Cemût si zuial? Balutis | Canucje | Fusîl cul elastic

Balutis

A zuiâ di balutis i vûl smire e jessi bulos. Agnorums indaûr si zuiave cui claputs starondâts dal flum, o fasint su balutis di tierecuete o, plui di spes, balutis di veri colorât, come chês che si cjatin ancje cumò. Bisugnave jessi bogns di cjapâ la balute dal aversari passant framieç di provis di abilitât, intune sorte di biliart. Si doprave il tîr libar o si rindeve plui dificil il dut fasint dôs busis inte tiere. Par tirâ la balute, la tecniche e jere di pleâ il dêt indiç e tirâ cu la ongule dal poleâr, viers l’obietîf.

Cjamp di zûc: dôs busis te tiere, a distance di 3 metris, plui o mancul. O si sielç di zuiâ a butâle dentri inte buse di chel altri, e ogni volte si vuadagne une balute; o si zuie libar. In chest câs, clamât “tiche spane”, ma ancje in altris
manieris, si à di fâ la conte (Ae baie tiche baie in par messe tuc muc poc) par decidi cui che al tire par prin e podopo chel altri al cîr di colpîji la bale. Si podeve lâ indenant cussì par oris…

Canucje

Un zûc tra i plui facii, ancje chest di smicje, che no ducj a vevin.

Lis manieris par meti adun l’imprest di fonde, la canucje, a jerin une vore. Tal imprin si fasevin cul carton, o cuntune ramascje di saût, che e jere facile di svuedâ de sô medole, ma cumò la plastiche e à dât une vore di pussibilitâts in plui: par esempli un tubo rigjit di plastiche robât a un implant eletric.

Come cartucjis si dopravin pomulis, balutis di cjarte, samencis lis fusetis, o stupins, ven a stâi dai pirui di cjarte misturade e mastiade cu le salive, e cualchi bintar, al sucedeve, al ficjave dentri une gusele.

Fusîl cul elastic

Tierç zûc di smicje, ancje chi si va sul classic, la vuere, ma doprant ce che si cjatave par fâ su l’imprest fondamentâl par corisi daûr e platâsi. Il fusîl, difat, al è un supuart di len, fat deventâ slis e lavorât in maniere che l’elsatic al sedi macil di meti e di tirâ, ma al rivi ancje adore a cjapâi intor ai aversaris. Il zûc, difat, al è fat di une bataie dulà che bisugne colpì chei altris zuiadôrs, come se si fos in vuere.

4 coments On Cemût si zuial? Balutis | Canucje | Fusîl cul elastic

  • Tu tu mi faseris tornâ indaûr tal timp, o ricuardi che al jere plui impuartant sei bulos, po dopo a vignive la smire e la smicje, no mancjavin mai lis discussions, soredut cuant che si tratave di balutis di veri coloradis e trasparentis.
    La conte che jo mi visi e diseve cussì:< "Ae baie tiche baie in par messe tuc muc poc" >.
    Saluts,
    Galliano

  • Graciis Galliano! mi coventave propit cualchidun che mi dises cemût che e leve a finî! Cumò la met tal post! 🙂

  • No sai se lu learà, a son pasâts une vòre di ains de publicazion dal post, ma us volevi dîus che chest a l’ê l’unic puest la che o ai cjatât il zuc di tiche spane. Us ringrazi une vôre cusî o rivi a insegnâ a zuiâ a balutis ai mei fîs. Mandi.

  • MA graciis Andrea! Pardabon! O vevin fermât di meti sù lis robis dai zûc, ma tu mi dâs un biel sburt par tornâ a lavorâi parsore! Grassie!

Leave a Reply to Andrea Cancel reply

This site uses Akismet to reduce spam. Learn how your comment data is processed.

Pît di pagjine dal sît