fetes di fieste

 

Julio Romero de torres, Vive les cheveux
di muardi daurman, cence cualchi fastidi: jenfri ferbint, cuant che ogni dì al somee di vacance. i sparagns un sù l’altri, dâts al cramar de Basse e po ducj intun a gjoldi le angurie. madure. ridint, ma di gust, ancje cence parcè: se no chel di esisti. se no le sorprese di baticûrs in zermoi, di zuiâ in preludi al doman colm di insiums: che ognidun al à in olme.
… e les frutes ?
jo chês frutes, les ai inmò intai voi: gaiarines e clâres come tantes cisiles. e tant che cisiles non savarès plui clamâles par non. al infûr di ‘Sesùte che non à dite mai nuie, deventant nome rosse. e Rinùte che e rideve di cûr, tal parâsi des mans lizeres e legres, svoladies tal zuc, slungjades curioses tor chês formes tarondes … bòes, sù po!…  stait fers …
magjie di serades d’istât, sul cuel in face a le glesie, a gjondâ di bocons di esistence: smorseâ l’avignì puartant vie rideçs. e cirint ogni tant une cise, a parâsi: lôr di une bande, sotvie. e nô di chê altre, vosant: par un dasi valôr. i masclis si sa e son simpri indaûr in stagjon. iludintsi par là, di sfrancjâsi a peraules.
ju ai pierdûts ducj di viste chei timps, cui amis e les spietes. o soi lât vie lontan, intal plen de stagjon: inte grande citât, no savint di nissun. cence orts ni profums, si no chei dai marcjâts. no ai cjatades ‘Sesutes, e chi les Rinutes no ridin di cûr, lant di corse al parcè. cemût fâ: lâ indenant, smenteâ. puartâ insom dut il studi. daurman il lavôr. il confâ, par fortune no mi è mai mancjât. il padin lu ai cjatât: no domandi di miôr. di stes ogni Istât mi fermi a cjalâ i bancons des anguries. … ma e son come coces! smavides, lungjes. o ai provât a comprant cualchi volte: ma ai fruts no ur leve « e an masse seputes li ator: parcè, disistu … » o pues dîus di sigûr, che al è just tal lôr estri.
e jo di sigûr volarès cjatâ fûr inmò chel plasè di cerçâ – in dut gust e inocence e cul stes baticûr – une fete di vite a leâ il cuarp cu l’anime. amant ogni istant cun mans che trimulin, lavris in sfrese e voi ingropâts: in dute sorprese.
… po no si è mai contents!
di el fari
#241

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît