La Cjadene di Contecurte – finâl

Prime di tacâ cu la maraveose ScueleCurte, ven a stâi la CorseCurte26, o sierìn cualchi cantin che o vevin in vore chest an. Un di chest al è chel de Cjadene di Contecurte, che aromai cuasi nissun si visarà di jê. La iniziative nus someave biele, e tal imprin e je lade indenant, ma dopo cuasi ducj chei che a àn ricevût l’invît a scrivi no àn scrit e forsit, no savìn, no àn nancje mandât indevant la cjadene.

Al è forsit un segnâl dal dì vuê, in efiets. No vin timp par nuie e lis prioritâts a van a finîle simpri tal lavôr e ta lis robis che magari no vin nancje gust di fâ e dopo ancje fâ un forward di une mail e pensâ a cualchidun di mandâiale al devente une imprese, e o crodìn che tancj no vedin mai ricevût la cjadene. Dut câs, cualchidun al à scrit, e o vin gust di ringraciâ chescj cuatri volenterôs par vê tignude sù la iniziative almancul par cualchi stazion de metro.

Se no si visais de cjadene, achì le vevin sclaride ben.

Duncje, il prin partecipant al jere stât chel che al veve scrite e pensade la cjadene, clare che o fevelìn dal Ostîr, Rafaêl Serafin, che al veve pensât ben di clamâsi VIMODRONE, che za il non al è dut un programe. Pe cjadene al è stât adiriture tirât dentri dôs voltis e al à scrit una conte sociâl une vore crude, che si clamave Cudui, e une altre une vore plui tenare, ambientade tal zardin di Vile Manin, dulà che no sai se o savês, ma al si cjate un Kappa. La conte si clamave Trisculutis. Lis peraulis che i vevin dât a jerin propite “Cudui” e

La seconde a jessi tirade dentri, e che no si è gjavade vie de cjadene e je stade Pierina Gallina, che si cjape simpri gust a scrivi alc pe Osterie e tornâ a scrivi par furlan.Par la cjadene e veve sielzût il non di LORETO, innomenade stazion Metro de Milan ben cognossude e nus veve scrit une des sôs flabis cun lis bestiis. Gildo il ros vier di tiere, si clamave. E la peraule di ispirazion e jere propite “Vier”,

I tierç a jessi tirât dentri, e figuriti se nol jere tra i prins che a vignevin cjapâts dentri de cjadene e soredut un che nol si tire mai indaûr cuant che al è di scrivi contis, al jere il nestri Famei. Checo Tam al à sielzût di clamâsi AFFORI, une stazion milanese che no je propite tra lis plui cognossudis, ma che lu à stiçât a scrivi “Scalembri“, titul che al jere ancje la peraule che i vevin mandât te cjadene.

E daspò o rivìn ae CDC04, ven a stâi la Cjadene di Contecurte, o ancje la Conde De Cjadene numar 4, che nus à scrit la stazion de Metro VILLA FIORITA. Ma cui jerial daûr di chest pseudonim temporani? Ben, nuiemancul che Laura Dri, che e à scruviert la nestre ostarie cu la CorseCurte24 e no podeve no rispuindi ae clamade. La conte e jere ispirade de peraule “Grop” e come ducj e à pensât ben di doprâ la peraule ancje pal titul. Grop la sô conte.

E cui vino ae clamade de cjadene numar 5? Podevie mighe mancjâ la nestre Sartore Astrid Virili? E chê, si sa, e à un spirt di chei che no i plasin i regolaments e cussì, invezit di sielzisi une stazion Metro di Milan e je lade a cjolisi une stazion di Rome, nuiemancul che chê di un cuartîr sior come chel de GARBATELLA. La peraule che i veve capitade e jere “Faliscje”, e la conte che e je saltade fûr de sô tastiere e je stade “Tal Grim”

E dopo la numar 5 la cjadene e à tirât dongje un altri grignel di gale. Lu à metût il nestri Massim Furlan cuntun biel poliziesc ironic come che al sa fâ lui, doprant la peraule Ratatuie, che pe ocasion al è deventât un sorenon, in bande che il titul de conte. La stazion che al veve cjapade e jere chê di LIMA, nuiemancul. Grignel de cjadene numar 6 par lui.

E dopo? Cui isal stât l’ultin tirât dentri te cjadene e nol à tirât il cûl indaûr? Un che nol scrîf tantis contis ma al varès di scrivilis. Il nestri Muini Stiefin Stefanut, che al è lât a cjolis la stazion de metro di GELSOMINI e cu la peraule Pivide al à scrit la conte Pivide.

2 comments