Lis Contis dal Mês – la scree

Talmassons, ai 21 di Zenâr dal 2023
Agriturisim Pituel di Talmassons

Cheste e je dal sigûr une des seradis plui ben jessudis e partecipadis de nestre Ostarie e al è just che si podedi viodi un biel pocje di robe, in cheste pagjine di int in cjar e vues! E alore continle dute, la serade, che e jere un spetacul restât unic, par la presentazion di chest libri, e che al è stât une vore divertent in imbrucjât.

Ma di ce libri fevelino? Eh, bon, clare, Lis Contis dal Mês, il prin libri saltât fûr de nestre Ostarie, autopublicât, scrit dal Ostîr, par ce che al inten aes contis, e de Coghe, par ce che al rivuarde i articui di aprofondiment, ma che dentri (e fûr) al à contribûts di dute la clape dai soversîfs di Contecurte. Se o capitais achì dome cumò, us disin subit che chest al è un libri che al deventarà storic, tal sens che lis sôs contis a son stadis scritis e ambientadis intal Friûl dal 2020 in prese direte, contant propit ce che al sucedeve li ator, e ancje se lis storiis no àn nuie a ce fâ cul infet, al è clare che o fevelin di lui. In sumis… par cui che al vûl viodi lis robis di chê volte a ment frede, stant lontan e cirint di capî i sintiments che a torzeonavin pes animis de int in chel an, chest al è il libri just.

E la scree no podeve jessi di mancul, stant a chestis premessis. Ven a stâi che o vin savoltât dal dut il cliché des presentazions, e invezit di fâ domandis ai autôrs a son stâts i doi autôrs a fâ lis domandis ae int dal public, discuvierzint a planc a planc il libri in ducj i siei cjantons. E cussì a son saltâts fûr: la Sartore Astrid, a contânus dut ce che si cjate tal libri, mês par mês; la Massarie Margarite a spiânus ce che e à imparât sul pignarûl; il Famei Checo a spiânus e leinus lis ghost-contis; il Berlon Michêl a fâ il purcitâr; Jacum e Ricart a mostrânus i dissens origjinâi dal librie ae fin, cemût al podevial mancjâ, al è stât un contribût di Lupo Manarie.

Cuntune conte inedite e cul jutori de gjate marangule o vin preparât lis peraulis in crôs che a àn disvelât i titui di dutis lis 12 contis dal libri.

E a tignî adun il public, nuiemancul che i doi autôrs, Rafaêl Serafin e la Fuguline, une vore contents di vê metût su cjarte cheste lavôr che ju à stracâts par un an intîr e che, insom insom, al è saltât fûr avonde ben. E dongje dal libri ai prins che lu an comprât o vin regalât ancje il lunari in edizion limitade cui dissens dai mês (se us covente il libri, baste scrivinus!).

Inte stesse serade si è fate ancje la premiazion dal prin campionât di CorseCurte, ma par chest us rimandìn al articul za publicât timp indaûr…
Di suaze al event, l’agriturisim Pituel di Talmassons, simpri pront a tignî a batisim lis iniziativis de nestre Ostarie!