Romans dal Lusinç, ai 23 di Avrîl dal 2024
Casa Candussi Pasiani
Cuant che o vin vût pes mans il libri di Contecurte, La Stagjon des Contis, une des primis robis che nus è vignude tal cjâf e je che al jere un libri perfet par cui che al à voie di usâsi a lei par furlan, o che lu stâ studiant, o che insome, nol à timp di frontâ libris impegnatîfs ma al à gust di lei par furlan. In altris peraulis une vore di chei che a son i corsiscj dai cors di furlan inmaneâts de SFF. Par chest, cuant che Michêl Vuardianut Calligaris, contecurtâr di vecje date, al à domandât al Ostîr se i faseve un spetacul presentazion te date de consegne dai atestâts ai corsiscj, chel al à acetât ancjemò prime di domandâ a Chei soversîfs di Contecurte.
La robe biele e je che te serade de presentazion di La Stagjon des Contis, il libri de CorseCurte22, te sale de Cjase Cjandùs Pasian, propit li dal Comun di Romans, a fevelâ dal libri e lei alc a jerin une vore di nô.
Al jere il Famei, Checo Tam, no vûtu, che dopo vê let une conte di Enrico Tomasi, alias Barba Pisul Stentadizza, Gjespui, gjavade dal mês di Avost, al à ancje zontât une spiegazion leterarie a lis poesiis in lenghe foreste e misteriose, letis dal Ostîr.
E jere la Sartore, Astrid Virili, che nus à let une sô conte dal mês di Novembar, Un amôr insumiât, a teme Cricâ dì, ancje se cuissà cuant che e crodeve di vêle scrite… e dopo al jere ancje il nestri mestri, Zuanluche Franc, a fâ la part di rapresentant de SFF, ma za che al jere lu vin fat lei Il non di mê mari, di Laurin Zuan Nardin. E dut câs, o vevin in formazion ancje il Muini, Stiefin Stefanut, che come simpri al à fat lis fotografiis vignudis ben che o podês viodi in cheste pagjine, ma al à ancje let une siore conte de Fuguline, la vincidore de Corsecurte, nuiemancul che la nestre Coghe, che nus fevelave di Creance. E dopo, fat vignî jù di pueste di Glemone, il nestri Berlon Michêl Londar si è cimentât intune conte sperimentâl che no vin vût inmò il coragjo di meti sù su la Osterie. La Regjine (Maarg Brazorf), une vore preseade dal public, cundut dai siet nanui de storie che a fevelavin cun difiets di pronunzie… Finide?
Ma ce! Al jere ancje il nestri peteçon, Alessio Ecoret, che no si è inmò stufât di inzornâ il nestri instagram (simpri plui biel!) e al à fat un toc in cubie cul Ostîr par presentâ lis Ontecurtutis, e nancje par dispiet a son saltatis fûr lis plui crudis e politically scorrects… Ma ce vûstu, come che nus à dite la assessore, a fin spetacul, si viôt la direzion che al va il furlan in di di vuê (pecjât che chel benedet dal Ostîr i à rispuindût “A remengo”).
Ae fin ce vino di dì, che la int e je dute contente, che plui di cualchidun al à vût il plasê di cjoli il libri e o sperìn che al vedi ancjemò di plui il plasê di lei lis nestris 60 contis.
Anzit… o vin pensât che se o sês ca, inte pagjine In cjar e vues, si meretais di leile, cheste conte sperimentâl. E alore discjamaitle di ca sot!
