Cemût si disial par… talian? Sclopit, ardielut, urtiçons

Ve chi, la seconde puntade de gnove rubriche su lis peraulis. Chest colp o provìn a cjalâ de bande contrarie e tirìn fûr cualchi peraule che par furlan, ben o mâl, o savìn ce che e je, ma cuant che si trate di voltâle par talian… boh!? E se chê altre volte e jerin trê bestiis, vuê o sielzin trê plantis.

Sclopit

No covente nancje dîlu, cuâl che al è il sclopit e ce che si fâs. Jerbe doprade soredut par fâ il risot, par me cont e rint une vore ancje doprade par cuinçâ la pastesute. Ma ce isal, par talian, il sclopit? Al è la SILENE, une plante une vore comune, ca di no, che e conte plui di tresinte gjenars diferents, dai cuai chel che miôr o cognossìn al è forsit propit che doprât in cusine. Come definizion volgâr, par talian, e ven dade ancje chê di Erba del cucco, ma a no furlans, nus baste sintî cjacarâ di sclopit, par che nus vegni fan…

Ardielut

Chest no si dopre, par solit, par fa paste o risot, ma si mangje insalate e, cun di plui, e je une vore buine!
O zontarès ancje, che meti un fuee tal pagnut e je une chiccherie… ma cemût si disial, par talian, l’ardielut? Facil, o disarês, e je la valeriana, e invezit no, bisugne stâ atents, par che il nestri ardielut, pur jessint de stesse famee, e je la VALERIANELLA, ancje cognossude cuntune sdrume di nons comuns (formentino, songino, soncino, sarset, dolcetta, valerianella, insalata valeriana, molesini matawilz, grassagallina)

Urtiçons

Di no sbaliâsi cun l’urtiçon salvadi (tamaro), la plante nostrane plui benvolude dai amants de fertaie e je sigûr l’urtiçon, che prest si pues bielzà lâ a cjapâ sù ator par fossai. L’urtiçon no dome e je la salvece dai fruts che a van ator masse oris, par no fâsi dî di dut cuant che a tornin, ma e je une plante une vore preseade in cusine. Par talian, e varès di jessi il LUPPOLO, ven a stâi propit chel che si dopre par fâ la bire, ancje se par mangjâju a bisugne cjapâju sù cuant che a son une vore zovins e tenars.

Al va dit, ancje che no dapardut chestis plantis si clamin cun chescj nons, e se ’nd è 35 manieris par dî “tutolo” par furlan, nus plasarès savê cemût che i clients de nestre Ostarie ju clamin.
Come par solit, jessint che no sin botanics, se o vin fat cualchi falope, diseinusal tai coments che o corezin.

4 comments On Cemût si disial par… talian? Sclopit, ardielut, urtiçons

Leave a Reply to Jaio Furlanâr Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît