4 di Avrîl dal 2024

Zaraton a San Zuan

San Zuan dal Nadison, ai 4 di Avrîl dal 2024
Villa de Brandis

Serade furlane inte suaze de Fieste pe Patrie che e fevele di Friûl che al sdrume dut il Friûl… si puedial fâ miôr? No ve po! E in gracie de poie de Kappa Vu e dal Comun di San Zuan dal Nadison, o vin pardabon fat miôr che o podevin, li de Vile de Brandis, par presentâ il libri plui catastrofic dal 2023, Zaraton, dal nestri Ostîr.

Il spetacul aromai al à scomençât a cjatâ la so dimension… i media e i social di une bande, cun ducj chei soversîfs de Ostarie che a fevelin milante lenghis e nus contin dal mont; e di chê altre bande l’Ostîr, dentri tal cercli dal futûr, che nus conte di un doman che al podarès sucedi.

E la storie, potente e simboliche, che cui che al à let Zaraton aromai le cognòs ben. E cui che no lu à let… al fasarès ben a leilu! Eh sì, parcè che almancul stant al gradiment di chei che a jerin a viodi al somee che il spetacul/presentazion che al met in sene il libri, contant un toc de storie e disniçant cantins plui che ti sticin a savê cemût che e va a finîle, al sedi une vore bon. Si fâs cualchi ridade, vere, ma soredut e je maravee e une vore di critiche sociâl dal dì di vuê.

Di une bande, prime il telegjornâl dal Muini Stiefin e dopo lis testemoneancis di ogni bande dal mont de Sartore Astrid e simpri dal Muini a àn compagnât lis peraulis dal Ostîr, autôr che si è fat judâ dal fidât famei par inmagâ lis orelis e meti denant dai voi la sene…

E il dut insiorât des imagjins che a corevin sul schermi, cul fumut di Zaraton, e des musichis fatis partî de gjatemarangule… E dut câs, in gracie de buine preparazion e de suaze di lusso, e je stade une prime volte a San Zuan dulà che si sin divertûts e o vin vude sodisfazion. Tant al è che si sin bielzà prenotâts cul Sindic par fâ alc ca di doi agns, tal 2026, cuant che San Zuan al sarà la suaze pe Fieste de Patrie.

E cussì… Zaraton al va indevant a vogâ intal mâr de fantasie…