Un viaç tal Cryptofriûl – Vueris di mont a Muçane
Muçane, ai 21 di Otubar dal 2022
Villa Muciana
Cryptofriûl, il libri dal Ostîr publicât intal 2021, nol à ancjemò fermât di lassâsi puartâ ator pal Friûl, e doprant il formât de trasmission televisive, o miôr, dal talk show cun ospits e intervents dal public, al è rivât ancje a Muçane.
La location, la biele sale consiliâr di Villa Muciana, e je stade savoltade ben e no mâl di noaltris de osterie par rivâ adore a meti adun un set televisîf e la Sartore, in scuadre cul fi dal Berlon e cun tante fantasie, e je rivade a fâ funzionâ un proietôr che al pareve propite no vê voie di fâ il so mistîr.
Ma a part di chest inconvenient, la serade e je partide puntuâl come simpri e come simpri sot la direzion ferbinte di Raphael Seraphin. Intan che al fevelave di maravee, di vueris, di magnis di mont, di riviel e di milante altris robis, i siei ospits a àn intorteât il public presint e lu àn tirât dentri nuiemancul che intal Cryptofriûl.
Par jessi plui precîs, o sin rivât di Muçane a Sauris e dal 2022 al 1978… un biel viaç, nuie ce dî! E chest dut in gracie di Astrid Wirilgren, Françoise Tamì, Serene Vögelin e Margreth Cogoviç, par no dismenteâ il preseât contribût di un vip intal public, Mike Berlon, merecan di divignince furlane che al à puartât provis in-con-fu-ta-bi-lis che la magne di mont no je inmò estinte.
O vin scoltât tocs dal libri, cronachis dal an 1978, descrizions zoologjichis di une bestie pardabon scalembre. Insome… la puntade numar 2, proponude pe seconde volte, e à fat la sô biele figure, e lu podês viodi ancje des tantis fotos che nus à fat Stiefin Panarie, presint in sale.
In sumis… e je stade propite une biele serade e sperìn che chei che a jerin a viodi si sedin divertûts e soredut… maraveâts!
Dutis lis contis
Un dramma condiviso raccontato con poesia