La invasion


“Lôr a vignirin a devastâ il continent che al deventà il lôr domini. Scjampait, res di Jnasrhoi e Rolanh, plataitsi nobii di Urwa parcè che Klevon al è vignût jù su Aillafthgin!”

(dai Cjantârs di Aillafthgin)

Nissun fin ta chê volte al veve viodût astronâfs cussì grandis. Lis difesis dai sovrans di Jnasrhoi a forin fiscadis; cualchi dì in plui al resistè Rolanh; i duchis di Urwa a verin miôr lâ a sierâsi tes lôr cavernis. Di colp dut il continent centrâl al fo in man ai Klevon. No si saveve nancje cemût che a jerin fats: platâts sot di chês armaturis… a vevin une sorte di bec e di largje creste-scût sul cjâf e si movevin in variis manieris… no si saveve se a jerin creaturis viventis o machinis…
I sclâfs dai duchis di Urwa no vevin cjatât puest tes cavernis e si gjoldevin per prime volte la lôr libertât: i Klevon no ju tocjavin; evidentementri ju cjapavin par formis di vite cussì bassis che no valeve nancje la pene pierdi timp.
I Urwans a crodevin di jessi sigûrs tes lôr fuartecis-cavernis ma, di un moment a chel altri dut ur colà jù intor e a muririn sclaçâts: pussibil che i Klevon a vessin armis cussì potentis? No. No jerin stâts i Klevon.
Chel planet al jere une vere cucagne! Atmosfere cun 25 di O e 75 di N e 30° te zone ecuatoriâl. Presince di aghe! Lusso!!!
MILL STROGHAM al jere il prin cjapitani uman a aterâ su chel planet cussì sameant a la Tiere.
Une piçule cjaminade e za si jere gjavât il casc. Al veve apene pescjât une sorte di furmiâr e cumò i scjampave une biele cagade.
E cussì in cuatri e cuatri vot si liberà de tute.
No si jere nacuart di ducj chei piçui aparechiuts, lunc pôcs centimetris l’un che a stavin postegjâts sot dal so cûl.
“Maladets! Mi àn fat mangjâ dome pirulis par un mês e chest al è il risultât!” al esclamà Strogham rabiôs.
A bastarin pocjis scarichis par cancelâ mieze flote Klevon.
di Checo Tam

3 coments On La invasion

  • Bielissime Checo! 🙂
    E dopo magari a pensin che je une conte di ridi o di fantasience… e invezit…. bravo.
    Milio dai cjans

  • Il fat al è emblematic… a mi la fantasy mi à simpri fat cagâ… e cheste e je fantasience misturade cu al fantasy… o vevi sul cjast une mê saghe scrite tal 1990 su un cuader a cuadruts,,, daspò 25 agns alc mi è tornât bon… lis contis sieradis tai armarons a son come il purcit… no si bute vie nuje!
    CT

  • Troppo buono troppo buono Milio… ma jo no soi bulo come te… 🙂 CT

Lasse une rispueste a Anonimo Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît