Al sintive chê vôs tor mieze gnot: chê vôs cussì sensuâl… chê vôs di une zovine che e comentave chei films a chel festival dal cine dal Est. Lui, Toni, e i siei amîs, Valter, Jacum e Barbarossa, ducj cui stes ocjâi cu la montadure nere une vore sixties, ducj cu la stesse passion… i manga, i anìme, Capitan Harlock, Matango, Godzilla, Atragon… e dutis chês altris robis che a passavin ta chel cine d’essay a chel festival… i horror, i thriller, l’erotisim niponic…
La vôs e jere une vore impuartante e e dave une espressivitât a lis aventuris che a jerin in lenghe origjinâl. Di fûr al ploveve e al faseve frêt ma i cuatri amîs si sintivin ben, al cjaldut ta chel vecjo cine e protets, niçulâts di chê vôs che ur contave la storie che a viodevin.
In particolâr ta chê sere a davin un film di pôre: la storie di un biât om che tal zardin di cjase sô, a Luzon o di chês bandis là, si cjatave une grande vuaine intun dai siei arbui. Come par meracul la vuaine si vierzeve e e vignive fûr une femine bielissime che si meteve ai suoi servigi. No fevelave chê femine ma i ubidive, i faseve di massarie e i faseve dut. Ma une dì l’om al restà scaturît a viodile a rifletisi tal spieli: e jere un mostri cui cjavei come sarpints e la muse orende e une grande tristerie. E spietave il moments just par copâ il disgraciât om. Te aventure lui al rivà a salvâsi a fuarce di vitis.
“O ai di savê di cui che e je chê vôs” al disè Toni ai siei amîs. E cussì al spietà che la zovine e vignìs fûr dal cabôt dulà che e comentave i films. E stave par lâ in bagn e lui i le daûr, curiôs. Le viodeve dome di spalis. Po le viodè di profîl… no veve dome la vôs biele…
Le cucà che si cjalave tal spieli dal bagn ma… di che altre bande dal spieli e comparì… MEDUSA!
di Checo Tam
#447
3 comments On Mystical East
Ma come? Nissuno interviene? Une così cussì atuâl…
….. ancje ta ostarie si fevele cun cui che ti dâ la peraule
Cui sa se cualchidun di voaltris al è lât tal Teatrone a viodi alc… jo o soi stât dome îr a viodi un biel melodrame cambodjan… vuê a jerin doi films di invasion aliene ma no soi lât… mi jere vignude la nausee di viodi robe violente… CT