E jere tor miezegnot e cundut che al fôs il mes di Avost le aghe dal canâl di irigazion e jere frede, glaçade di fâi vignî i grisui a Meni di Lene. Ben si intint s’a tu vâs discolç a dâ l’aghe a no tu puedis pretindi di sudâti la cjamese, massime di gnot. A chei timps là, pene finide la seconde vuere mondiâl, i stivâi di gome tu ju sumiavis e Meni cu la strache ch’al leve a durmî a nol veve nissune voie di sumiâ. Al veve pene viert il puartelon dal canâl par fâ jentrà la aghe tal cjamp di menighe, cuant che alçant il cjâf al viôt trê balis di lûs ch’a i vegnin incuintri e si fermin a plomp parsore di lui. Dî ch’a i à cjapât a colp une sbigule, un spali di fâse tes braghessis al è dome un toc di veretât, parcè che Meni a nol è stât plui bon di movisi e cun di plui dai pîts, ancje il sanc tes venis i veve glaçât. Nome i voi a àn rivât ancjemò a viodi i zîrs di inzirli che lis trê balis i àn fat parsore il cjâf e ator pal cjamp, prin di scjampâ vie tant che il folc. Pene ch’a i à tornât un pôc di calôr tes venis, cui bregons plens e bagnâts, al è stât dut un cjapâ la biciclete e pedalâ tant che un sfolmenât viers cjase. E tal doman: contâle o no contâle, cul risi di fâsi cjoli pal cûl par dute la vite. Cui bregons curts al monte in biciclete e al torne tal Palangon, il cjamp parsore la Stradalte, si ferme su la sgjavine e al dâ un voglade ator, al viôt trê maglis scuris, ancjemò cualchi pas indenant e i comparissin trê grancj cerclis te mediche brusade. Inalore cumò al podeve ancje contâle, che forsit cualchidun i varès crodût.
La Stradalte! A le àn clamade in ducj i mûts: Flaminee, Ongjarese, Napoleoniche, ma Stradalte al è il non ch’al è restât salt tal cjâf dai furlans di mieç, parcè che li e je la linie da lis risultivis che e divît lis tieris altis da lis tieris bassis. Val a dì: Listize, Mortean, Bicinins, Antognan fin a Palme a saressin lis tieris altis, là che Bertiûl, Talmassons, Cjasteons di Strade, Morsan e Gonârs a saressin lis tieris bassis, dulà che une volte a scomençavin i palûts, prime da lis bonifichis dai prins agns dal 1900. Su chê strade li a son passadis, secont cualchidun, dutis lis plui grandis disgraciis ch’al vedi viodût il Friûl, a scomençâ da la concuiste dai Romans, lis invasions dai Visigôts, Uns cun Atile, Ostrogôts, Langobarts, Avars, Carli il Grant, Republiche di Vignesie, e i Turcs fin a rivâ a che di Napoleon ch’al à volût lassai ancje il so non.
E jere une strade militâr che e leve di Soreli Jevât viers Soreli Bonât e al contrari; ce podevino domandâ di miôr i invasôrs? Si capis inalore che a traviersâle al jere simpri un riscjo fintremai ai timps di vuê, ancje se daspò che vevin fat dute une schirie di tarondis a jerin un grum di mês che la strade a no faseve plui fevelâ di sè. A rompi il cidinôr, a metât Fevrâr dal 2012, al è capitât un câs une vore curiôs ch’al à fât pensâ a une gnove invasion, cheste volte nuie mancul che de bande dal cîl. A si conte che un zovin di Codroip tornant cjase di Palme in machine viers miezegnot, al vedi viodût propri dongje une grande taronde, une filze di machinis fermis e daspò dismontât, si è cjatât denant une sacume di om alt cuasi cuatri metris che al cjaminave spesseant su l’ôr de strade, un pipinat plen di muscui cul cjâf a forme di coni çoncjât, une sorte di omenon vert insume, ch’al è sparît talpinant cun lis sôs gjambonis lungjis e stuartis cence fâsi cjapâ e nancje fotografâ. A la domande cemût mai nissun a lu à fotografât cun ducj i imprescj ch’o vin tes sachetis, e àn rispuindût che i telefonins a no lavoravin, e jerin come blocâts. Il câs al à fât scjas tant di finî sui gjornâi e fintremai in television, ma l’omenon a no si è fât plui viodi lassant ducj in te curiositât plui grande. Cemût jerial fât di bon, e ce ch’al jere vignût a fâ, al è restât un misteri, tant che un gno nevôt che al vîf a Rome, ma che al cognòs ben i nestris paîs e dulintor, savût il câs, al à cirût di figurâlu denant dal Municipi di Mortean come te figure. Nome cumò a mi ven iniment ch’al podarès jessi stât un di chei pâi ripetidôrs de rêt celulâr, plens di orelis e altris argagns, che stufât di sintî dutis lis monadis ch’a si conte la int par telefon, al vedi displantadis lis fondis de tiere e al sedi scjampât vie par simpri.
di Bepi Zefon
#418
8 comments On UFOs di îr e di vuê
Mandi, Bepi, come simpri al è biel leiti. Biele la storie che tu contis. Se no fali, mi somee, no sai se je chê, une storie vere sucedude cualchi an indaûr che o ai let sul gjornâl. Biele sore dut la storie de strade alte. Nelodifeagne
Be' o savìn cuale che e je la verdad… al jere un struç scjampât di un alevament… e chel tololò che lu à viodût al varès di cjapâ in man cualchi libri di bestiarii opûr lâ tun zardin zoologjic…
Bebalonçarsfan
Bebalonçarsfan, pense a tancj tolòlos, gjornâi, televisions, WEB e ducj chei ch'a son lâs daur al câs. Ma al stâ cidin il vêr capocje ch'a nus à remenâs ducj, e Gelo al sâ dut. Bepi
o sai, ma o tâs 🙂
Nelo, la Stradalte e je simpri stade par me un confin dal bas viers l'alt. Jo me visi ancjemò cuant che jere blancje, un confin cuasi spirituâl, e a no sai ancjemò parcè. Bepi
Biele conte! Ma chês lûs balarinis no saran migo stadis des armis segretis? I nazi no vevino inventât il discovolant?
CT
Checo, ta che volte là Meni al veve sintût semai dome a fevelâ di V2, ma nuie di plui, parcè che i UFO's a son vignûts fûr plui tart cuant ch'a si à scomençât a sintî de Area 51. Bepi
Bepi, âstu mai sintût fevelâ di un film finlandês di Nazi che a son scjampâts su la Lune za dai agns 40 e di li a cirin di concuistâ la Tiere sui discovolants? Al à la musiche dai Laibach, chel complès rock sloven…
CT