CC26Setembar#05 – I voi

#05 – I voi

Il ricuart plui biel di Margarite, di cuant che e jere frute, al jere cun sô mari.
Al jere chel di lâ a cjapâ i gjambars te Poçate, in chê volte che nol jere ancjemò proibît. Al jere biel parcè che e leve cun sô mari. A levin cuntun baston tun sfuei di aghe ferme, li dongje, di Istât, e cuant che a viodevin un crot o un ‘sâf lu copavin, se chel nol rivave a scjampâ prime. Dopo a fasevin cemût che i vevin simpri insegnât: cuntun britulin a taiavin adôr adôr la piel de schene de besteute e le sledrosavin par denant, sul cjâf: a vevin di taponâ i voi, parcè che se il gjambar al ves viodût i voi dal crot, par un bon toc al varès ancjemò pensât che il crot al jere vîf e no si sarès tirât dongje. Dopo lu metevin tal tramai e il tramai ta la aghe de Poçate, frede ancje di Istât. E a stevin insiemi, a zuiavin, sô mari i contave robis intant che le petenave e i faseve lis strecis, jê e scoltave contente e il timp al passave come intun piçul paradîs: intant i gjambars a levin tal tramai, a sbisiâ tor dal crot che nol podeve cjalâju, e no rivavin plui a vignî fûr.

Ancje il ricuart plui brut di Margarite al jere cun sô mari: e jere muarte di un brut mâl, cuant che Margarite e jere a pene fantate. Si visave di cuant che so pari i veve sierât i voi.

Materie: Tecnologjie
di…
#1907