La fornâs di Cerneglons

Se tu cjalis di lontan ce che al vanze de fornâs viere di Cerneglons, ti somee une muse che rît.
Lu sai ben, jo, che o ven chi di spes, par fâ une cjaminade, vûstu par viodi l’aiar che al petene i fros, ator dai modons ruans, vûstu che, no si sa mai, o rivi adore a tornâ a viodi i spirts.
La prime volte, in efiets, e jere une serade come chestis, di chei dîs a chi.
Il cjalt de zornade si poiave sui mûrs cricant e i grîs a cjantavin fin a fâ centenâ lis orelis. O jeri plui tart da solit, mi pâr, parcè che il scûr al veve za cjapât pe man ogni ombrene, e cjalant dentri dal puarton grant, viers la strade, si viodevin lis lûs a impiâsi.
O jeri restât li par un biel pôc, vongolant cence premure, inmagât di une lusigne che mi contave une storie, cul sô svualâ disordenât. No par svantâmi, ma soi une vore brâf a lei lis storiis contadis dal svualâ des bestiis. E no cjacari dome des lusignis, che al è une vore facil, stant al lôr berlâ tal scûr, ma jo o soi bon di lei cence fastidis une storie tal svualâ di un grivon, o di une gjespe o parcè di no, parfin chês coionadis che a contin lis moscjis. Une volte, ancje se al jere denant di un cîl clarissim e mi soi judât cul businôr, soi rivât parfin a lei lis storiis dai moscjins, ancje se chei maladets a cjacarin ducj insieme e no si capìs une ostie!
Chê sere, dut câs, mi pareve une storie di pôre, ancje se, no vintle sintude dal imprin, no rivavi adore a intindi la trame e – forsit propit par chel gno tirâ i voi che mi à spiçade ancje l’orele – o ai sintût, pene di là de bocje-puarton, une vosute, un sunsûr, cuasi un piulâ.
«Una lussiolaaa…» e veve dit. E subit daûr un Ssshhh di une altre vôs, di sigûr di om, e dopo un cisicâ e cisâ di jerbe. Nancje a dîlu, la lusigne si jere spauride, svualant vie a contâ la storie di une altre bande, e jo, pensant che la int e jere dute maleducade, mi eri svicinât par viodi cui dal diaul che mi veve lassât cu la conte a miezis. Ben po… robis che mi vegni un imbast, di sfantâmi di bot e sclop!
Propit denant di me, un in bande di chel altri, vêju li: doi spirts!
Spirts, fantasimis, parincis, vencui… clamaitju cemût che volês: a jerin chê robe li!
Si viodeve che a jerin mascjo e femine. Jê cui cjavei celescj, tant che il cîl di Avost, curts e alts sul cjâf, cjadenis e cjadenutis che i corevin par dute la muse e magre di fâ spavent, sapulide tai siei sbrendui e straçs di ogni colôr. Lui, plui alt, ma se pussibil inmò plui sclagn, i cjavei ju veve colôr di un naranç e al veve intor
dome piel, nere, che e pareve inclaudade tal cuarp di clauts e altris fiers. O vevi vuicât, al è clâr, e lôr doi, a chest pont – o ai pensât dopo – spaurîts tant che me, a vevin vuicât compagn, tant che un purcit pront par deventâ salams. Di li, no sai plui ce che a àn fat, pensi che sedin sparîts, sigure, ma jo soi stât ancjemò plui svelt di lôr e o soi svolât vie come un mat, cence nancje cjalâ se o levi a sbati intun mûr o intun morâl.
Ce stupit che soi stât, nomo?
Vê la fortune di viodi une cubie di fantasimis, di vêlis sintudis fevelâ, e jessi cussì coion di lâ a spaurîlis, cence nancje provâ a cjacarâi, o ancje dome a viodi ce che fasevin, cemût che a si movevin o dulà che a levin a platâsi.
E biel che la pôre mi è restade intor par un biel pôc, prin di rivâ a meti il coragjo in sachete e tornâ inte fornâs. Ma ancje se cumò o ven a cjaminâ fin chi ogni sere, sperant di viodiju, nol è mai sucedût.
Sigûr… o soi vonde convint di ce che o ai viodût, ma no mi è mai passât pal cjâf di contâlu a cualchidun: des mês bandis ti cjapin par un fûr cul cjâf intun marilamp e son bogns di mandâti al confin intun cjistiel o, piês ancjemò, intune cjase bandonade. Par chel o stoi cirint di savê alc di plui, prime di dîlu ator.
Pûr trop, dopo di chê volte, no ai mai fat nissun avistament.
La uniche robe strane che mi è capitade par mans, la prime dî che soi tornât, e je stade une pagjine di gjornâl, poiade suntun clap e smavide de ploie e dal soreli. In chê cjarte si viodeve ancjemò un toc di articul scrit intune lenghe che no mi somee di chest mont, o in ogni mût, che jo no cognòs.
Ve chi, us lassi chês pocjis riis, no si sa mai che cualchidun che al leiarà chest scrit, un doman, al rivi adore a disgropâ il misteri.

…lo strano avvistamento avvenuto pochi giorni fa, nei pressi delle rovine della fornace. Difficile credere ai due punk, che pur affermando di non aver assunto alcun tipo di stupefacente, sostengono di avere distinto con chiarezza una presenza, composta di luce e bagliori, sospesa in aria, ma dall’evidente forma umana. L’essere, alla loro vista, avrebbe gridato, spaventatissimo, e sarebbe volato via, attraversando i mattoni come fossero d’aria. Molti i curiosi, nei giorni seguenti…

di Rafâel Serafin
#296