CUATRI STAGJONS DAL AN
Contis de disincressite
CE LIBRI ISAL?
“Cuatri stagjons dal an” al è un libri di contis scritis di Gianfranco Pellegrini.
Si trate di un librut picinin (11.5×17), incartonât in brossure, di 78 pagjinis, vignût fûr pe cjase editore Kappa Vu tal Otubar dal 2010. Il titul al è peât aes cuatri contis principâls, une par stagjon, ma dentri ’nd è ancje altris dôs contis plui picininis – publicadis inte lôr prime version su la nestre Ostarie – e une jentrade di Bepi Mariuz. Lis cuviertinis a ripuartin dôs temparis di Evaristo Cian.
MA CUI ISAL L’AUTÔR?
Gianfranco Pellegrini al è dal ’54, al à vivût a Manzignel e Tresesin, ancje se al è nassût a Cormons e cumò al è a stâ a Val di Reane. Si è laureât in filosofie, a Triest, ma la sô passion pes tecnologjiis, pe logjiche e pe algjebre a doi valôrs lu à puartât a cjatâ lavôr intal cjamp de informatiche. Convint che la scriture e sedi il just completament par considerâ “uman” il discors, al à vût insegnât furlan e al à publicât contis sul Strolic e su lis rivistis Sot la Nape e La Comugne.
Cumò al è preseât garzon de nestre Ostarie e al à in progjet un altri libri come chest, che al vedi dentri contis di fantasience.
MA CE ISAL DENTRI, DI PRECÎS?
Dutis lis contis presentadis a metin dongje temis diferents, ma che a àn ducj in comun il passâ dal timp e lis stagjons de vite dal om e de societât, in gjenerâl. Gianfranco al scrîf cuntun furlan une vore net e elegant, che al fâs risaltâ lis ambientazions e lis descrizions dai personaçs. Al cjape ispirazion de tradizion par contâ emozions. Inte prime conte, par esempli, al somee che al vedi voie di contâ di un pari che, cun so fi, al veve cirût di brusâ nuiemancul che une strie ma, lant indevant a lei, si capìs che il cûr de conte al è il dismenteâsi dal om, sdrumât malamentri de tecnologje e de modernitât, dal rapuart cu le nature e cu la bielece des piçulis robis di ogni dî.
Cussì ta chês altris contis, dulà che al somee che si cjacari di aganis, di drâcs o di fantasimis, ma a la fin si conte il pericul che l’om al deventi simpri plui frêt e lontan dai sintiments.
MA A CUI PUEDIÂL PLASÊ?
Al plasarâ di sigûr a chei che a gjoldin de biele scriture in marilenghe, fate di peraulis e mûts di dî che in dì di vuê a corin il risi di lâ pierdûts. Al plasarâ ancje a chei che a àn gust di sintîsi contâ une storie che e misclici il savôr romantic cun chel de modernitât, cence dismenteâsi di meti dentri un tic di fantasie. In fin, al sodisfarà chei letôrs che a presein i libris che, in bande de storie, a àn ancje diferents nivei di leture, che si cercin cuntun lei fat di polsis e riflessions.
E SE O AI VOIE DI CJOLILU?
Facil! Al coste 10 euros e tu lu cjatis intes librariis furnidis di leterature furlane (come la Friuli, la Ribis, …) o li de sede di Radio Onde Furlane. Se no ti va di distacâti dal ordenadôr tu puedis ordenâlu sul sît de Kappa Vu o ben su ducj chei altris sîts dulà che si comprin libris (ISBN 978 88 89808 84 9).
Let in Ostarie dal Ostîr
5 comments On Lets in Ostarie: “Cuatri stagjons dal an”
A pene chi passi par Udin o lu compri!
Pardabon un libri che al merete.
Par doprâ une metafore di ostarie o podaressin dî che al è un di chei vins di meditazion che a van gjoldûts a planc par rivâ a preseâ miôr dutis lis sôs sfumaduris. Ancje se si à la cussience che la seconde leture – o volevi dî la seconde cerce – e fasarà scuvierzi dal sigûr alc che te prime al jere scjampât.
Compliments a Gianfranco!
Carli
migo al è deventât garzon dibant… 🙂
Carli, graciis.
E graciis ancje a Gjêl, che nol piert ocasion par meti in mostre la mê "creature" e al smicje a fâmi vendi 40.000 copiis, il limit minim che Philip Dick al diseve che un scritôr al à di rivâ a vendi par podê dî di vivi cu la sô opare 😉
Pingback: CONTECURTE 1511 e UNE VORE DI CONTIS | Contecurte ()