Contecurte: Belanç e polse

Ve chi, ancje no de Ostarie, cul mês di lui, a si cjaparìn une meretade polse par tornâ a meti in cjarie lis batariis e tornâ, a Setembar, plui riposâts e plens di snait.
Fasint i conts, ae fin di cheste gnove stagjon de nestre Ostarie – cun organic slargjât, la gnove cjase intal web su blogspot e lis gnovis rubrichis metudis adun – podìn dî che il belanç al è positîf in plui di cualchi aspiet.
Cjacarant di contis, podìn dîus che di cuant che o vin tornât a vierzi il gnûf blog, ’nt vin publicadis une cincuantine, cence contâ chês tiradis in ca de Ostarie Viere. Disìn che, pûr vint mantignût cualchi vieli contecurtâr, a nus somee di vê pierdûts un biel pôcs par strade, e di vê cjapâts sù di mancul, di chei gnûfs.
Dongje di chest, o podìn ancje marcâ la fature che i contecurtârs a fasin a restâ sot lis 2000batudis (e chest nus met in dificoltât ancje cu lis contis di proponi a la Patrie dal Friûl) e la mancjance di un segn di vite, ancje cuant che magari o vin dai letôrs fis.
In bande, però, o vin incressût i articui che a cjacaravin di altri, soredut cun la rubriche des contis misteriosis dal nestri gnûf acuist – il Garzon – e cu la uficializazione dal Camarîr par i articui dediâts ae lenghe.
No sin stâts tant brâfs, invezit, a proponi cun costance ispirazions e partidis di discors, ma a viodarìn cemût regolâsi par la stagjon che e vignarà.
Positîf, invezit, soredut cu la ultime serade Contecurte 1511, il belanç da lis leturis publichis, che par cumò ’nd àn simpri cjatât un bon acet, dimostrant une volte di plui che lis relazions e lis iniziativis virtuâls a puedin movi relazion e iniziativis tal mont “reâl”.
Cussì al è propit di chest piçul belanç che o cirarìn di partî, cuant che o tornarìn a tacâ.
Tant par començâ, sperant che al fâsi plasê a ducj, la Ostarie e larà in polse, ma lis publicazions no si fermaràn, parcè che o vin intenzion di doprâ la Istât par tirâ achì su blogspot une buine part des contis vieris che o vin lassâdis sul blog di prin.
Cun di plui, par la prossime stagjon, a podìn za anticipâ che o l’Ostîr al à pene asunt un Cramâr, cun mansions in vie di definizion, e che al è in tratative par une gnove e preseade rubriche di contis; cence gjavâ lis ideis che i van bielzâ zirant tor pal cjâf.
Bon, al è dut, par cumò.
Us lassarìn ancjemò cualchi conte, e dopo us saludarìn e lassarìn a gjoldi il cjalt da la Istât

15 comments On Contecurte: Belanç e polse

  • Cemut "Bon, al è dut, par cumò." ?! – […] saltat vie parce tant… – cence dassi le man?
    O frantumarés alc se… ah! ce frescut, siariat une vetrade che… eetcì!
    Mandi zovinastros e feminatis, e soredut a ches dos feminis Signores, une dongie che atre e dutis dos a torzeon, e a plomb (par dì che stan cui pits par tiere) tignint un dopli in man.

  • Orpo, ma chestis a no son ferîs, si nin indenant cusì o riscjìn la diaspore, la disfate. No saressial miôr tignî dûr e dasi il turno. L'ostarie che siere par tant timp e riscje di pierdi i siei client. Alore, ferîs e van ben par rigjenerâ il fisic e il spirt, ma "cum grano salis"!
    E po dopo,o volevi ancje di che si podarès meti a chi contis plui lungjis, magari in dôs, trê voltis, no di plui, a tâl proposit o vevi mandât une conte che no je stade publicade a chi parcè ritignude lungje, masse lungje dal non " Guadalupe, il viaç di une vite", ce disêso?
    Mandi e buinis ferîs a ducj. Maurizio Di Fant

  • “Guadalupe il viaç di une vite”

    A je plene plene di morbin Guadalupe e in fin a le rivât il di di partì.
    E sa che il siò paîs ai mancjarà, ma e sa ancje che prest a tornarà a Yata. Si trate dome di dôs setemanis di vacance, lontane dai siei amîs, dai siei gjenitôrs, dal siò cjanut e das robis di ogni di. Cuindis dîs e po e tornarà a cjatà dûc, a tornarà a fa i compìs e a curà il siò Lama, a molzi lis cjavris e a fa il formadi, ma ancje il pan e a judà la mame a preparà la cene par cuant ca tornaran il pari e i fradis plui piçui dal cjamp.
    Cumò, dut câs, no viôt l'ore di rivà a la Paz, le grande citât, le grande Capitâl, sin cumò dome sintude nomenâ. A le il prin viaç da so vite. Cumò biadelore a je la so volte e no sta in te piel de voie di partì. Guadalupe e a disesiet aiins e i siei gjenitôrs o i an donâ il biliet par zî a cjatà la gnagne. A gji an contât ca te citât an dije robononis di machinis pas stradis, che scuasit si a di sta atents di scjavaçâ le strade! No come a Yata che di mâl che va, a passin trê o cuatri camionetis par setemane e la coriere " il coletîf" la joibe matine! Po gji an ancje contât che tes cjasis a je la corint eletriche, cal baste scliçà un boton e si pie la lûs, ancje di gnot! Tal lavandin a rive l'aghe, sole, cence la a cjolile tal riul!
    Ma chel che je no podê imagjinâsi, a son les buteghis e i negozis can dije, un daûr chel atri e ca son plens di stofis e di ogni ben di Diu; robe di mangjà, sacs incolms di pomis, di verdure e di dut ce cal rive da campagne. E che la robe si paie di bot, cence barat. Se pense che in tal siò paîs an dije dome trê piçui negozis, chel di Sofie, chel di Marte e chel di Don Luis, ca furnissin il indispensabil par dutis chês vincjecuatri fameis dal paîs. Il rest, ca no si cjate li, si scugne la fin a cincuante chilometrots te buteghe dal fradi dal plevan, a Cjase blancje. Se pense a dut chest a i ven scuasit pôre. Ma a je masse la so felicitât, la contentece di volè viodi il mont moderni, la civiltât!

    Chiste e sares un tierz de storie, plui o mancul…
    Mandi

  • O vin controlât il belanç de Ostarie e o podìn disi che lis nestris valutazions a son positivis.
    In buine sostance si pues concludi che la "Certificazion di Belanç" a ven conferide in virtût dal fat che l'Aziende Contecurte e presente i conts in ordin e a garantìs, graciis al sisteme di control interni, l'atendibilitât dai dâts produsûts e la protezion dal patrimoni aziendâl.
    Prossim pas la cuotazion a Wall Street.
    In fede
    D.Bete&Dame m.f.

  • @Maurizio di Fant, jo la conte “Guadalupe, il viaç di une vite” le ai za lete ta un altri blog, "Scrite in lenghe taliane di Ilario Lavarra di Milan, in viaç di un an in ca, cu la sô vecje Vespa pes Americhis, e davuelte in lenghe furlane de bande di Rapetti."
    Il link al è chest
    http://blognew.aruba.it/blog.vespanda.com/FOTO_MACHU_PICCHU_49190.shtml

  • Jo, sior sun-dru-thi, o pensi che finile a l'è d'istess che inziale, tant il timp al torne dentri e al conte… zujà in Borse, con tune Guadalupe scuviarte falopade? Ah, ce Istat bulinte che nus spiete!

  • Dame graciose, tu âs reson, o soi dal prin scomençà di chel viaç di Ilario Lavarra, ca le partît di New York il vinç di Mai di l'an pasât e cumò dopo sei lât su fin tal nord de Alaske e ju, ju tal cûl de Americhe latine fin a Ushuaja a le rivât, tornant in su scuasit in Colombie. Parsore tal blog di "Vespanda o rispuint al sorenon di "Rapetti" e la conte par just le ai dome davuelte dal talian e le volevi meti chi parsore, parcè a mi pareve, ma no dome a mi, une storie propite biele, di chês che ti spalanchin il cûr e ti fâs vignî ju une lagrime di comozion. Cusî almancul a mi mi sucêt. A Frank o devi di che a Contecurte o vevi mandât copie de traduzion in marilenghe e po le ai metude sul blog di "Vespanda". Jo falopis non fâs di sigûr, che di muse an di ai une sole! A prest Maurizio Di Fant

    P.s. Sul blog di http://www.Vespanda.com o cjatarês un salût par dûc i amîs di "Contecurte" de bande di Rapetti! E savint che "Contecurte" e siere par un pôc, o podin cjatâsi ancje li, si volês, ogni tant.

  • Scusait, o volevi ancje dî che la conte par talian a la veve metude su Vespanda, Ilario Lavarra e jo o i vevi dite che il vinç di Mai, juste a un an de so partence, i varès fat un regâl, chel di voltà la so storie in marilenghe e cusì o ai fat. Maurizio Di Fant

  • @Maurizio Di Fant, la storie a è propite biele! Jo, se tu mi dâs il permès, le inserîs sul blog di Done Bete, metiint naturalmentri ancje il link de storie origjinâl. Tal miò tinel tu sarâs il benvignût!

  • Al è biel viodi che si propon di:
    – lâ in polse cence di fat lâ in polse e lant indevant a publicâ,
    – tornâ cun gnove int
    – meti adun gnovis rubrichis
    e a la int "no i plâs"
    🙂

    @Maurizio
    No, la possibilitât di dividi lis contis in 2-3 puntadis no à nissun sens.
    Un pôc parcè che no sarès plui contecurte, un pôc par che e je propit contrarie a la idee che al è nât il blog, un pôc par che 'nd è tantis pussibilitâs e altri puescj dulâ che si pues publicâ robe plui lungje e anzit, mi pâr che intal tinel de Dame tu âs cjatât un puest une vore onorevul! 🙂

    Su altris robis plui lungjis, insome dai… proponinus di començâ a meti robe lungje in 2-3 tocs al è come vignî in Ostarie a spostâ la mobilie 😀
    (e po nol sarès just tai confronts di chei che fin cumò nus àn mandât robe lungje e ur vin dite di no 🙂

    @Dame
    Wall street lu fasarìn tramâ! 😉

    @Frank
    tu devis vê sbaliât persone
    Sun dru thi al è un musicist che al sune cul Checo… e al à comentât di une altre bande 😉

  • Par setembar us siguri che o partarai in ostarie un pocjis di damigjanis di chel sclet che o prodûs te mê piçule vigne. Us contentarai, no stait a preocupâsi…
    Lis contis lungjis o dividudis in tre a son masse pesantis… a van ben pes leturis publichis… 🙂
    Buinis feriis a ducju cuancju di Kekotam

  • No soi tant vuarb di no velo viodut, satu GeloGelo, ma, tant par zujà e dì une monade (come simpri e simpri plui dispess, che tant mi perdonais par vie co soi nononono), mi ven di dì "Par un Friul plui furlan" digitait par italian 😉

  • Dame@, mi sta ben che tu metis la conte sul to sît, e mi fâs grant plasê il to invît che, o aceti cun grant plasê! Buinis ferîs a ducj. Maurizio Di Fant

  • Mior ancjemò so ses in feriis, eh, che chì…
    http://varesenoir.wordpress.com/
    spesseà, che il romanzut si lu lei in mancul di tre oris, e a Contecurte di letors acuarts… 500,00 euros!
    Mandi

Leave a Reply to Frank Spada Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît