San Simon 2015

A son siet e mieze, l’ostîr al è perples… al varès un grum di robis di fâ: scjamâ de rêt lis lezions de dì dopo, lei une tesi che no je sô par inventâ conclusions che nol capìs, lei un libri che nol veve in programe di lei par che al à chê stupide idee che no si pues presentâ un libri cence vêlu let, o inmò, magari, mangjâ alc par cene, che al sarès vonde…
Al cjale la liste des robis di fâ – si scrîf une ogni dî, metint dentri parfin robis come taiâsi la barbe e lis ongulis, che si no a cheste ore al sarès un bigfoot dal Friûl di mieç – e insome, framieç di chês si inacuarç che, gjavant chês za fatis (scrivi mail ca e là, meti a puest cuatri vistîts sporcs che a son li di tant timp che aromai a van ator pe cjamare di bessôi, e altre robis utilis ae sorevivince), si inacuarç che nol à fat nancje une robe che e sedi dome par lui.
L’apontament al è tor vot e mieze.
Une ore sole, i vanze.
Pobon, une ore in dì bisugne simpri robâle e platâle in sachete, cence mai fâle viodi a di nissun, che si no ti robin ancje chê, e dopô vêle robade scjampâ intun cjanton a fâle sù e mangjâle…
E alore vêlu, che al mole dut e al met dongje une bire e patatinis di puars, matitis, un notes regalât e cjolt di Tiger e Jeff Buckley a dut volum… e vie, a dissegnâ.
Doi vencui, al à di fâ, ancje se nol sa ben cemût che son fats…
Al trafiche, al cjante, al bêf, al mangje… e bon, i saltin fûr, chescj vencui, e cuant che ju à finûts, un messaç di sô sûr lu torne a puartâ in ca.
Da setu?
Cjase a disegnâ!
(Ma setu coion, che o sin ducj ca?)
No, no jal scrîf, chest ultin messaç ma il cidinôr dal telefonut cun dut che si viôt che e à let al è come se.
Par un moment i ven tal cjâf di no lâ a viodi se al à vinçût o mancul, parcè che met câs che al vedi di vê vint – che insome, al saveve di vê presentât un biel lavôr – a lui, lis premiazions lu fasin sintî simpri come se al volès jessi di dute une altre bande, e di podê vê un sosia, di podê mandâ tal sô puest. Bon dai… viodìn di movisi, al pense intant che al cjale, tal mûr, ducj i dissens dal lavôr che al à presentât, che pardabon a son un tichinin incuietants… demonis gjaponês… ma ce dal ostie i isal saltât sù? Al vierç l’armaron e al tire fûr ce che i covente…
E dopo nuie, al è dut di presse: cori rivâ tart, restâ in pîts daûr di ducj cun cualchidun che al va indevant a scrivi dulà setu? intant che al è sentât doi metros denant di lui, e la musiche, lis autoritâts, e ae fin al sucêt: al à vint il premi leterari plui impuartant inte sô lenghe mari!
FIESTONE!
E un moment dopo i pâr di jessi di gnûf cjase sô, devant dai dissens, ma cun in man il libri che al à la cuviertine compagne di ce che al à devant dai voi.
Al vierç l’armaron, e un om in dut e par dut compagn di lui, cidin cidin, al va dentri e si plate tal scûr, framieç dai picjadôrs come se al fos une cjamese stirade.
Grassie Rafaêl, i dîs l’ostîr sierant l’armaron, cence di te no savarès cemût fâ.
Rafaêl Serafin
#494
 
____________
Note: conte scrite vuê matine in dîs minûts dal Ostîr, par ringraciâ ducje e disi che al è une vore content di vê vinçût il San Simon 2015
 

 

14 comments On San Simon 2015

  • Ce emozion, a mi bat parfin il cûr, o soi propite contente di chiste biele notizie.
    DoneBete

  • E CUMò CHE LE OSTARIE E à SLARGJAT I MURS E LE PUARTE,BEVI PAR DUCJ.FASINTNUS CAPI INDULA SI CJATE IL LIBRI PE VIE PLUI CURTE.LUSSIAN

  • Tu as di finîle di scrivi robis cussì emozionantis… Brâf Rafaêl!!! Tu sês l'orgoi di ducj i sporteliscj!!!
    Antonella dal Sportel di Codroip

  • Rafaele,tal vevi dit, adiriture o jeri tant sigûr che se ancje piçul piçul il regâl tal ai fat prime de sentence finâl. O soi content par Te, par contecurte e par ducj i contencurtrs. Cumò pardabon il vin sarâ par ducj plui bon.

  • Mi fâs tant plasê che il il Premi San Simon di chest an, al sedi lat tes buinis mans dal nestri Ostîr Rafaêl Serafini. Augurons e a gjoldilu come che al merete.

  • Rafaêl, il San Simon?!? Biele notizie, ma par me cont nissune maravee! Cheste volte il premi al è meretori: al va no dome al to mût origjinal di scrivi contis, ma ancje al to lavôr ben inmaneât in cheste Ostarie. BRÂF! Marie

  • Duncje o vevi viodȗt just, ancjemò compliments par chest prestigjȏs ricognossiment leterari dal Premi San Simon che al puarte in evidence i autȏrs che a scrivin te marilenghe e i dan lustri e la considerazion che e merte di vȇ, par chest il Premi al à ancjemò plui valȏr. Partant Augurons di ancjemò tancj altris sucès.
    Mandi
    Egle T.

  • Gelo, Ostîr, Rafael, Salvadeat, metêtsi adun par un moment a gjoldi chest travuart. Ogni tant a covente fermâsi e dâ un cuc indaûr ancje par viodi di dulà ch'a si è partîs. Jo a no rivi ancjemò a capî cemût ch'a tu fasis a fâ dutis chês robis li insiemi. Dut câs dome compliments al è une vore pôc, ma a no sai cemût dital a altri mût. Forsit cun tun " Mandi fradi furlan", ancje se a tu podaressis jessi gno fi. Bepi

  • Ben contade e di sigûr che le conte a iere amancul de stesse cualitât. Compliments pal biel lavôr e graziis di continuâ a stâ cun nô.
    Jaio

  • Ve chi che o soi!
    Grassie grassie grassie a ducj e al è clâr, o soi une vore content!
    Si che:
    @Donebete
    Se ti ai fat bati il cûr o soi plui content jo. Grassie!

    @Lussian
    Chel pôc ma sigûr, tu viodis che cumò si fasin un pôc cognossi – a scomençâ dal gjornâl doman – e vuadagnîn cualchi altri contecurtâr o letô,
    Sul libri no sai. O sai che ju àn in biblioteche a codroip, ma o passi e o domandi e us inzorni ducj.

    @Antonella
    In efiets, fin a îr di sere no vevi propit pensât che e je une figade che un sportelist al vinci. Un piçule sodisfazion par ducj i sporteliscj dai.:)

    @Nello
    Eh, sì, tu le âs induvinade prin… e gracie pe conte che tu âs regalade a ducj i contecurtârs, pene che o comedi la met sù 🙂

    @Galliano
    Tu âs propit reson, al va gjoldût, e in ogni câs, a ti ti pues dî un gracie dopli, che vuê si cjacarave cuntun che ti cognòs, il siôr Vidoni, e si diseve che tantis voltis a rivin prime il sostegn di Buenos Aires che dal Friûl. Grassie!

    @Marie
    Se tu sês chê Marie che e à vût la mê prime firme su lis Contis di Famee, prin o dopo tu âs di lei e fâti firmâ ancje chest. 😉 graciononis!
    Se no tu sês chê Marie… ti mancjin doi autografos alore 😀

    @Egle
    O speri propit che al sedi cussì, jessint che la leterature furlane, di chest premi, e pâr jessude une vore ben.
    E graciis ancje dal preseament prime ancjemò dal risultât definitîf 🙂

    @Bepi
    MA ce, no soi mica zovin 🙂 Fradi furlan al va plui che ben, cussì podìn disisi Vai Fradi! 🙂
    GRassie!

    @Jaio
    Ma craciis a ti Jaio che tu sês in chest ostarie di cuant che e à viert!

  • E cumò che l'informazion furlane a è ientrade te ostarie,cui sà che no deventi contecurtarie ancje je.Lussian

  • e sarès propit ore.

    comunicazion di servizi, cualchidun aial la mail di Pauli Jacuss, che no le cjati plui?

  • I ai za biel tacàt a leilu e il libri za mi emozione… tra l'altri ancje jo, no sai cemùt mai, ma agns indaùr mi jeri insumiàt di un frut cence muse… e no vevi mai sintùt lis liendis dai spirits Yokai…che si tratti di un archetipo?
    CT

Leave a Reply to Giovanni Nello Malisano Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît