Cidine cidine, suiade tes sôs fuarcis e come un passarin intun çufut di plumis, si è distudade Vera Chmaruk, frute dal vincjesîs, di Kijev, depuartade in timp di guere a Buchenwald, maridade in Gjermanie cul Nino Cilinut dal Cilin, presonîr di guere ancje lui, e po vivude chenti te miserie, a Sante Marie Sclaunic e a Puçui, fin l’ultime cuiete trate de sô strade a Samardencje.
Sul imprin i fâs strade il Nino e po e cjate ben jê la maniere di judâsi di bessole, cul so snait.
L’afiet ju à compagnâts in vite. Ma distès Vera e conte, une volte, di une barufe fûr dal ordenari, a dute gnot.
Il Nino al zuiave cu La Rovente, la scuadre di balon dal Sante Marie e alore, la domenie, dopo zuiât si pierdeve vie cui amîs de scuadre tornant dongje a straoris. Passe une volte, passin dôs, la tierce Vera lu clame adoremus subit tornât.
«Sono oris di tornâ!» i dîs.
«Soi paron jo!» dissal lui, che al varà magari bevût un tai, par vê chel estri.
Alore Vera i mole un scufiot a man ledrose, di mandâlu a rondolons pe cjamare che no jere sofitade e, pal sunsûr de marcule, si è dismot il vecjo e corût sù pes scjalis a viodi ce dal diaul e podê meti pâs.
«Cje ca po!» al diseve il Cilin, pari dal Cilinut.
«Ve ca mo!» al diseve.
«Sù po cumò!» al tornave a dî, misturant lis cuatri peraulis cun dutis lis blestemis che al veve plui a man.
Intor di se, il Cilin al veve dome la cjamese. A ogni invocazion, al alçave i braçs adalt esponint in chê maniere denant di Vera, tal lusôr de lampadinute, dute la batarie. Che Vera e scuen alore, par che il Cilin nol cjapi frêt, e podê cori a viodi dal Cilinut che no si sei fat mâl, spesseâ a fâ la pâs e sierâ li la robe.
Rivade, chê altre dì, insom de strade, sul moment dal scûr Veruska e à sintût sigûr che il Nino le clamave a braçolâsi e je corude incuintri, cjapant pe man la Muart.
di Ivano Urli
#182
