Il monument pai muarts in vuere al paronave tal mieç de place denant de Glesie. Sul grant bloc di piere a jerin tacadis lis lapidis cui nons dai muarts di dutis lis vueris; parsore une statue di bronç di un soldât ch’al veve rotis lis cjadenis de sclavitût. Il dut sierât a cuadri cun cjadenis picjadis a cuatri colonis di bronç, a forme di granade, plantadis par tiere su ogni cjanton. Framieç de colone di piere e des cjadenis, un jet di pieris e claps dal Cjars ch’a jerin la tentazion fisse dai frutins dal pais par vie che, massime d’Istât sot sere, a intonavin concierts batint cui claps su li colonis ca sunavin tant che cjampanis.
Celestin al viveve intune stanziute, pôc plui di un cjôt di purcit, cul paviment in tiere batude e la puarte di len dute sbrendolade ch’a deve fûr su la place; daspò cualchi minût di conciert il nestri om al scomençave a dai fûr di cjâf, si che duncje, jempladis lis sachetis di claps, al vignive fûr bombardant i frutins ch’a no spietavin nuie di miôr par zornâlu: «Bintar, ghelar, plante puf al Pedoli di Viene», fasintlu imbesteâ ancjemò di plui.
La robe e jere deventade il spas di stagjon e e rompeve la tedie de vite de zornade; il puar om al jere stât sì un bintar ai siei timps cuant ch’al lavorave in Austrie, ma cumò, vint mangjât sù dut, al viveve di caritât, e cuant ch’al capitave al deve une man tal cimitieri a soterâ i muarts par cjapâ un franc. Al leve ator pal paîs cui bregons ducj rots e sbrendolôs; si conte che in ocasion di un funerâl, tal sbassâsi par poiâ jù la casse dal muart inte buse, i vedin scjampadis fûr dutis lis bosemis, fasint ridi ancje il parincj dal muart. Si dîs ancje che il plevan, cul sanc frêt dai oms di glesie, al vedi cjapât la pale ch’al doprave par butâ la prime tiere su la casse, tirantji une palade su lis balis par visâlu di fermâ il spetacul; Celestin par chel servizi a nol à puartât cjase nancje une palanche.
La vite ator dal monument e tornave a fâsi une vore plui serie pe fieste dal cuatri di Novembar cuant che si celebrave la fin de Grande Vuere e la vitorie sui todescs; daspò la Messe di Ringraciament in glesie, ancje se al jere pôc di ringraciâ cun dut chel macel, ducj in procession ator dal monument, là che il veteran plui studiât al leieve il Boletin de Vitorie (simpri chel):
“.. I resti di quello che fu uno dei più potenti eserciti del mondo risalgono in disordine e senza speranza le valli che avevano discese con orgogliosa sicurezza.” Firmato Diaz
che voltât in marilenghe al vûl dî sù par jù:
“.. Il vanzum di un dai plui fuarts esercits dal mont al torne a fâ di rive in sù, sdavassant e cence sperance, lis valadis ch’al veve fât di rive in jù cun tante supierbeose paronance.”
A son stâts batiâts un grum di “Firmato” ta chei agns tal Trivenit, ancje cuintri il parê contrari dai predis ch’a no cjatavin nissun Firmato tal libri dai Sants, a mostre che l’amôr di Patrie al è, o miôr al jere, vuarp e sort.
Cumò s’a tu ciris Firmato Diaz su internet, a tu cjatis dome Diaz vint scancelât par simpri “Firmato” ancje su lis lapidis; par dî il vêr plui indenant su “Vôs dal Dindi” (Google) al ven fûr ancje il non e la foto di Cameron Diaz, une biele frice americane che dut câs, di mistîr a no scrîf e no firme boletins di vuere o di vitorie.
di Bepi Zefon
#386
5 comments On Firmato Diaz
Bepi, brâf al è simpri biel leiti. Cheste volte tu frontis cun gracie, ancje se a la fin tu la butis in frice, la cuistion de Patrie Taliane par no Furlan. Pense tu, puar gno nono, i voleve tant ben che a pene finide la vuere, al votave par ricognossince al Re, pal partît monarchic. Si propit cussì, ancje se al veve provadis ducj i calvaris des trinceis. E un pôc ducj i cavalîrs di Vittorio Veneto la pensavin come lui. Becs e contents. Disio ben?
Tu l'às lete juste nelo, forsit i nestris vons a si sintivin une vore sotans viers dutis lis autoritâts, i sorestants, e il sôl mût par fasi viodi al jere chel di fâs copâ in vuere. La scrite sul monument e jere par simpri, tant che a rispuindin ancjemò "Presente" sa tu ju clamis; ancje i veterans e i cavalîrs e àn (aromai e vevin) il lôr moment di glorie tal memoreâju denant dal monument al sun de bande ch'a intonave "il Piave..". La "frice" americane a nus dîs che, al dì di vuê, chei puarets a no nus contin plui nuie e a son muarts par dibant. Bepi
Le conte a tire fûr dut ce ch'al é di dî. Le glesie gjelôse che le int a crodi plui ae patrie che in jê o al signôr. I monumentins o monumentons simpri avonde brutins fats sù di presse, il Diaz che nissun nol si ricuarde plui par no impensâsi ch'al firmave ancje lis fusilazions che son continuadis fint ae fin de vuere. Cui saial che in Argjentine si dopre il vocabul cadorna par dî di une robe di brute cualitât? Che sedin stâts i furlans no lu sai, ma di sigûr i talians de Argjentine http://es.wikipedia.org/wiki/Luigi_Cadorna
Jaio
Bepi, tal gno borc al jere un di non Firmato,sio pari al veve fat la vuere come atendent dal Diaz, e al sun di sinti simpri dì firmato,firmato,al batià so fi cun chist non,crodint das fuarce al vivi. Lussian
Lussian, sgarfant su internet o ài cjatât un Sant Firmato di Auxerre, che forsit nancje la Glesie a sâ di vê. Si varès di fai fieste ai 5 di Otubar, ma secont la Enciclopedie dai Sants il so martueri a nol à nissun valôr storic. Sa nol lu san lôr…. tignintsi il nestri Firmato Diaz, che a sintî Indro Montanelli a somee che vierzint la cjarte gjeografiche al vedi dit: "..dove ca… sta questo Vittorio Veneto?" Grant strateghe…. Piês ancjemò Cadorna, come ch'al dîs Jaio. Bepi