Picinin, amôr gno

 

Lu sai che ti plâs mangjâ pocut e san ma buinut, e o soi pronte pal to plasê a vignîti daûr cui mei mangjarins. A buinore o larai a marcjât a cjoli par te il latut plui frescut, il pagnut cjalt di fôr e lis pomutis plui golosutis. Ti dismovarai cu la guantierute de gulizion, cuntune rosute fresculine e une bussadute. Ve ca, ti disarai, il to sugut di narancis pene strucjât. Lis tôs fetutis di pan brustulidis cu la marmeladute di freulutis e il to cafetut cul lat ma cence zucar, signurin gno biel.
Pal to gustadin, nome une salatute frescie di ort, cui ravanei e la ruculute che ti ai semenât  jo la cunvierute, bagnade e curade cu lis mês manutis. E ti zontarai dongje nome un jogurtin magri, che lu sai ti plâs tant.
O lavarai la salatute fue par fue che sedin lustris, e il pomidorut a çariesute lu taiarai pal mieç, amôr gno, che tu sintis dut il savorin di soreli par che ti jempli il to curisin di bogns sintiments. O cuinçarai il dut cul vuelissut dolç e delicât de riviere di soreli jevât de Ligurie, cun pene une gotute di asêt aromatic che o fâs jo, par te tenerece mê. Une gotute de mê salivute par striati che no tu ti dismenteis dal to amorut adorât. Par saurî la tô salatute une mê lagrimute salade di comozion al ricuart dal nestri prin amôr cuant che o jerin zovins.
Pe cenute, pensarai vie pal dì, che o soi sigure di sauriti il stomi e che par un an o rivi a discjoliti dai toi pinsiruts cence stufâti  nancje une volte. E no mancjarâ su la taule chel taiut di vinel neri di cantine che ti va ju tant ben. Par indulciti la bocje palacinke ae marmelade che o fâs jo o budinut di cjicolate, daûr de ispirazion.
Alore, mi vuelistu  tant che tô afezionade cogute di cjase? O soi nete, che o fâs une dociute ae matine e il bagnut sot sere. Mi tai parben lis ongulutis e tal fâs vulintîr ancje a ti. No mastii gome merecane, no mi impuci il flât di spagnolets, no ai pei di plui ni sot dai braçs ni là che tu vâs dispes a cjapâti lis tôs gjoldudutis. Lis mês manutis a san cusinà e fâti gjoldi. Se al covente o pues ancje insavonâti la schene e resentati i cjavei. La gnot o pues scjaldâti co mi intachi crote a ti. Mi vuelistu amôr gno picinin?O sarai la tô cogute, la tô camarele, la tô stuute, la cunvierie di arâ e savoltâ salocor. Prin di durmî ti puartarai la camomilute.
Parcè alore tu ti sês stufât di chê sdrondine di Marie, chel gran putanon di chilo, bocognone trucade e tu sês tornât di me, om di mierde che no tu sês altri. Chê carampane, cun chei tacs di dodis che cole dal moment, troie che dut lu san e ridin di te. Parcè gno picinin propite cun chê vacjate di Marie. E cumò che ti à stufât cui soi numars di rivendicule di sante catarine tu sês tornât a a fati cocolâ ca di me, schifôs di un sporcacion che no tu sês altri.
Ti siesti jo, no stâ vê pôre, i toi fastidiis.
O rivi in cjamare dal moment cu la camamilute clipe par te, cuntune sedonute di mîl e une di velen pes pantianis, cussì che sedi la ultime volte, ninin gno, che ti siervìs e che ti torni a cjapâ indaûr daspò di ancjemò une altre  scjampadine cu la ultime sdrondine che tu sês lât daûr.
di Stefano Gasti
#240

1 comments On Picinin, amôr gno

  • Biele conte. Cun dute le gjentilece doprade tes liniis de prime part, scuâsit a si spiete di passâ di chê altre bande e cuant che le virevolte a rive o ai vût fintramai un plasê. Come se mi fos liberâtdal pês di dutis chês peraulis che aromai a deventavin masse gjentîls par sei onestis. Daspò mi è vignude ancje 'ne bocje da ridi par vie dal contrast ben manegjât. No é le prime volte che il scritôr si met lis cotulis par scrivi e forsit a no sarà nancje le ûltime parcé che se i và ben di scrivi no 'nd é nuie di gambiâ.

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît