1 di Setembar dal 2026

ScueleCurte_Furlan09: Checo Tam, il Cavalîr Scûr

Scomencin chestis lezions sui autôrs furlans vîfs cuntun scritôr che invezit i plâs esplorâ ancje il mont che al sta di là. Checo Tam difat nol è dome un scritôr, ma un viazadôr psicogjeografic, che cu lis sôs contis nus mene a torzeon jenfri timp e spazi, dal cjast di so barbe al vueit cosmic, de Ete di Mieç a la fin dal mont, fìssade intune sô conte pal 2036!

Al è ancje un artist performatîf. No dome parcè che al è stât il cjantant de band dark wave Francis and the Phantoms e di chê punk Soglia del dolore e vôs radiofoniche di centenârs di puntadis di Indigo, trasmission di cult tal palinsest di Radio Onde Furlane, ma soredut parcè che al è un letôr catartic e teatrâl des sôs contis. E infìn al è un model di stîl: scarpis gruessis (e çurviel fin…), vistîts scûrs, gjubots militarescs e claut di piel nere, muse blancje e sbarbade, çufut simpri a puest. Cjatassal denant cussì, tant che al lei passant di un sunsûr a une sberlade, di une scjassade di braçs a une pestade cu la scarpe sul paviment, par marcâ miôr i moments de storie che al lei, nus fâs capî che o sin denant di un personaç pardabon unic tal panorame leterari furlan.

Checo Tam al è nassût tai agns ‘60 e al è simpri stât a stâ a Pavie di Udin, duncje al à cussience di ce che e jere la vite di un paîs contadin, ma al è cressût a television, publicitât e telefilms, rivistis di costum, musiche lizere e dopo al à miscliçât dut chest cu la musiche e la culture alternative, punk, dark, new wave, ambient, e dut chest al jentre te sô scriture che e ten adun il borc di Selvucis, la fantasience, lis catedrâls gotichis. Elements che a fasin part di monts diferents ma che a son dentri di lui, dentri dal so cjâf, e che lui al ten adun scrivint, intun caos ordenât.

Il so prin libri al è La maree nere e altris contis (Ribis 2001), vincidôr dal premi San Simon tal 2000, dulà che al conte i siei viaçs al festival Gotik Musik Treffen di Lipsie, la sô passion pe musiche dark e l’inzirli che i sticin lis musicistis e scoltadoris dal festival.

Dopo je rivade la sô opare plui ambiziose, Sense, libri e radiodram, publicâts intune confezion di carton neri di Cormôr Salvadi tal 2002. Une storie nassude da so amôr pes leturis de fantasience americane dai agns ‘50 e ‘60. Chê dai missilons a suposte e dai UFO. Un amôr saltât fûr in gracie des leturis fatis di frut, cuant che al viveve intune vecje cjase di so barbe, plene di libris e di fumuts.
La storie e je chê di Orgnan di Selvucis, che al vîf intun Friûl distopic dulà che il vin al è proibît intant che il paisaçs al è sfodrât di cjamps di cjanaipe (cannabis). A un ciert pont Orgnan al ven puartât vie di cuatri bielis alienis sul planete Venus par fâ di “samence”. Lui al sperarès che la operazion e vegni fate intune maniere erotiche ma no sarà cussì, par dopo sedi tornât a spedî su la Tiere cuntune sorte di tîr di fionde. E li al ven a cjatâsi intune altre Ete di chê di partence e vie indenant cussì a salts spazi temporâls fin a tornâ a finîle te sô cjamarute cubicul spaziâl. Insumis in Sense al è dut Checo Tam.

Dopo a son rivadis altris dôs racueltis di contis pe Kappa Vu: Scûr di lune tal 2008 e Disvuedant il scansel tal 2017. La prime e je plene di concierts, di aliens, e de Sagre dai Pirus sul sfont di un Friûl post contadin e post dut. La seconde e je un viaç a rote di cuel jenfri storiis di dutis lis sortis, tiradis fûr di un magjic scansel di un mobil sul cjast dal barbe. Un zûc leterari, dulà che l’autôr al tire dentri ancje i letôrs fin a une “Apocalìs” finâl.La fin di dut? No mo! Tal infinît intrategniment di Checo Tam dut al torne simpri a scomençâ.

Tantis altris sôs contis si puedin cjatâ achì su Contecurte e, intant che o leieis, o podeis doprâ tant che colone sonore chestis musichis dulà che Checo al cjante cul sorenon di Francis o cui Soglia del Dolore.

Ma soredut scoltait la sô meraveose intrepretazion di Biello Dumlo, un dai prins componiments in lenghe furlane, tal disc Lingua dal grup inglês In the Nursery: