarte cence scjadince. Clame subite!”
– Purcit di un Gughel, ma cjale li se…E al impià cun rabie un spagnolet.
Imediadementri une publicitât sule sô marcje di spagnolets a cjapave il puest di chê altre cuntune frâs cimiutant: Fumâ al cope… Al cope… Al cope?
Le tierce publicitât a proponeve forsit il miôr presit pal funerâl ma propite li, cul spagnolet piât che i pindulave da pe dal lavri de sô bocje spalancade, I jere vignût un colp, al jere colât par tiere e il sior Nini nol veve podût viodile.
di Jaio Furlanâr
#539

7 comments On Frico mareôs

  • Jaio biele conte. Une storie ambientade in cheste nestre modernitât. Pecjât che si mûr ancjemò. Manucl mâl che a dierence di une volte cumò si sclope cul bultric plen.
    Nelllo Malisano

  • Jaio, chel "Purcit di un Gughel" al merete di jessi regjistrât tal Claap – Dizionari Furlan Talian come gnûf mocul; soi sigûr che nancje i clerics a no cjataressin nuie di dî. Aromai cjâr Jaio a nus contin ancje i pei da la scune a la tombe. Bielonon chel bocjon cul spagnolet a pendolon, ise opare to? Bepi

  • Biele di une veretât sacrisante. O sin rivâts al pont che ognidun di nô al à une videocjamare incorporade lis vincjecuatri oris de zornade

  • al par che cumo il guviar al intindi savè tropis palanchis che vin in bancje pal funeral, sa je une di plui nus ven tassade prin di la tal aldilà.Ben metude Jajo. Lussian

  • No po fâ che a nus programin la vite, da la nassite a la muart. Ce che o vin di mangjâ, il lavôr che o fasarìn, la femine juste e trops fruts che o varìn. E in font cuant e di ce mâl che o varìn di murì.
    Vêso viodût Matrix?, une robe dal gjenar.
    Diu nus vuardi, ma jo la viôt brute.
    Jaio, dinsi coragjo!

  • Graziis a duç pal vuestri coment. Le conte a jere 3 voltis plui lungje parce che su chest a 'nd ere un frac da dî ma finalmentri ancje in chiste version scurtade al baste par dâ une cerce di cê ch'al puès sucedi.
    Jaio

  • O ai viodût che chest sabide 12 aes 12, in vie Lionel a Udin, al é pusibil di firmâ pe autonomie dal Friûl. Saressie le volte buine?
    Al vâl forsit le pene di provâ, biacemai dome par obleâ i autonomiscj a doprâ le marilenghe e tornâ a crodi che se Udin nus a fat da pari al puedares ne dí fânus da nono.
    Jaio

Leave a Reply to Galliano Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît