Al veve simpri savût di no jessi biont, riçot e cui voi clârs, anzit a si inacuarzeve di bessôl ta lis compagniis di no jessi jenfri chei plui preseâts, massime da lis fantatis, ch’a no pierdevin la ocasion di ridiji daûr, cuant i compagns lu coionavin cun chê maledete tiritere: “brut, malfat, vedran, cence morose, mai stât in treno”. Tiliuti al sopuartave dut, ma ce ch’a i deve plui fastidi e lu faseve lâ in bestie, al jere chel: ”mai stât in treno”.
Soredut parcè che lui il tren a lu veve bielzà cjapât par lâ a fâ la visite di leve a Cjasarse partint di Codroip, e daspò chel at uficiâl e jere scjampade ancje une visite a chê cjasute sierade di Vignesie, plene di fantacinis une vore pôc vistudis e seneosis di compagnie e no dome chê. Tal chel puest li a si veve gjavade la sodisfazion di fâsi nomenâ abil, là che i miedis sorestants dal esercit, a lu vevin scartât, val a dî no bon par fâ il soldât, par vie di une gobute ch’al veve su la schene, che secont lôr, a no i lassave puartâ il russac.
Tornât ae vite di ogni dì, Tiliuti al veve scugnût sopuartâ altris coionadis par no jessi stât fat “abbile e arruolato”, cun di plui che lis fantacinis coscritis i disevin: “..s’a nol è bon pe patrie a nol è bon nancje par me”. Ma su chest pont lui al saveve di jessi abil come ch’a i vevin pandût lis femenutis di Vignesie, e al spietave il moment par fâlu savê a ducj.
E che dì al fin e jere rivade cuant che un grop di frutats cun a capo un cacit, ch’al crodeve di jessi cuissà cui par vie dal pari sindic, a lu vere fermât pe strade disintji: “Mandi gobut, ise vere ch’a tu âs une gobe ancje sul parussul, no dome te schene?”. No i vessie mai dit, che la rispueste e jere pronte di un pieç: “I vevi dit a che lengone di to mari di stâ cidine, ma no varès mai plui crodût ch’a vignìs a contâle propri a ti”. Il svindic al à fât il zîr dal paîs ta un lamp, e dut intune Tiliuti a si è fate une gnove innomine ch’a lu à fât preseâ un mont, massime des coscritis ch’a lu vevin scartât.
di Bepi Zefon
#448
2 comments On Tiliuti e il treno
Bepi. ancje tu mi somee, che tu contis i ultins di chest mont. Di fat il personaç in cheste conte mi ricuarde un dai tancj che al cjantave Fabrizio De Andrè. Biele, ben scrite. Un biel furlan e mi fâs plasè che ancjemò, come tu âs fat tu, i ultin e podin riscataitsi. Daspò la conte e je gustose
Nelo, da lis fotos des stazions a tu puedis lei l'etât di Tiliuti, ch'a je che vere. A son passadis desenis di agns fevelant di timp, ma secui in rispiet dal mût di vivi de int. Pense dome se Tiliuti al ves vût Twitter ce tantis sodisfazions ch'a si varès gjavât. Bepi