Montenars, ai 21 di Fevrâr dal 2023
Agriturisim Al Tulin
Chest al è stât il prin pas dai spetacui di presentazion par il nestri libri Lis Contis dal Mês. Par promovilu e puartâlu ator o vin pensât di inmaneâ un Quiz, ma no un quiz cualsisei, ma un zûc che al varès decretât il campion furlan di furlan! Une sfide galatiche dulà che doi sfidants a si devin cuintri a fuarce di domandis cjoltis dal libri, mês par mês. Clare, al coventave un presentadôr o une presentadore di gale e soredut un espert di furlan, par dineâ o confermâ lis rispuestis. E ancje cualchidun che al leies i tocs doprâts par fa lis domandis. E noaltris cui sino lâts a cjatâ?
Alore, int maraveose che dal sigûr o cognossês…
FOGOLINA SERENI, grande presentadore, rivade a saltâ fûr dal trafic e a rivâ in timp (ancje un pôc fûr timp, dai) e à tignût bot a dutis lis monad… rispuestis dai concorints, soredut un.
TAMO FRANCESCHI, famôs par vê ispirât la cjante Ho scritto Tamo sul savalone, al à let i tocs dai mês di Fevrâr, Jugn e Otubar (ma ancje un fregul di Dicembar).
I concorints a son stâts un rabiôs e sustôs SERAFINO RAFAELLI, cuntune felpe che e contave za dut, che al rispuindeve a dut ma no si pues propite dî che… al saveve lis robis, disin cussì. Di chê altre bande GALLERIA GIORGI, che invezit e someave une vore plui istruide ma si sa che cuintri il cool al è pôc ce fâ e par un pêl e je lade a risi di pierdi. (Ma dopo e à vinçût eh)
Impressindibil par la serade al jere l’espert di furlan, LONDAR MICHELI, che al à spiegât falopis e robis justis su lis tradizions furlanis, dopran la bibie dai esperts di furlan, ven a stâi propite LIS CONTIS DAL MÊS, il libri dal Ostîr Rafaêl Serafin e de coghe Fuguline, ogjet de serade.
Serade che e je stade inmaneade cu la poie de Associazion Ostermann, inte rassegne Aperitivo con l’Autore, e stiçâts di Silva Ganzitti, che nus à introduzûts cence savê ben ce che o varessin cumbinât.
La suaze e je stade bielonone, stant che o vin fat il spetacul intal agriturisim Al Tulin, puest maraveôs e dulà che, a fin serade, o vin ancje mangjât une vore ben!
Ma juste par contâ alc di dut ce che al è stât tirât fûr dilunc dal quiz, jenfri une pivetade e chê altre cui nestris botons modernis, us disin che si è fevelât dai tomâts e des tradizions dal carnevâl, podopo dal mac di San Zuan (stant che intal libri si cjate ancje lis istruzions par fâlu) e po dopo de gnot de Vilie dai Sants, cun dutis lis sôs pôris… Par ultin, tant che stuzighet, o vin ancje fat vignî un krampus.
Come prime prove dal Quiz dai mês, in sumis, nus pâr lade une vore ben.
E ve ca un pocjis di fotografiis dal nestri fotograf, STEFANUTTO STEFANI
- Lis Contis dal Mês – La croniche
- Articul di lanç de serade
- Lis Contis dal mês – IL LIBRI
- Dulà comprâ il libri
