Contis a Sant’Andrât, la cronache

Il vuestri Ostîr al veve un pôc sierade la cuistion de serade di Sant’Andrât, di front ae Pasche e a dutis lis altri robis che a vegnin daûr, a scomençâ cu la serade li de Tarantola, joibe di sere, ma ve li, che su richieste di Bepi, che al è di Sant’Andrât ma al è a stâ fûr de Patrie, bisugne contâle. 

E alore vele chi, la cronache de serade di joibe, a Sant’Andrât.
Joibe di sere, joibe sante, e si saveve, e di fat, si veve preparât sedi une conte inedite, di Pasche, e un ghiringhel in teme… ma no si podeve proviodi che e fos ancje la partide de Italie, a Udin, e che la messe di ordinance e capità propite a chê stesse ore tarde e che Talmassons nol podès concedi la sale in paîs e si scugnìs fâ la serade a Sant’Andrât (che o vin scuviert, nol è nancje sul Tomtom 🙂 )… Nuie pôre; si tache plui tart, cuasi a 9, ancje parcè che prime di tacâ i vûl contât un pôc di dietro le quinte..
1) I in doi in rive e no tocje a son un sôl In rive e no tocje, parcè che al veve confondût une serade cuntune altre e podopo, vint ancje lis provis di fâ, no si è stâts in câs di recuperâ chel altri (sucêt cuant che si à a cefâ cui artiscj 🙂
2) il microfon de sale si è impegnât a lâ ben fintremai cinc minûts prime dal event ma dopo cualchidun  al devi vêi spudât parsore e vêlu ofindût e lui al à metût il mustic e nol à funzionât plui ben
3) Scomençânt plui tart o vin decidût di taiâ une conte inedite che si clamave Agnui… ma nus reste buine par une serade che e vignarà
4) Ostîr, famei, cjantôr e camarele a àn pensât ben di lassâ une conte cence companie musicâl par podê dediâ un pôc di timp a lis polpetis cul sclopit e un tai di blanc… insome, a son prioritâts, te vite e a van rispietadis

E dopo dut chest, o vin tacât.

Sale cuasi plene cuntune cuarantine di personis stiçâdis ancje de curiositât di sintî lis storiis dal lôr paîs.
Prin di dut une vierzidure di bande di Katia Odorico a non de Associazion Lidrîs furlanis, di Talmassons, che nus à ospitât e e à inmaneât cheste rassegne di Cuatri cjacaris cul autôr.
Po dopo o vin tacât cun Jacum Trevisan, nestri contecurtâr, che o vin scriturât come presentadôr, obleantlu a lei il libri in pôcs dîs e difat, par fâ viodi che lu veve let, al à fatis un grum di domandis inteligjentis, cuasi che l’Ostîr, come par meracul vistût vonde ben, al fos un vêr scritôr. 
La prime conte e je stade Pipins, ambientade intun curtîl di Talmassons, e incredibil, dopo la prime conte, lete di Checo come par solit benon, e je stade parfin une domande al ostîr, che al à scugnût confessâ che lis contis lis scrîf subite par furlan e non son scritis prime par talian e dopo voltadis.

Dopo cualchi cjacare cun Jacum, che al à volût savê alc di cemût che a nassin lis contis, e je stade la volte di Anin, une conte a doi plans temporâi lete a dôs vôs e cui frameçs musicâi dal nestri Cjantôr, cun armoniche e ghitare. 

Anin, cun di plui, e je stade ancje la prime conte di famee scrite, e no jere stade mai lete in public, e a part i problemas di acustiche, no nus pâr che e sedi vignude mâl.
Dopo cualchi altre cjacare, e je stade la volte dal cjantôr, che nus à sunât la sô top hit “Cjasottis” che no si intitule cussì, ma che nus plâs clamale cussì.

Tierce conte de serade, une conte sui Yokai gjaponês, ancje cheste che no je tal libri, e ancje cheste lete di Checo, che si è divertût une vore a fâ la part di un frut che al scoltave lis contis di so nono “un pôc fûr cul cjast” e che però ae fun de conte lu puartavin in ricovero… ma il frut al veve benzà pensât ce fâ. Titul de conte? Svindic!

E par finî, la conte inedite, di Pasche, che e jere une ricete platade sot forme di conte e e insegnave a meti adun la colombe, chê di une volte, che no je tan dolce e che e somee al pan, ma che si fase a forme di colombe, cul ulîf benedît tal bec e un ûf su la schene, sierât dentri. 
E la gnove e je che la conte inedite e je stade lete de ospite a sorprese de serade: Lussia di Uanis, nestre camarele de osterie.
La conte no savìn se e je plasude, ma lis colombis preparadis de mari dal ostîr, lis polpetis cul sclopit e la fertaie, al pâr che a fin serade a sedin plasudis avonte, jessint che nol è vanzât masse.
E dopo?
E dopo nuie, dut ben parcè che la int e à cjolt i libris, e je vignude a domandâ alc o a complimentâsi cul ostîr, e come par solit si è scuviert alc di paîs che no si saveve e che si podarà doprâ par modificâ lis contis. Insome… une biele serade, dulà che si è rivât a misturà culture, narative, contis curtis, lenghe furlane e un moment di stâ insieme cuiets a fâ cualchi cjacare, che nol è mai di butâ vie.

7 comments On Contis a Sant’Andrât, la cronache

  • o jeri lì, a Sant'Andrat: o vevi lavorât come une musse dut al dì, pur di vuadagnâmi chel "sì", chês dôs oris di libertât da l'anime (anime furlane intun scus di piavote) e…o 'nd ài gjoldût ducj i moments come une frute, moments di gjonde, di comozion, di vôi lustris, di ridi e di ingropament dal cûr…A cjase cun me al é rivât ancje il librut di Rafaêl, ma no podarai mai dismenteâ chêl che che o 'nd ài viodût e sintût..biel e po' bon !!!!! (a Çarvignan a disaressin "bielonon")

  • Se no fos stât in malatie… Malandret ancje il miedi. Sarâ par la prossime volte!
    Ce nervo!

  • Gelo, soi tant content ch'a sedi lade ben e soredut che la sale a sedi stade plene. A vevi fate un pocje di propagande cun chei dal CAST di Talmassons e cui parincj, parcè che chês Contis di famee, ch'o lei e torni a lei, a fasin tornâ iniment robis che nissun al penzarès al di di vuê, come il Diaul, Gusto e Anin. A mi somee parfin di cognossi Agnul chel dal pes lusorôs. Ti dîs dome che, cun dut il ben ch'a i vuei a Sant'Andrât, jo soi propri di Talmassons. Mandi e graciis di cûr de croniche. Bepi

  • Cuant che o viôt l'avîs di ognidune di chestis seradis inmaneadis dal Ostîr e la sô biele compagnie contecurtarie, un sgrisul di nostalgjie mi travierse dut il cuarp, o volarès sei li e gjoldimi lis contis, la compagnie de int, la fertaie e lis polpetis cul sclopit… bagnant il dut cuntun bon got di blanc.
    O rimiedi a dute cheste fantasie; no sierant i voi, ma leint il rindicont che ogni volte al fâs l'Ostîr.
    Buine Pasche

  • MAndi Bepi, Galliano, Barbara e ducj in gjeneral. Cjalait, jo no pues che dius graciis, parcè al è propit par chei come voaltris che al è biel tigni bot e là indevant a conta storiis e meti adun alc di biel, chi sul web o ator pal friul. Grassie!

  • Il plasè di savè che le nestre ostarie e ven stimade, cresude, e cognossude,graçis a le abilitat dal ostir,famei,e camerele, a met plasè e braure ancje a noaltris frecuentadors.E cumò cin, cin,cun chel bon vin SANT SIMON. Lussian

  • Mancjavin dome cuatri bagjigjis, piruçs, miluçs e coculis e parcè no, la bande di Madrîs. Di bevi o sai che nol mancjave. Alore si che sarès stade gjonde par dabon. Ma lu stes no podês lamentâsi. Doman,il dì di Pasche, il soreli al spacarà ancje i claps. Cussì ducj a fâ cori i ûfs. Buine Pasche tal sut.
    Nello Malisano

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît