CC26Setembar#01 – Repeçs, catans, tramais a cjase de none

#01- Repeçs, catans, tramais a cjase de none

La int di une volte no veve scuele ma e saveve pardabon gjavâse in maniere svelte. Lant a cjase dai nonos, di fat, si imparin cetantis robis pratichis par frontâ la vite cuotidiane: te maniere plui comude, rinunziant ae estetiche ma cul obietîf di vivi facil.
La mê none e je simpri stade une mestre dal rangjâsi. No us contarai des soluzions pratichis plui banâls, che si lis pues cjatâ par dut: la bandiere par parâ sù lis gjalinis (un mani di scove cuntun peçot tacât insom) o l’ombrenin de Fiat rot, tignût sù cuntun filistrin ingropât sbusant la capote de machine.
La mê none e je dal sigûr buine di fâ repeçs inmò plui inzegnôs. Come cuant, par esempli, a pene cjolt un gnûf telefonut di chei tecnologjics, acessoriât di une biele custodie rosse gnove fate a librut (par protezilu di coladis signestris tal ort o tal gjalinâr), jê e à subit taiât vie la patele, parcè che i deve fastidi. O cuant che e à scomençât a doprâ une tetarole par bevi di gnot distirade tal jet, par no scugnî jevâ sù: stant che e veve di supâ masse fuart par che i vignìs fûr avonde aghe, e à pensât ben di taiâ il pipul di gome. Sistemât tun moment!
E ancjemò, e je di chê altre dì la gnove tramaiade che mi à fat fâ: no rivant a viodi ben lis speris colôr leton dal orloi Thun cul pendul ch’o i vin regalât, mi à fat piturâlis cul penarel indelebil neri. Parial mâl? Cuâl isal il probleme? E cussì di catans e je plene la cjase.
Un tramai che e je braurose di vê inventât al fâs di prolungje pal braç, util par no sbassâsi. Al à dôs funzions principâls: une e je di cjapâ sù lis mierdis che Tobi al mole ator pal zardin, chê altre di cjapâ sù lis ciespis fraidis che di Istât a colin di continui – che chês, mascjos o feminis che a sedin, a nassin dutis, e il prât nol à di sei fodrât di plantutis di ciespâr. Cemût isal metût dongje chest argagn? Un baston di escursion, zontât cuntune palete pes mierdis dal gjat cu la curdele adesive di eletriciscj. Comoditât garantide e nuie mâl di schene. Vive la none!

Materie: Tecnologjie
di…
#1903