1 di Setembar dal 2026

ScueleCurte_LengheForeste09: Tullio Avoledo, un che al vîf tal indoman

Us plasino lis storiis distopichis? E la satire sociâl? E il Nord-Est talian tant che ambientazion di criticâ e gjoldi, cu lis sôs magagnis ma ancje cu li sôs unicitâts? Ben po… al è un autôr furlan che al va a gnocis cun dut chest e no si pues no leilu, se il gjenar al è tra chei che us plasin di plui. Lu vês za capît, o fevelìn di Tullio Avoledo.

Tullio, za dal non, al è furlan, parcè che cui nol à un barbe o un nono che si clame cussì, e al met dentri il Friûl tes sôs oparis fintremai de prime che al à scrite, tal 2008, ‘L’elenco telefonico di Atlantide’. Il libri al è un “must” par i passionâts di fantascience sociâl taliane e pes contis inte province. Juste par fâus capî di ce che al fevele, o vin un bancari di Pordenon (di cognon Trevisan) che si sint ce che al pues sintisi un bancari tor la fin dal secul passât, ven a stâi un fruçon grîs dentri dal grîs de burocrazie bancarie e finanziarie. Ben po, di li, dopo la discuvierte di un elenc telefonic une vore scalembri, cun int che no esist, int che a sparìs dal puest di lavôr bot e sclop, operazions misteriosis e cence sens, al tache a sucedi di dut. Un thriller psicologjic che al misture aliens e il mît di Atlantide, ma ambientât intun condomini di Pordenon furlanissim.

Ma il Friûl al torne dongje a fuart ancje in “Furland”, opare ucroniche dal 2013, dulà che si imagjine che la regjon e sedi deventade un parc di divertiments grandonon, dulà che il protagonist, tant par dî, al lavore vistût di nazist inte “atrazion” dal Kosakenland. Al rive Zorro, nuiemancul, un che al discrote lis finzions dal parc e al met in clâr la opare di distruzion che a fasin, e di chê strande, inte cjace ae sô identitât, si met devant dal nâs dal letôr une critiche feroç al populism, al capitalism, al turism di masse che al consume parfin la memorie, in bande che il teritori.

Po dopo, par sierâ la presentazion di chest autôr furlan che al scrîf une vore ben in lenghe foreste, us contin alc ancje de sô trilogjie apocalitiche ambientade tal Metro 2033, un Univiers dal futûr creât dal scritôr rus Dmitrij Gluchovskij, fat su di desenis di libris e dulà che il nestri Avoledo al è l’unic talian invidât. I trê libris a si clamin “Le radici del cielo (2011)”, “La crociata dei bambini (2014)” e ”KONG/Il conclave delle tenebre (2019)” e a contin dal viaç fisic e spirituâl di un predi incuisidôr membri dal Vatican che fra Rome, Lombardie e Russie al cîr di saltâ fûr dal mont vanzât dopo il davoi nucleâr. Atmosferis similis a “La strada” di McCarthy che a tachin cun la mission di salvâ l’ultin Patriarcje (nuiemancul) passant sot tiere di Rome a Vignesie. In sumis… il frico che al mangje Avoledo al devi jessi une vore ben cuinçât par tirâ fûr ambientazions e storiis come chestis.

E di lui o cjapin il teme e la ispirazion pe materie lenghe foreste e par scrivi la conte di chest mês di Setembar a ScueleCurte. Ucronie, critiche sociâl, fantasience, distopie… dutis peraulis e temis che a sticin ideis, che dal sigûr, il dificil, sarà fâlis stâ in 2000 caratars.

Po dopo, o savin che Avoledo al à scrit altris robis, ancje di gjenar diferent (par esempli un noir che al à vinçut il premi Scerbanenco par romançs) ma a noaltris nus stice il so cantin plui fantasiôs e dulà che il Friûl, di spes, si cjale dentri cjalantsi indenant tal timp.

Par sierâ, juste par fâsi une idee, o lassi ancje l’incipit dal prin libri de sô trilogjie ambientade tal 2033:

Roma nel 2033 è una città morta, uno scheletro di macerie devastato dalle bombe atomiche e dal tempo. Sotto la cenere e tra le rovine di quello che un tempo era il cuore della cristianità, la vita ha preso forme grottesche e deformi.

Nei sotterranei della capitale, tra catacombe dimenticate e vecchi tunnel della metropolitana, sopravvive una piccola e disperata comunità guidata da ciò che resta delle gerarchie ecclesiastiche. Il mondo in superficie è diventato un inferno radioattivo popolato da creature mutate e predatori, dove il cielo non è più promessa di salvezza, ma una minaccia costante da cui nascondersi.”