Zepon

Toni al à fat di garzon vie pal astât. E jere une buteghe di drogherie e salums. Ce tant che al à netât ducj chei vâs di pomidoro; ce tant che al à scovât e ce tant che al à remenât casselis e sacs, bidons e butiliis e dados de Végé…
A lavôr finît il paron, siôr Carli, i da la paie meretade e lui, ce ti fasial? Al va a spindile tai gjornalins. E vie cul Monello, l’Intrepido, il Piccolo Sceriffo e ducj chei stranis personaçs… Tiramolla, Geppo, Tex, Junior l’eroe dell’universo cu la sô manteline a ûs chê di Nembo Kid…
Sô mari i dîs di dut.
“Tu provarâs a straçâ… tu vedaralis, tu vedaralis cuant che no saran plui…”
So pari al riduce… al fume un spagnolet e al scrîf tal so diari. Al è un dai pôcs in paîs che al ame regijstrâ i aveniments.
Po Toni si intive intun strani gjornalin. Une aventure di chês dai merecans. A son dai sienciâts che a àn inventât un argagn par deventâ piçui piçui, plui piçui ancjemò de storie di Isaac Asimov dal viaç sul sotmarin intes venis di une persone malade…
Cheste volte i sienciâts a àn fat une micronavicele e a son deventâts cussì piçui tant di esplorâ i atomos e i eletrons. Intune vignete un sienciât al fâs: “Forme di vita su un elettrone… incredibile!”
L’eletron–planet si clame Zepon. Ma purtrop a son a stâ dai aliens triscj che a profitin de spedizion dai umans par creâ l’efiet inviers, deventâ grancj e… concuistâ la Tiere! A son ducj verts e cu lis antenis… a àn un cjâf cui voi grancj, a ûs lis furmiis o lis moscjis.
Toni al è dut interessât e al rive a la fin de storie.
Po al va li di so mari che, come al solit, i à preparât di merinde: pan e cjocolate. Chê cjocolate a taulute dure cul simbul di une corone par ogni cuadrut.
Ma… nol cjate plui so mari… Toni al viôt un strani personaç che al sgarfe in cusine… alt come un om, dut vert, cul cjâf grant e lis antenis!
di Checo Tam

4 comments On Zepon

  • Biele Checo,pur tal egoismi dai umans o dai aliens,o altri dial cal sedi,di vole inparonasi in chel di chi altris. Lussian

  • Sgrunt! Il gjornalino in cuistion al faseve part di une racolte di un barbe muart… di chei che a vivevin in case da incubo… par tant… a àn butàt vie su dut! CT

  • Checo , a tu varâs let ch'a àn tornât a meti in vore il LHC dal CERN di Gjinevre; a podaressin domandai a Fabiole Gianotti di cirî il Zepon , o ben il Zefon , al puest dal Boson pe contentece di Toni, ce disistu? Bepi

  • Saveiso che jo o vevi pore che tal LHC a cumbinassin cualchi dam? Saio jo? Une buse nere (black hole) in miniature o alc dal gjenar… buine la storie di ciri' il zefon! 😉 CT

Leave a Reply to Anonimo Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît