Puarte a Scuele un amì

O sin rivâts ae seconde metât di Avost e o vin gust di spiâus che a son bielzà 21 iscrits ae tierce CorseCurte, la gare fra scritôrs di contis curtis par furlan. O sin za contents, ma si spietìn ancjemò cualchi iscrit, par che la competizion scolastiche e sedi plui divertente e par vê une vore di contis di lei. Si che duncje, cussì par judâ chel che al à voie di sparniçâ la nestre iniziative, o vin fat lavora l’ordenadôr par dânus une infografiche svelte che in struc a spieghi ce che e je la corsecurte.

Podês salvâle e mandâle ator vie social o via messaç a cui che o crodês che al vedi voie di provâ a scrivi cualchi conte par furlan, ancje se nol è usât a scrivi par furlan.

E stant che o vin propite voie di slargjâ la iniziative ancje a cui che magari nol cognòs ancjemò ben la Osterie virtuâl plui leterarie dal Friûl, ve che o vin pensade une altre.

A cui che oltre a iscrivisi lui al puarte ancje a scuele un amì, i regalin mieç pont te valutazion di condote… PAR DUT IL AN!!! Magari o pensarês che al è un regâl di pôc, pe competizion, stant che no si vinç nuie (no si sa… no si sa… o vin dite che magari a saràn sorpresis ancje dilunc dal an scolastic) ma mieç pont in plui ogni mês nol è robe di butâ vie.

Ve chi une imagjin par jessi plui clârs. Andate e sparnicciate tutti. 🙂